திருப்பத்தூர் அருகே - தனியார் நிறுவன ஊழியர் வீட்டில் ரூ.1 லட்சம், 3 பவுன் நகை திருட்டு :

திருப்பத்தூர் அருகே தனியார் நிறுவன ஊழியர் வீட்டில் 3 பவுன் தங்க நகை மற்றும் ரூ.1 லட்சம் திருடிய மர்ம நபர்களை காவல் துறையினர் தேடி வருகின்றனர்.

திருப்பத்தூர் மாவட்டம் குருமன்ஸ் வட்டம் பகுதியைச் சேர்ந்தவர் சுந்தரவேலு (32). இவர், கிருஷ்ணகிரி மாவட்டம் ஓசூரில் உள்ள ஒரு தனியார் நிறுவனத்தில் பணியாற்றி வருகிறார். இந்நிலையில், நேற்று முன்தினம் காலை அவர் வேலைக்கு சென்றார்.

இவரது மனைவி விஜயா (26) என்பவர், விஷமங்கலத்தில் உள்ள தனது தாயார் வீட்டுக்கு சென்றார். அன்றிரவு 10 மணியளவில் சுந்தரவேலு வீடு திரும்பினார்.

அப்போது வீட்டின் முன்பக்க கதவு திறந்து கிடந்தது. பின்னர், உள்ளே சென்று பார்த்தபோது அங்கு படுக்கை அறையில் இருந்த பீரோ உடைக்கப்பட்டு அதிலிருந்த 3 பவுன் தங்க நகை மற்றும் ரூ.50 ஆயிரம் பணம், பூஜை அறையில் இருந்த உண்டியலை உடைத்து அதிலிருந்த ரூ.50 ஆயிரம் என மொத்தம் ரூ.1 லட்சம் பணத்தை மர்ம நபர்கள் திருடிச்சென்றது தெரியவந்தது.

இதுகுறித்து திருப்பத்தூர் கிராமிய காவல் நிலையத்தில் சுந்தரவேலு புகார் அளித்தார். அதன்பேரில் காவல் துறையினர் வழக்குப்பதிவு செய்து சம்பவம் நடந்த இடத்தை பார்வையிட்டு விசாரணை நடத்தி வருகின்றனர்.