முகக்கவசம் அணியாத 38 ஆயிரம் பேர் மீது வழக்குப்பதிவு : வேலூர் சரக டிஐஜி காமினி தகவல்

வேலூர் சரகத்தில் முகக்கவசம் அணியாமல் சென்றதாக 38 ஆயிரம் பேர் மீது விதிமீறல் வழக்குப்பதிவு செய்திருப்பதாக டிஐஜி காமினி தெரிவித்தார்.

தமிழகத்தில் கரோனா இரண்டாம் அலை பரவலை தடுக்கும் நோக்கில் கட்டுப்பாடு களுடன் கூடிய ஊரடங்கு அமலுக்கு வந்துள்ளது. புதிய கட்டுப்பாடுகள் மூலம் அத்தியாவசியப் பொருட்கள் வாங்குவதற்காக காய்கறி, பால், இறைச்சி கடைகள், மளிகை உள்ளிட்ட கடைகள் மட்டும் காலை 6 மணி முதல் 10 மணி வரை செயல்பட அனுமதி அளிக்கப்பட்டுள்ளது. காலை 10 மணிக்குப் பிறகு வாகனங்களில் செல்ல தடை விதித்துள்ளதுடன் மாவட்டத்துக்குள் மற்றும் மாவட்டம் விட்டு மாவட்டம் செல்ல இ-பதிவு கட்டாயமாக்கப்பட்டுள்ளது.

எனவே, காலை 10 மணிக்குப் பிறகு காவல் துறையினர் முக்கியசாலை சந்திப்புகளில் இரும்பு தடுப்புகளை அமைத்து வாகன தணிக்கையில் ஈடுபட்டு வருகின் றனர். வேலூர் மாவட்டத்தில் முக்கிய சாலைகளில் காவல் துறையினர் பந்தல் அமைத்து வாகன ஓட்டிகளிடம் விசாரணை நடத்திய பிறகே செல்ல அனுமதி அளிக்கின்றனர்.

இந்நிலையில், வேலூர் நகரில் நடைபெறும் வாகன தணிக்கை பணிகளை வேலூர் சரக டிஐஜி காமினி நேற்று திடீர் ஆய்வு செய்தார். வேலூர் செல்லியம்மன் கோயில் அருகே நடைபெற்ற வாகன தணிக்கையை ஆய்வு செய்த அவர் செய்தியாளர்களிடம் கூறும் போது, ‘‘வேலூர் மாவட்டத்தில் மொத்தம் 45 இடங்களில் காவல் துறையினரின் வாகன தணிக்கை நடைபெற்று வருகிறது. இதில், வேலூர் உட்கோட்டத்தில் மட்டும் 26 இடங்களில் சோதனை நடை பெறுகிறது. இதில், அடையாள அட்டையுடன் அத்தியாவசிய பணிக்காக செல்பவர்கள் அடை யாள அட்டை இல்லாமல் செல்பவர்கள் என தனித்தனி பாதையில் செல்ல ஏற்பாடு செய்யப்பட் டுள்ளது.

இந்த வாகன சோதனையின் போது பொதுமக்களிடம் காவல் துறையினர் கண்ணியமாகவும், ஆவணங்களை சரியாக ஆய்வு செய்து விசாரித்து அனுப்ப வேண்டும் என கூறியுள்ளோம். வேலூர் மாவட்டத்தில் மட்டும் விதிகளை மீறி அவசியம் இல்லாமல் வெளியில் சுற்றியதாக 770 வாகனங்கள் பறிமுதல் செய்யப்பட் டுள்ளன. அவற்றை பாதுகாப்பான இடங்களில் நிறுத்தியுள்ளோம். பொதுமக்கள் தேவையில்லாமல் வெளியில் வருவதை தவிர்க்க வேண்டும். அவரவர்களின் பகுதி யில் மட்டுமே அத்தியாவசிய பொருட்களை வாங்க வேண்டும்.

இ-பதிவு முறை அமலில் இருப்பதால் மாவட்ட எல்லையில் சோதனைச்சாவடி அமைத்து விசாரித்த பிறகே அனுமதி அளிக்கப்படுகிறது. ஆந்திர மாநிலத்துடன் தொடர்புடையதாக வேலூர் மாவட்டத்தில் 6 சோதனைச் சாவடிகள், திருப்பத்தூர் மாவட் டத்தில் 4 சோதனைச் சாவடிகள் உள்ளன. இங்கு இ-பதிவு இல்லாமல் வரும் வாகனங்களை திருப்பி அனுப்பி வைக்கின்றோம்.

மேலும், முகக்கவசம் அணியா தவர்கள் மீதும் வழக்குப்பதிவு செய்யப்பட்டு வருகிறது. வேலூர், திருப்பத்தூர், ராணிப்பேட்டை, திருவண்ணாமலை என நான்கு மாவட்டங்களை உள்ளடக்கிய வேலூர் காவல் சரகத்தில் இதுவரை முகக்கவசம் அணியாத 38 ஆயிரத்து 43 பேர் மீது வழக்குப்பதிவு செய்யப்பட்டுள்ளது. சமூக இடைவெளியை பின்பற்றாத 2,657 பேர் மீது வழக்குப்பதிவு செய்யப்பட்டுள்ளது’’ என்றார்.

அப்போது, வேலூர் உட்கோட்ட உதவி காவல் கண்காணிப்பாளர் ஆல்பர்ட் ஜான் உடனிருந்தார்.