நிலுவைச் சம்பளம் கோரி தூய்மைப் பணியாளர்கள் முற்றுகை போராட்டம் :

நிலுவைச் சம்பளம் வழங்கக் கோரி, சேலம் மாநகராட்சி அலுவலகத்தை முற்றுகை செய்து மாநகராட்சி தூய்மைப் பணியாளர்கள் போராட்டத்தில் ஈடுபட்டனர்.

இதுதொடர்பாக அவர்கள் கூறியதாவது:

சேலம் மாநகராட்சி தூய்மைப் பணியாளர்கள் 2,500 பேருக்கு கடந்த 2 மாத சம்பளம் வழங்கவில்லை. இதனால், நாங்கள் பெரும் சிரமத்துக்குள்ளாகி வருகிறோம். மேலும், கடந்த இரு ஆண்டாக சம்பளத்தில் பிடித்தம் செய்யப்பட்ட வருங்கால வைப்பு நிதியை எங்களது கணக்கில் செலுத்தவில்லை.

எனவே, மாதந்தோறும் 1-ம் தேதி கணினி ரசீதுடன் சம்பளம் கிடைக்க நடவடிக்கை எடுக்க வேண்டும். ரூ.800 சீருடைக் கூலியை வழங்க வேண்டும்.

இவ்வாறு அவர்கள் கூறினர்.

இதனிடையில், தூய்மைப் பணியாளர்கள் உள்ளிட்ட 4 ஆயிரத்து 400 பணியாளர்களுக்கு மே மாத நிலுவைச் சம்பளத் தொகை ரூ.7 கோடியே 68 லட்சத்து 69 ஆயிரத்து 7-ஐ பணியாளர்களின் வங்கி கணக்கில் அனுப்பி வைக்க மாநகராட்சி ஆணையர் கிறிஸ்துராஜ் உத்தரவிட்டார்.