Chitchat என்றால் அக்கப்போரா? | ஆங்கிலம் அறிவோமே 4.0 - 128

Onomatopoeic words என்பவை என்ன?

ஒலியை அடிப்படையாகக்கொண்ட சொற்கள். He banged the table என்பதில் bang என்பது மேஜையை ஓங்கி அடிக்கும் ஒலியைக் குறிக்கிறது. Tick-tock என்பது கடிகார ஒலியைக் குறிக்கும் சொல். Buzz என்பது தொலைபேசி எழுப்பும் ஒரு ஒலி. The phone buzzed in my wallet. Vroom என்பது என்ஜின் ஒலி. Abracadabra என்று சொல்லைக் கேட்கும்போதே அது ஏதோ அர்த்தமில்லாத அபத்தம் என்று நமக்குத் தோன்றுகிறது. அப்படி ஒன்றை விவரிக்கும் போது It is abracadabra என்பதுண்டு.

விலங்குகள் எழுப்பும் ஒலியை அடிப்படையாகக் கொண்டே இது போன்ற பல வார்த்தைகள் உருவானதுண்டு. Meow (மியாவ்), baa (பா), cluck (க்ளக்) போன்றவை முறையே பூனை, ஆடு, கோழி ஆகியவை எழுப்பும் ஒலிகளை உணர்த்தும் சொற்கள். The snake hissed என்பதிலுள்ள hiss என்பது பாம்பின் சீறல் ஒலியைக் குறிக்கிறது.

Beep என்பது எச்சரிக்கையை வெளிப்படுத்தும் ஒலி. The drivers kept beeping their horns until the van moved out of the way. Beep words என்பவை சென்சார் செய்யப்படும் அல்லது தடை செய்யப்படும் வார்த்தைகள். திரைப்படத்தில் சில வசனங்கள் மெளனமாக்கப்படும். அப்போது ஒரு ஒலியைக் கேட்கலாம். (அதன் சப்டைட்டிலிலும் **** என்பது போன்ற குறியீடுகள் காணப்படும்). அதாவது பொது வெளியில் அரங்கேற்றக் கூடாத வார்த்தைகளை beep ஒலி வைத்து மறைக்கிறார்கள்.

Click என்ற சொல் ஒரு கேமரா இயக்கப்படுவதை நமக்கு உணர்த்துகிறது. Flutter என்பது ஒரு பறவை வேகமாக தன் இறக்கைகளை அடித்து எழுப்பும் ஒலி. I heard a flutter and realised a canary had flown through the window. Giggle என்பது அர்த்தமில்லாமல் குறைந்த ஒலியில் சிரிப்பதைக் குறிக்கிறது.

Chitchat என்பது அக்கப்போரைக் குறிக்கிறதா? Peptalk என்பதும் அதுவும் ஒன்றா?

சமூக சந்திப்புகளில் நிகழும் எளிய மேம்போக்கான உரையாடல்களை chitchat குறிக்கிறது. தீய விளைவுகளை ஏற்படுத்தாத உரையாடல். Peptalk என்பது ஒருவர் அல்லது ஒரு அணி சவாலான ஒரு செயலைச் செய்ய இருக்கும்போது அவரை அல்லது அந்த அணியை ஊக்குவிக்கும் வகையில் பேசப்படும் பேச்சு.

- கட்டுரையாளர்: ‘ஆங்கிலம் அறிவோமே’ உள்ளிட்ட நூல்களின் ஆசிரியர்; aruncharanya@gmail.com