ஆழ்வார்திருநகரி ஆதிநாதர் கோயிலில் மாசித் திருவிழா தேரோட்டம் திரளான பக்தர்கள் பங்கேற்பு

தூத்துக்குடி மாவட்டம் ஆழ்வார்திரு நகரி ஆதிநாதர் கோயிலில் மாசித் திருவிழா தேரோட்டம் நேற்று நடைபெற்றது. இதில் திரளான பக்தர்கள் கலந்து கொண்டனர்.

நவதிருப்பதி தலங்களில் ஒன்றான இக்கோயிலில் மாசித் திருவிழா கடந்த மாதம் 21-ம் தேதி கொடியேற்றத்துடன் தொடங்கியது. திருவிழா நாட்களில் தினமும் காலையிலும், மாலையிலும் சுவாமி நம்மாழ்வார் பல்வேறு வாகனங்களில் எழுந்தருளி வீதி புறப்பாடு நடைபெற்றது.

திருவிழாவின் முக்கிய நிகழ்வான தேரோட்டம் நேற்று நடைபெற்றது. இதனை முன்னிட்டு காலை 5 மணிக்குகோயில் நடை திறக்கப்பட்டு, விஸ்வரூபம், 5.30 மணிக்கு திருமஞ்சனம், 6 மணிக்கு கோஷ்டி நடைபெற்றது. தொடர்ந்து 6.45 மணிக்கு திருத்தேரில் சுவாமி நம்மாழ்வார் எழுந்தருளினார். 9 மணிக்கு பக்தர்கள் ‘கோவிந்தா கோபாலா' கோஷம் முழங்க திருத்தேரை வடம் பிடித்து இழுத்தனர். காலை 11.15 மணிக்கு தேர் நிலையம் வந்தடைந்தது. விழாவில் இன்று (மார்ச் 2) இரவு 7 மணிக்கு சுவாமி பொலிந்துநின்ற பிரானை தெப்பத்தில் எழுந்தருளச் செய்து தெப்ப உற்சவமும், நாளை (மார்ச் 3) இரவு 7 மணிக்கு சுவாமி நம்மாழ்வார் ஆச்சார்யர்களுடன் தெப்பத்தில் எழுந்தருளுதலும் நடைபெறுகிறது.