காஞ்சிபுரம், செங்கல்பட்டு மாவட்டங்களில் - இரவு 8 மணிக்கு மேல் வெளியூர் பேருந்து இயங்காது :

தமிழ்நாடு அரசுப் போக்குவரத்துக் கழக காஞ்சிபுரம் மண்டல அலுவலகம் சார்பில் வெளியிடப்பட்டுள்ள செய்திக்குறிப்பில் கூறியிருப்பதாவது:

தமிழகத்தில் கரோனா தொற்று பரவலைக் கட்டுப்படுத்தும் வகையில் இரவு நேர ஊரடங்கு அமல்படுத்தப்பட்டுள்ளது. இதனால் இரவு10 மணி முதல் அதிகாலை 4 மணிவரை பேருந்துகள் இயங்காது. அதேபோல, ஞாயிற்றுக்கிழமைகளில் முழு நேரமும் பேருந்துகள் இயங்காது.

காஞ்சிபுரம் மாவட்டத்தில் உள்ள அனைத்து பேருந்து நிலையங்களில் இருந்தும் நகரப் பேருந்துகள் இயங்கும். மத்தியப் பேருந்து நிலையம் மற்றும் இதர பேருந்து நிலையங்களில் இருந்து 9 மணிக்குப் புறப்படும் உள்ளூர் பேருந்துகள் 10 மணி வரை மட்டுமே இயக்கப்படும். அதேபோல, செங்கல்பட்டு மாவட்டத்திலும் இதே நேரம் பின்பற்றப்படும்.

காஞ்சிபுரம் மத்தியப் பேருந்து நிலையத்தில் இருந்து இயக்கப்படும் தொலைதூர வழித்தட புற நகர்ப் பேருந்துகளின் நேர விவரம்: சென்னை, பூந்தமல்லி, தாம்பரம், வேலூர் பகுதிகளுக்கு காஞ்சிபுரம் பேருந்து நிலையத்தில் இருந்து கடைசியாக இரவு 8 மணிக்குப் பேருந்து இயக்கப்படும். திருச்சிக்கு மாலை 3.15 மணிக்கும், சேலத்துக்கு பிற்பகல் 2.30, விழுப்புரத்துக்கு இரவு 7, திருவண்ணாமலைக்கு மாலை6, செய்யாறு, திருப்பதி, திருத்தணிக்கு இரவு 8 மணிக்குள்ளும் பேருந்துகள் இயக்கப்படும்.

தொலைதூரம் செல்லும் பயணிகள் இரவு 10 மணிக்குள் தாங்கள் சென்றடைய வேண்டிய இடத்துக்குச் செல்ல வேண்டும். இதையொட்டி, தங்களது பயணத்தையும், பயண நேரத்தையும் முன்கூட்டியே திட்டமிட்டுக்கொள்ள வேண்டும். இவ்வாறு செய்திக்குறிப்பில் தெரிவிக்கப்பட்டுள்ளது.