வேலூர் மாவட்டத்தில் - முதல் நாளில் 2 சுயேட்சை மனுத்தாக்கல் :

வேலூர் மற்றும் கே.வி.குப்பம் (தனி)தொகுதியில் மட்டும் தலா ஒரு சுயேட்சை வேட்பாளர்கள் மனுத்தாக்கல் செய்துள்ளனர்.

தமிழக சட்டப்பேரவைத் தேர்தல் ஏப்ரல் 6-ஆம் தேதி நடைபெற உள்ளது. தேர்தலுக்கான மனுத்தாக்கல் நேற்று தொடங்கி வரும் 19-ம் தேதி வரை நடைபெற உள்ளது. வேட்புமனுக்கள் மீது வரும் 20-ம் தேதி பரிசீலனை செய்யப்படும். வரும் 22-ம் தேதி மனுக்களை திரும்பப்பெற கடைசி நாள். அன்றைய தினமே இறுதி வேட்பாளர் பட்டியல் வெளியிடப்படும்.

அதன்படி, வேலூர் மாவட்டத்தில் உள்ள 5 தொகுதிகள் மற்றும் ராணிப்பேட்டை மாவட்டத் தில் உள்ள 4 தொகுதிகள் என மொத்தம் 9 தொகுதிகளுக்கான மனுத்தாக்கல் நேற்று காலை 11 மணிக்குத் தொடங்கி பிற்பகல் 3 மணிக்கு முடிந்தது. முதல் நாள் என்பதால் பெரும்பாலானவர்கள் விருப்ப மனுக்களை மட்டுமே வாங்கிச் சென்றனர்.

வேலூர் மற்றும் கே.வி.குப்பம் (தனி) தொகுதியில் மட்டும் தலா ஒரு சுயேட்சை வேட்பாளர்கள் விருப்ப மனுக்களை அளித்துள்ளனர். ராணிப்பேட்டை மாவட்டத்தில் உள்ள 4 தொகுதிகளில் யாரும் மனுத்தாக்கல் செய்யவில்லை. வரும் திங்கட்கிழமை மற்றும் புதன்கிழமை அன்று மனுத்தாக்கல் அதிகளவில் இருக்கும் என கூறப்படுகிறது. கரோனா பரவலை தடுக்க மனுத்தாக்கலின் போது வேட்பாளருடன் இரண்டு பேர் மட்டும் இருக்க வேண்டும் என கட்டுப்பாடு விதிக்கப்பட்டுள்ளது.