‘சி-விஜில் செயலியில் தேர்தல் புகார் தெரிவிக்க அழைப்பு’ :

நீலகிரி மாவட்டத்தில் தேர்தல் தொடர்பான புகார்களை ‘சி-விஜில்’ செயலியில் தெரிவிக்கலாம் என மாவட்ட ஆட்சியர் ஜெ.இன்னசென்ட் திவ்யா தெரிவித்தார்.

உதகை ஹெச்.ஏ.டி.பி. விளையாட்டு மைதானத்தில் ‘சி-விஜில்’ செயலி குறித்து, வாக்காளர்களிடையே விழிப்புணர்வு ஏற்படுத்தப்பட்டது.

தேர்தல் செலவினப் பார்வையாளர்கள் விசால் எம்.சனப், அமர்சிங் நெஹரா, மாவட்ட தேர்தல் அலுவலரும், ஆட்சியருமான ஜெ.இன்னசென்ட் திவ்யா ஆகியோர் பூங்கா பணியாளர்களுடன் வரிசையில் நின்று, தேர்தல் தொடர்பான புகார்களை ‘சி-விஜில்’ செயலியில் தெரியப்படுத்துங்கள் என்று விழிப்புணர்வு ஏற்படுத்தினர்.

அதன்பின்பு மாவட்ட ஆட்சியர் ஜெ.இன்னசென்ட் திவ்யா கூறும்போது ‘‘கடந்த தேர்தலின்போது குறைவான வாக்குகள் பதிவாகியுள்ள பகுதிகளில் வாக்கு எண்ணிக்கையை அதிகரிக்க விழிப்புணர்வு ஏற்படுத்தப்பட்டு வருகிறது. சி-விஜில் செயலி குறித்தும், அதில் தேர்தல் தொடர்பான புகார்களை அளிக்கும் விதம் குறித்தும் விழிப்புணர்வு ஏற்படுத்தப்பட்டது’’ என்றார்.

தோட்டக்கலைத் துறை இணை இயக்குநர் சிவசுப்ரமணியம் சாம்ராஜ், உதவி திட்ட அலுவலர்கள் ராமகிருஷ்ணன், ஜெயராணி உட்பட அரசு அலுவலர்கள் பலர் கலந்து கொண்டனர்.