3 சிறுவர்களை பாதுகாப்பாக ஒப்படைத்த - அரசு பேருந்து ஓட்டுநர், நடத்துநரை காவல் துறையினர் கவுரவிப்பு :

செய்யாறு அருகே அரசுப் பேருந்தில் தனியாக பயணித்த 1 சிறுவர் மற்றும் 2 சிறுமிகளை மீட்டு காவல்நிலையத்தில் ஒப்படைத்த ஓட்டுநர் மற்றும் நடத்துரை காவல்துறையினர் கவுரவித்தனர்.

திருவண்ணாமலை மாவட்டம் செய்யாறில் இருந்து சென்னைக்கு அரசுப் பேருந்து கடந்த 22-ம் தேதி சென்றுள்ளது. அப்போது, அந்த பேருந்தில் 11 வயது மாணவர், 9 வயது உள்ள 2 மாணவிகள் தனியாக பயணித்துள்ளனர். இதையறிந்த அரசுப் பேருந்து ஓட்டுநர் முரளி மற்றும் நடத்துநர் தங்கராஜ் ஆகியோர் தூசி காவல் நிலையத்துக்கு பேருந்துடன் சென்று, காவல்துறையிடம் 3 சிறுவர்களையும் ஒப்படைத்தனர்.

இதையடுத்து, சிறுவர்களிடம் காவல்துறையினர் விசாரணை நடத்தி, பின்னர் பெற்றோரை வரவழைத்து அவர்களை ஒப் படைத்தனர். இந்நிலையில், 3 சிறுவர்களை பாதுகாப்பாக மீட்டு ஒப்படைத்த ஓட்டுநர் முரளி மற்றும் நடத்துநர் தங்கராஜ் ஆகியோரை தூசி காவல் நிலையத்துக்கு வரவழைத்து, அவர்களுக்கு உதவி ஆய்வாளர் சிலம்பரசன் சால்வை அணிவித்து பாராட்டினார்.