Metro என்று அழைக்கப்படுவதேன்? | ஆங்கிலம் அறிவோமே 4.0 - 133

இந்தத் தமிழ் புத்தாண்டின் பெயர் ‘விஸ்வாவசு’ என்றும் அதற்கான பொருள் beneficence என்றும் படித்தேன். இந்த ஆங்கிலச் சொல்லுக்கான பொருளை எடுத்துக் காட்டுடன் விளக்க முடியுமா? - தாராளத்தன்மை, அறச்செயல். The event relies heavily on the beneficence of their sponsors. லத்தீன் மொழியில் bene என்பது ‘நல்ல’ என்பதையும் facere என்பது ‘செய்வது’ என்பதையும் குறிக்கும். ஆக நல்ல செயல்களை செய்வது.

Beneficence செயல்களுக்கான எடுத்துக்காட்டுகள்: முன்பின் தெரியாத முதியவர் சாலையைக் கடக்க உதவுபவர், தேவையேயில்லாத மருத்துவ சோதனைகளை ‘எதுக்கும் செய்துக்கிட்டா நல்லது’ என்று திணிக்காத மருத்துவர், பாடத்தைப் புரிந்து கொள்ளத் திணறும் மாணவருக்கு பள்ளி நேரத்துக்குப் பிறகும் உதவும் ஆசிரியர். (‘ஒரு எடுத்துக்காட்டு கேட்கப்படும்போது அதிக எடுத்துக்காட்டுகளை அளிக்கும் கட்டுரையாளர்’ என்பதையும் இந்தப் பட்டியலில் சேர்ப்பது உங்கள் இஷ்டம்!).

7G ரெயின்போ என்று தொடங்கும் திரைப்படத்தின் இறுதிச் சொல்லை தமிழக அரசு நீக்கியுள்ளதே, ஏன்? - Colony என்பது குடியேற்றப் பகுதி என்பதைக் குறிக்கும் சொல். We live in a small colony near the city. India was once a British colony. சிங்கக் கூட்டத்தை pride என்றும், பசுக்களின் கூட்டத்தை herd என்றும் குறிப்பிடுவது வழக்கம். அதேபோல் தேனீக்களின் கூட்டத்தை colony என்று குறிப்பிடுவார்கள்.

ஆக colony என்ற சொல் சிக்கலானது அல்ல. ஆனால், நடைமுறையில் (பட்டியலின மக்களை ‘காலனிக்காரங்க’ என்பதுபோல் சில பகுதிகளில் குறிப்பிடத் தொடங்கிவிட), ‘காலனி என்பது பட்டியலின மக்களைத் தாழ்த்துவதாக இருப்பதால் அந்தச் சொல் அனைத்து அரசு ஆவணங்களிலிருந்தும் அகற்றப்படுகிறது’ என்று தமிழக அரசு முடிவெடுத்துள்ளது.

Mr.X dies என்று ஆங்கில நாளிதழ்கள் செய்தியை வெளியிடுகின்றன. Died என்பதுதானே சரி? - இறந்த செய்தியை வெளியிடும்போது dies என்று குறிப்பிடுவது ஏற்றுக்கொள்ளப்பட்டுள்ள ஒன்று. He dies in a road accident. சொல்லப்போனால் மேற்கொளைப் பயன்படுத்தும் போது கூட (அதைக் கூறியவர் எப்போதோ இறந்து விட்டிருந்தால் கூட) இதுபோல் பயன்படுத்துவோம். Shakespeare says, ‘All the world is a stage’ என்பதுபோல.

சில தங்குமிடங்களில் dormitory அறைகள் இருப்பதாகக் குறிப்பிடுகிறார்கள். அப்படியென்றால் என்ன? - அங்கு ஒரே அறையில் பலருக்கான படுக்கைகள் இருக்கும். அதாவது கட்டில், மெத்தை மட்டும் இருக்கும். மேஜை, நாற்காலி, ஃப்ரிஜ் போன்ற வசதிகள் எதுவும் இருக்காது.

Metropolitan cityஇல் உருவாக்கப்படுகிறது என்பதால்தான் metro என்று அழைக்கப்படுகிறதா? - Metro என்பது metropolitan city என்பதன் சுருக்கம் அல்ல. நிலத்தடியில் செல்லும் ரயில் சேவையை இது குறிக்கிறது. பிரெஞ்சு மொழியில் மெட்ரோ என்றால் சுரங்கப்பாதை.

போட்டியில் கேட்டுவிட்டால்

They could not reach an agreement ______ their differences.
a) owing
b) on account
c) because of
d) inspite of

Inspite of என்பதைக் கோடிட்ட இடத்தில் நிரப்பினால், ‘வேறுபாடுகள் இருந்தபோதிலும் அவர்களால் ஒரு உடன்படிக்கைக்கு வரமுடியவில்லை’ என்று பொருள் வருகிறது.

இது முரணான அர்த்தத்தை அளிக்கிறது. Owing to, on account of போன்ற விடைகள் சரியானதாக இருந்திருக்கும். ஆனால், owing, on account என்று மட்டுமே விடைகளில் கொடுக்கப்பட்டுள்ளன. எனவே because of என்பதுதான் சரியான விடை.

Because of, Due to, On account of, Owing to போன்றவற்றை phrasal prepositions என்பார்கள். அதாவது, ஒன்றுக்கு மேற்பட்ட வார்த்தைகள் இணைந்து prepositionஆக செயல்புரிகின்றன.

சிப்ஸ்:

Howdy என்ற சொல் எதைக் குறிக்கிறது? - How do you do? (எப்படி இருக்கிறீர்கள்?) என்பதன் சுருக்கம்.

Contender என்பவர் சாம்பியனா? - போட்டியிடுபவர்.

நான் வராமல் இருந்தால் நீங்கள் போயிருப்பீர்கள். இதை ஆங்கிலத்தில் எப்படி எழுதலாம்? - If I had not come, you would have gone.

- கட்டுரையாளர்: ‘ஆங்கிலம் அறிவோமே’ உள்ளிட்ட நூல்களின் ஆசிரியர்; aruncharanya@gmail.com