நெல்லை, தென்காசி, குமரியில் கரோனாவுக்கு 19 பேர் மரணம் :

நாகர்கோவிலில் கரோனா தொற்றை கட்டுப்படுத்தும் வகையில் வீடுகள் தோறும் சுகாதாரத்துறை சார்பில் கபசுபரக் குடிநீர் வழங்கப்பட்டது.

திருநெல்வேலி மாவட்டத்தில் 691 பேருக்கு புதிதாக நேற்று கரோனா பாதிப்பு கண்டறியப்பட்டது. இதில் திருநெல்வேலி மாநகர பகுதிகளில் மட்டும் 332 பேருக்கு தொற்று உறுதியாகியுள்ளது. வட்டாரம் வாரியாக பாதிப்பு எண்ணிக்கை விவரம்:

அம்பாசமுத்திரம்- 64, மானூர்- 45, நாங்குநேரி- 40, பாளையங்கோட்டை- 63, பாப்பாக்குடி- 4, ராதாபுரம்- 33, வள்ளியூர்- 75, சேரன்மகாதேவி- 20, களக்காடு- 15.

திருநெல்வேலி, தென்காசி மாவட்டங்களில் கரோனாவுக்கு நேற்று ஒரே நாளில் 10 பேர் உயிரிழந்துள்ளனர். திருநெல்வேலி, தென்காசி மாவட்டங்களில் நாளுக்குநாள் கரோனா பாதிப்பு அதிகரித்து வருவதுடன் உயிரிழப்பும் அதிகளவில் நிகழ்ந்து வருகின்றன. திருநெல்வேலி மாவட்டத்தில் மட்டும் நேற்று 6 பேரும், தென்காசி மாவட்டத்தில் 4 பேருமாக மொத்தம் 10 பேர் உயிரிழந்துள்ளனர். தென்காசி மாவட்டத்தில் 280 பேருக்கு நேற்று கரோனா பாதிப்பு உறுதி செய்யப்பட்டுள்ளது.

தூத்துக்குடி

தூத்துக்குடி மாவட்டத்தில் நேற்று புதிதாக 796 பேருக்கு கரோனா தொற்று இருப்பது உறுதி செய்யப்பட்டது. இதனால் மாவட்டத்தில் இதுவரை பாதிக்கப்பட்டோர் எண்ணிக்கை 27,345 ஆக அதிகரித்துள்ளது. நேற்று 699 பேர் உட்பட இதுவரை 22,791 பேர் குணமடைந்து வீடு திரும்பியுள்ளனர். தற்போது 4,393 பேர் சிகிச்சை பெற்று வருகின்றனர். கரோனாவுக்கு இதுவரை 161 பேர் உயிரிழந்துள்ளனர்.

கன்னியாகுமரி

கன்னியாகுமரி மாவட்டத்தில் தினமும் 500-க்கும் மேற்பட்டோருக்கு கரோனா தொற்று ஏற்பட்டு வருகிறது. மாவட்டம் முழுவதும் 2,127 பேர் பாதிக்கப்பட்டு சிகிச்சை பெற்று வருகின்றனர். இதுவரை மொத்தம் 24 ஆயிரம் பேர் பாதிக்கப்பட்டுள்ளனர். இவர்களில் 20,500 பேர் குணமடைந்துள்ளனர். கரோனாவுக்கு நேற்று 9 பேர் உயிரிழந்தனர்.

இந்நிலையில் கரோனா தடுப்பூசிக்கு கடும் தட்டுப்பாடு நிலவி வருகிறது. இதுவரை 90,491 பேருக்கு முதல் கட்ட தடுப்பூசியும், 31,698 பேருக்கு இரண்டாம்கட்ட தடுப்பூசியும் செலுத்தப் பட்டுள்ளது.

கரோனா தொற்றின் தீவிரத்தை கட்டுப்படுத்தும் வகையில் குமரி மாவட்ட ஆட்சியர் மா.அரவிந்த் நேற்று சுகாதாரத்துறை அதிகாரிகளுடன் ஆலோசனை மேற்கொண்டார்.

கருத்தைப் பதிவு செய்ய

லேட்டஸ்ட் அப்டேட்களுக்கு இந்து தமிழ்திசை வாட்ஸ்அப் சேனலை Follow செய்யுங்கள்...
Follow