மார்கழி மாத பிறப்பை முன்னிட்டு திருச்செந்தூர் கோயிலில் நடைதிறப்பு, பூஜை நேரம் மாற்றம்

மார்கழி மாத பிறப்பை முன்னிட்டு திருச்செந்தூர் செந்திலாண்டவர் கோயிலில் இன்று (டிச.16) முதல்நடைதிறப்பு மற்றும் பூஜை நேரங்களில் மாற்றம் செய்யப்பட்டுள்ளது.

கோயில் இணை ஆணையர்பொறுப்பு) கல்யாணி வெளியிட்டுள்ள செய்திக்குறிப்பு : மார்கழி மாதம் இன்று (புதன்கிழமை) தொடங்கி ஜனவரி 13-ம் தேதி நிறைவு பெறுகிறது.

மார்கழி மாத தொடக்கத்தை முன்னிட்டு திருச்செந்தூர் செந்திலாண்டவர் கோயிலில் இன்று முதல் அதிகாலை 3 மணிக்கு நடை திறக்கப்பட்டு, 3.30 மணிக்கு விஸ்வரூபம், 4 மணிக்கு உதயமார்த்தாண்ட அபிஷேகம், 7.30 மணிக்கு உச்சிக்கால அபிஷேகம், மாலை 3.30 மணிக்கு சாயரட்சை தீபாராதனை, மாலை6 மணிக்கு இராக்கால அபிஷேகம், இரவு 8 மணிக்கு பள்ளியறை தீபாராதனை நடைபெறும். பின்னர் நடை திருக்காப்பிடப்படும்.

டிசம்பர் 30-ம் தேதி (புதன்கிழமை) ஆருத்ரா தரிசனத்தை முன்னிட்டு அதிகாலை 2 மணிக்குநடைதிறக்கப்பட்டு, 2.30 மணிக்குவிஸ்வரூப தீபாராதனையும், 3 மணிக்கு உதயமார்த்தாண்ட அபிஷேகமும் நடைபெறும்.

ஜனவரி 1-ம் தேதி (வெள்ளிக்கிழமை) ஆங்கில வருடப்பிறப்பு மற்றும் ஜனவரி 14-ம் தேதி (வியாழக்கிழமை) தை பொங்கல் திருநாளை முன்னிட்டு அதிகாலை 1 மணிக்கு நடைதிறக்கப்பட்டு, 1.30 மணிக்கு விஸ்வரூப தீபாராதனை, 4 மணிக்கு உதய மார்த்தாண்ட அபிஷேகம், தொடர்ந்து மற்ற கால பூஜைகள் நடைபெறும் எனத் தெரிவிக்கப்பட்டுள்ளது.