தீபாவளி பண்டிகையையொட்டி ஈரோட்டில் ரூ.8.55 கோடிக்கு மது விற்பனை :

தீபாவளியையொட்டி ஈரோட்டில் ஒரே நாளில் ரூ.8.55 கோடிக்கு மது விற்பனையானது.

தீபாவளி, பொங்கல் உள்ளிட்ட பண்டிகைகளின்போது டாஸ்மாக் கடைகளில் மது விற்பனை அதிகரிப்பது வழக்கமாகி உள்ளது.

ஈரோடு மாவட்டத்தில் மொத்தம் 212 மதுக்கடைகள் உள்ளன. இந்த கடைகளில் சாதாரண நாட்களில் ரூ.4 கோடி வரை மது விற்பனை நடைபெறும்.

தீபாவளிப் பண்டிகையையொட்டி கடந்த இரு நாட்களாக டாஸ்மாக் கடைகளில் மது விற்பனை அதிகரித்தது. தீபாவளிக்கு முந்தைய நாளான 3-ம் தேதி ஈரோடு மாவட்டம் முழுவதும் ரூ.8 கோடியே 55 லட்சத்துக்கு மது விற்பனையாகியுள்ளது. சாதாரண நாட்களைக் காட்டிலும், இரு மடங்கு கூடுதலாக மது விற்பனையாகியுள்ளதாக டாஸ்மாக் அதிகாரிகள் தெரிவித்தனர்.