சிறுமிக்கு பாலியல் தொல்லை இளைஞருக்கு 20 ஆண்டு சிறை :

பவானிசாகர் அருகே சிறுமிக்கு பாலியல் தொல்லை கொடுத்த வழக்கில் இளைஞருக்கு 20 ஆண்டு சிறை தண்டனை விதித்து மகளிர் விரைவு நீதிமன்றம் உத்தரவிட்டுள்ளது.

ஈரோடு மாவட்டம் பவானிசாகர் அருகே உள்ள கிராமத்தைச் சேர்ந்த 4 வயது சிறுமிக்கு, பாலியல் தொல்லை கொடுத்த வழக்கில் போக்சோ சட்டத்தின் கீழ் 17 வயது இளைஞர் கைது செய்யப்பட்டார். கடந்த 2019-ம் ஆண்டு பிப்ரவரி மாதம் இந்த சம்பவம் நடந்தது.

இந்த வழக்கு விசாரணை, ஈரோடு மகளிர் விரைவு நீதிமன்றத்தில் நடந்து வந்தது. வழக்கை விசாரித்த நீதிபதி மாலதி, குற்றவாளிக்கு 20 ஆண்டு சிறை தண்டனையும், ரூ. 5 ஆயிரம் அபராதமும் விதித்து தீர்ப்பளித்தார். பாலியல் துன்புறுத்தலால் பாதிக்கப்பட்ட சிறுமிக்கு ரூ.1 லட்சம் இழப்பீட்டுத் தொகையை தமிழக அரசு வழங்க வேண்டும் எனவும் நீதிபதி பரிந்துரைத்துள்ளார்.