பாங்காங் டிஸோ ஏரி... இதை ஏரி என்று சொல்லலாமா அல்லது இந்தியாவின் சொர்க்கம் என்று சொல்லலாமா. இப்படித்தான் ஏரியைப் பார்த்ததும் முதல் அபிப்ராயம் என்னுள் எழுந்தது. மலை மேட்டில் இருந்து கீழே பார்த்தால் கடல் போல நீர், அதை காக்கும் இயற்கை அரணாக மலைகள். அதோடு ஆங்காங்கே தூரத்தில் தெரியும் பனி மலைகள்.

சூரியன் உச்சிக்கு வந்திருந்தது. ஆனாலும் வெப்பம் கொஞ்சமும் தெரியாதஅளவுக்கு குளிர் காற்று வீசிக் கொண்டிருந்தது. மனம் எங்கும் அலைபாயவில்லை. ஏதோ தியானத்தில் ஈடுபட்டு இருந்த உணர்வு. தெளிவாய் அமைதியாய் இப்படி ஒரு அமைதி இந்த பயணத்தில் இதுவரை கிடைக்கவில்லை.