கண்சிகிச்சைக்கு முன்னோடியான நாடு இந்தியா எனும் அளவிற்கு தேர்ந்த கண் மருத்துவர்கள் பலர் இந்தியாவில் உருவெடுக்க முழுக் காரணமாக திகழ்ந்தார் டாக்டர் பத்ரிநாத். அதுமட்டுமின்றி நூற்றுக்கணக்கான கண் மருத்துவ ஆய்வுக் கட்டுரைகளை சர்வதேச அளவில் வெளியிட்டு, கண் சிகிச்சையில் பல புதிய போக்குகளை மருத்துவ உலகிற்கு காட்டினார். இதனால் 'Chief' என்றே மருத்துவர்கள் அனைவரும் இவரை அன்பாக அழைத்தனர். கர்நாடக இசையிலும் பாரதியார் பாடல்களிலும் பத்ரிநாத் பெரும் ஈடுபாடு கொண்டிருந்ததால் அவரது அறுவைசிகிச்சை அரங்குகளில் எப்போதும் மெல்லிய இசை ஒலித்தபடி இருக்கும் என நினைவு கூருகின்றனர் அவரது உதவி மருத்துவர்கள்.