ராணிப்பேட்டை மாவட்ட உள்ளாட்சி தேர்தலில் - திமுக கூட்டணி போட்டியிடும் வார்டுகள் பட்டியல் வெளியீடு :

ராணிப்பேட்டை மாவட்டத்தில் உள்ள 7 ஊராட்சி ஒன்றியங்களில் 118 வார்டுகளில் திமுக, காங்கிரஸ் கட்சிக்கு 6, வி.சி.கவுக்கு 3 வார்டுகள் ஒதுக்கீடு செய்யப்பட்ட பட்டியலை திமுக மாவட்டச் செயலாளரும் அமைச்சருமான ஆர்.காந்தி வெளியிட்டுள்ளார்.

ராணிப்பேட்டை மாவட்டத்தில் உள்ள 7 ஊராட்சி ஒன்றியங்களுக்கு உட்பட்ட 127 வார்டு கவுன்சிலர், 288 கிராம ஊராட்சி மன்ற தலைவர், 2,220 கிராம ஊராட்சி வார்டு உறுப்பினர், 13 மாவட்ட ஊராட்சி கவுன்சிலர் என மொத்தம் 2,648 பதவிகளுக்கு ஊரக உள்ளாட்சி தேர்தல் நடைபெற உள்ளது. இதில், மாவட்ட ஊராட்சி கவுன்சிலர் மற்றும் ஊராட்சி ஒன்றிய கவுன்சிலர் பதவிக்கு அரசியல் கட்சி சின்னங்களில் வேட்பாளர்கள் போட்டியிடுவார்கள்.

அதன்படி, ராணிப்பேட்டை மாவட்டத்தில் திமுக சார்பில் போட்டியிடும் வேட்பாளர்கள் மற்றும் கூட்டணி கட்சிகள் போட்டியிடும் இடங்கள் குறித்த பட்டியலை மாவட்டச் செயலாளரும் கைத்தறி மற்றும் துணிநூல் துறை அமைச்சருமான ஆர்.காந்தி நேற்று வெளியிட்டார்.

இதில், 13 மாவட்ட ஊராட்சி கவுன்சிலர் பதவிகளில் 10 வார்டுகளில் திமுகவும், 3 வார்டுகளில் காங்கிரஸ் கட்சி போட்டியிட உள்ளது. 7 ஊராட்சி ஒன்றியங்களில் உள்ள 127 ஒன்றிய வார்டில் 118 இடங்களில் திமுகவும், 6 இடங்களில் காங்கிரஸ், 3 இடங்களில் விடுதலை சிறுத்தைகள் போட்டியிட உள்ளன. காங்கிரஸ் கட்சிக்கு காவேரிப் பாக்கம் ஒன்றியத்தில் 4-வது வார்டு, சோளிங்கர் ஒன்றியத்தில் 6, 13, 18-வது வார்டுகள், வாலாஜா ஒன்றியத்தில் 12-வது வார்டு, கணியம்பாடி ஒன்றியத்தில் கீழ் அரசம்பட்டு வார்டு காங்கிரஸ் கட்சிக்கு ஒதுக்கப்பட்டுள்ளது.

அதேபோல், விடுதலை சிறுத்தைகள் கட்சிக்கு அரக்கோணம் ஊராட்சி ஒன்றியத்தில் 6, 17 மற்றும் 23-வது வார்டுகள் ஒதுக்கப்பட்டுள்ளன.