இந்தியா 100% வரிகளை குறைக்க தயாராக உள்ளது; விரைவில் வர்த்தக ஒப்பந்தம்: ட்ரம்ப் நம்பிக்கை

நியூயார்க்: அமெரிக்கப் பொருட்களுக்கான 100% வரிகளைக் குறைக்க இந்தியா தயாராக உள்ளது என்று அமெரிக்க அதிபர் டொனால்ட் ட்ரம்ப் கூறியுள்ளார். புது டெல்லிக்கும் வாஷிங்டனுக்கும் இடையே வர்த்தக ஒப்பந்தம் விரைவில் ஏற்படவுள்ளதாகவும் அவர் கூறினார்.

ஃபாக்ஸ் நியூஸுக்கு அமெரிக்க அதிபர் டொனால்ட் ட்ரம்ப் அளித்த பேட்டியில், “இந்தியா உலகின் மிக உயர்ந்த வரிகளைக் கொண்ட நாடுகளில் ஒன்று. அவர்கள் வணிகம் செய்வதை கிட்டத்தட்ட சாத்தியமற்றதாக்குகிறார்கள். அமெரிக்காவுக்கான தங்கள் வரிகளில் 100 சதவீதத்தைக் குறைக்க அவர்கள் தயாராக இருக்கிறார்கள் என்பது உங்களுக்குத் தெரியுமா?” என ட்ரம்ப் கூறினார்.

இந்தியாவுடனான ஒப்பந்தம் விரைவில் வருமா என்று கேட்டபோது, ​​ட்ரம்ப், “அது விரைவில் வரும். நான் அவசரப்படவில்லை. பாருங்கள், எல்லோரும் எங்களுடன் ஒப்பந்தம் செய்ய விரும்புகிறார்கள். எங்களுடன் தென் கொரியா ஒரு ஒப்பந்தம் செய்ய விரும்புகிறது, ஆனால் நான் எல்லோருடனும் ஒப்பந்தம் செய்யப் போவதில்லை. நான் வரம்பை நிர்ணயிக்கப் போகிறேன். ஒப்பந்தங்களைச் செய்ய விரும்பும் 150 நாடுகள் என்னிடம் உள்ளன. வர்த்தக ஒப்பந்தத்தை உறுதிப்படுத்த இந்தியாவும் அமெரிக்காவும் பேச்சுவார்த்தை நடத்தி வருகின்றன.” என்றார்.

இதுகுறித்து விளக்கமளித்த இந்திய வெளியுறவுத்துறை அமைச்சர் ஜெய்சங்கர், “இந்தியாவிற்கும் அமெரிக்காவிற்கும் இடையே வர்த்தகப் பேச்சுவார்த்தைகள் நடந்து வருகின்றன. இவை சிக்கலான பேச்சுவார்த்தைகள். எல்லாம் முடியும் வரை எதுவும் முடிவு செய்யப்படுவதில்லை. எந்தவொரு வர்த்தக ஒப்பந்தமும் பரஸ்பரம் நன்மை பயக்கும்; அது இரு நாடுகளுக்கும் வேலை செய்ய வேண்டும்" என்று அவர் கூறினார்.

அதேபோல். காங்கிரஸ் கட்சியின் பொதுச் செயலர் ஜெய்ராம் ரமேஷ், “அமெரி்க்க அதிபர் பூஜ்ய வரி விதிப்பை இந்தியா ஏற்றுக் கொண்டதாக அறிவிக்கிறார். நமது பிரதமர் மோடி இந்த விவகாரத்தில் மவுனம் காக்கிறார். இதற்கும், சிந்தூர் ஆபரேஷன் நிறுத்தத்துக்கும் என்ன தொடர்பு?” என்று கூறியிருந்தார்.

இருதரப்பு வர்த்தகத்தை மேம்படுத்துவதற்காக, அமெரிக்காவுடனான முன்மொழியப்பட்ட ஒப்பந்தத்தில் ஜவுளி, ரத்தினக் கற்கள் மற்றும் நகைகள், தோல் பொருட்கள், ஆடைகள், பிளாஸ்டிக், ரசாயனங்கள், இறால், எண்ணெய் விதைகள், ரசாயனங்கள், திராட்சை மற்றும் வாழைப்பழங்கள் போன்ற தொழிலாளர் மிகுந்த துறைகளுக்கு வரிச் சலுகைகளை இந்தியா கோருகிறது.

மறுபுறம், சில தொழில்துறை பொருட்கள், ஆட்டோமொபைல்கள் (குறிப்பாக மின்சார வாகனங்கள்), ஒயின்கள், பெட்ரோ கெமிக்கல் பொருட்கள், பால் பொருட்கள், ஆப்பிள்கள் மற்றும் மரக் கொட்டைகள் போன்ற பொருட்களில் வரிச் சலுகைகளை அமெரிக்கா விரும்புகிறது.