ட்ரம்ப் வெள்ளை மாளிகையிலிருந்து வெளியேறுவதில் மகிழ்ச்சி: ஈரான்

ட்ரம்ப் வெள்ளை மாளிகையிலிருந்து வெளியேறுவது மகிழ்ச்சியாக உள்ளது என்று ஈரான் அதிபர் ஹசன் ரவ்ஹானி தெரிவித்துள்ளார்.

இதுகுறித்து அரசுத் தொலைக்காட்சியில் ஹசன் ரவ்ஹானி பேசும்போது, “ஈரான் அதிபராக ஜோ பைடன் பதவியேற்பது எங்களுக்கு மகிழ்ச்சி அளிக்கவில்லை என்றாலும், டொனால்ட் ட்ரம்ப் வெள்ளை மாளிகையிலிருந்து வெளியேறுவது எங்களுக்கு மகிழ்ச்சியாக உள்ளது.

பல கொடுமைகளைச் செய்தவர் ட்ரம்ப். அவர் ஒரு கொலையாளி, பயங்கரவாதி. அவர் எங்கள் தடுப்பூசி முயற்சிகளைக் கூட தடுத்தார். ட்ரம்ப் தனது அனைத்து நெறிகளையும், கொள்கைகளையும் இழந்துவிட்டார்” என்றார்.

அமெரிக்க அதிபர் ட்ரம்ப் தனது நான்கு வருட ஆட்சிக் காலத்தில் ஈரானுடன் மோதல் போக்கையே கடைப்பிடித்து வருகிறார். ஈரானுடன் அணு ஆயுத ஒப்பந்தத்திலிருந்து அமெரிக்கா விலகிய பின்பு, அந்நாட்டின் மீது தொடர்ச்சியாக பொருளாதாரத் தடைகளை ட்ரம்ப் விதித்து வந்தார்.

மேலும், ஈரானின் முக்கிய ராணுவத் தளபதியான காசிம் சுலைமானை அமெரிக்கப் படைகளை வைத்து ட்ரம்ப் கொன்றார். இதன் காரணமாக ஈரான் - அமெரிக்கா இடையே மோதல் வலுத்தது.

இந்நிலையில் சமீபத்தில் நடந்த அமெரிக்க அதிபர் தேர்தலில் ஜனநாயகக் கட்சியின் அதிபர் வேட்பாளர் ஜோ பைடன் வெற்றி பெற்றார். 2021-ம் ஆண்டு ஜனவரி 20-ம் தேதி அமெரிக்காவின் புதிய அதிபராக ஜோ பைடன் பதவியேற்க உள்ளார்.

இந்த நிலையில் அமெரிக்காவில் எந்த ஆட்சி மாற்றம் நிகழ்ந்தாலும் தங்கள் நிலைப்பாடு ஒரே மாதிரியாக இருக்கும் என்றும், அமெரிக்கா தங்கள் நாட்டின் மீதான பொருளாதாரத் தடையை நீக்க வேண்டும் என்றும் ஈரான் தெரிவித்துள்ளது.