திருச்சியில் வரும் 26-ம் தேதி முதல் காவலர் உடற்தகுதி தேர்வு :

திருச்சி மாநகர காவல் ஆணையர் ஏ.அருண் வெளியிட்டுள்ள செய்திக் குறிப்பில் தெரிவித்துள்ளதாவது:

தமிழ்நாடு சீருடை பணியாளர் தேர்வு குழுமத்தால் இரண்டாம் நிலைக் காவலர், சிறைக்காவலர் மற்றும் தீயணைப்பாளர் காலியிடங்களுக்கான எழுத்து தேர்வு கடந்த ஆண்டு டிச.13-ம் தேதி நடைபெற்றது.

இத்தேர்வில் வெற்றி பெற்ற 2,204 ஆண்கள், 1,005 பெண்கள், 1 திருநங்கை என 3,210 பேருக்கு வரும் 26-ம் தேதி முதல் ஆக.5-ம் தேதி வரை திருச்சி சுப்பிரமணியபுரத்தில் உள்ள மாவட்ட ஆயுதப்படை மைதானத்தில் அசல் சான்றிதழ் சரிபார்த்தல், உடற்கூறு அளத்தல், உடற்தகுதி தேர்வு (ஆண்கள் 1,500 மீ தூரத்தை 7 நிமிடங்களில் ஓடி முடிக்க வேண்டும், பெண்கள் மற்றும் திருநங்கைகள் 400 மீ தூரத்தை 2 நிமிடம் 30 விநாடிகளில் ஓடி முடிக்க வேண்டும்) நடைபெற உள்ளது.

இதற்கான ஏற்பாடுகளை தேர்வு மேன்பட்ட ஆய்வு அதிகாரியும், மாநகர காவல் ஆணையருமான ஏ.அருண், தமிழ்நாடு சீருடை பணியாளர் துணைக் குழுவின் தலைவரும், மாவட்ட எஸ்.பி.யுமான பா.மூர்த்தி உள்ளிட்டோர் செய்து வருகின்றனர்.