கடலூர் மாவட்டத்தை புரட்டிப் போட்டது ‘புரெவி’ புயல் குடியிருப்புகளில் வெள்ள நீர் புகுந்தது - ஆயிரக்கணக்கான விளை நிலங்கள் மூழ்கின

‘புரெவி’ புயல் காரணமாக கடந்த இருந நாட்களாக கடலூர் மாவட்டத்தில் விடிய, விடிய கன மழை கொட்டித் தீர்த்தது. இதனால் குடியிருப்புகளை வெள்ள நீர் சூழ்ந்துள்ளது. ஆயிரக்கணக்கான விளை நிலங்களும் நீரில் முழ்கியுள்ளன.

‘நிவர்’ புயலால் கடந்த வாரத்தில் கடலூர் மாவட்டத்தில் கனமழை பெய்தது. அதைத் தொடர்ந்து வந்த ‘புரெவி’ புயலும் இம்மாவட்டத்தை கடும் மழைப் பொழிவை தந்திருக்கிறது.

50 ஆயிரம் ஏக்கர் பாதிப்பு

கடலூர் மாவட்டத்தில் சுமார் 50 ஆயிரம் ஏக்கர் விளைநிலம் மழை தண்ணீரில் மூழ்கியது. தொடர் கனமழையால் கடலூர் - சிதம்பரம் சாலையில் காரைக்காடு பகுதியில் வெள்ளநீர் செல்வதால் போக்குவரத்து நிறுத்தப்பட்டுள்ளது. குள்ளஞ்சாவடி -ஆலப்பாக்கம் சாலையில் வெள்ளநீர் செல்வதால் போக்குவரத்து நிறுத்தப்பட்டுள்ளது.

ஆட்சியர் ஆய்வு

இந்த நிலையில் மாவட்ட ஆட்சியர் சந்திசேகர் சாகமூரி கொட்டும் மழையில் மழை பாதிப்புகளை, மாவட்டத்தின் முக்கிய நீர்நிலைகளையும் பார்வையிட்டு ஆய்வு செய்தார். கடலூர் ஊராட்சி ஒன்றியம் ஈச்சங்காடு பகுதியில் கடலூர்-சிதம்பரம் தேசிய நெடுஞ்சாலையில் கனமழை காரணமாக மழைநீர் தேங்கியுள்ளதை பார்வையிட்டு போக்குவரத்திற்கு இடையூறு இல்லாமல் ஜேசிபி இயந்திரம் மூலம் மழைநீரினை வெளியேற்ற நடவடிக்கை எடுக்குமாறு உத்தரவிட்டார்.

தொடர்ந்து அவர் குறிஞ்சிப்பாடி அருகே உள்ள பெருமாள் ஏரியை பார்வையிட்டார். குறிஞ்சிப்பாடியில் சாலையில் வழிந்தோடிய மழை தண்ணீரை ஜேசிபிமூலம் அகற்றிட அதிகாரிகளுக்கு உத்தரவிட்டார். வடலூர் அருகே ஆண்டிக்குப்பத்தில் தேங்கி நின்ற மழை நீரையும் அகற்ற அதிகாரிகளுக்கு உத்தரவிட்டார். பின்னர் மேல்பரவனாற்று பகுதியை பார்வையிட்டார். தொடந்து வீராணம் ஏரிக்கு சென்று பார்வையிட்டு ஆய்வு செய்தார்.

441 பாதுகாப்பு மையங்கள்

“வெள்ளத் தடுப்பு பணிகளை மேற்கொள்ள அனைத்துத்துறை அலுவலர்களையும் தயார் நிலையில் இருக்க அறிவுறுத்தப்பட்டுள்ளது. நிவர் புயலின்போது எடுக்கப்பட்ட முன்னெச்சரிக்கை நடவடிக்கைகளை தற்போதும் மேற்கொள்ள அறிவுறுத்தப்பட்டுள்ளது. பொதுப்பணித்துறையின் மூலம் அனைத்து நீர்நிலைகளையும் தொடர்ந்து கண்காணிக்கப்பட்டு வருகிறது.

கடலூர் மாவட்டத்தில் 441 பாதுகாப்பு மையங்களில் உள்ளன. தற்போது அதிக மழை காரணமாக குடிசை வீடுகள் மற்றும் தாழ்வான பகுதிகளில் உள்ள மக்கள் பாதுகாப்பு மையங்களில் தங்க வேண்டும். 300 ஜேசிபி இயந்திரங்கள் தற்போது மழைநீர் வெளியேற்றப்படும் பணியில் ஈடுபட்டுள்ளன.

பெற்றோருக்கு எச்சரிக்கை

அதிக கன மழையால் ஏரி, குளங்கள் நிரம்பி வருகிறது. எனவே, பெற்றோர் தங்களது பிள்ளைகளை வெளியே அனுப்பாமல் பாதுகாப்பாக வீட்டிற்குள்ளே வைத்திருக்க வேண்டும். அவசர தேவைகளுக்கு மாவட்ட ஆட்சியரகத்தில் இயங்கும் கட்டுப்பாட்டு அறை எண்.1077 என்ற எண்ணில் தொடர்பு கொண்டு தகவல்களை தெரிவிக்கலாம்” என்று தெரிவித்தார்.

இதற்கிடையே, கனமழையால் ஏற்பட்ட பெரு வெள்ளம் காரணமாக கீழணையில் இருந்து கொள்ளிடத்தில் விநாடிக்கு 15 ஆயிரம் கன அடி நீர் வெளியேற்றப்படுகிறது.

………………

பெட்டிச் செய்தி

கடலூர் மாவட்ட

மழையளவு விவரம்

சிதம்பரத்தில் 340 மி.மீ, கொத்தவாச்சேரியில் 335 மி.மீ, அண்ணாமலைநகரில் 329.4மி.மீ, லால்பேட்டையில் 295.5மி.மீ, பரங்கிப்பேட்டையில் 264.2மி.மீ, காட்டுமன்னார்கோவிலில் 253.4மி.மீ, குறிஞ்சிப்பாடியில் 249மி.மீ, புவனகிரியில் 189மி.மீ, ஸ்ரீமுஷ்ணத்தில் 152.2மி.மீ, விருத்தாசலத்தில் 151 மி.மீ, மாவட்ட ஆட்சியர் அலுவலகம் 145.8மி.மீ,பண்ருட்டியில் 132மி.மீ, வேப்பூரில் 94மி.மீ, லக்கூரில் 68மி.மீ மழை பெய்தது.

……………………