ஆயிரம் ஆண்டுகள் பழமையானவை - திருப்பத்தூர் அருகே கோயிலில் 8 சிலைகள் மாயம் : சிலை கடத்தல் தடுப்பு பிரிவு போலீஸார் விசாரணை

சிவகங்கை மாவட்டம், திருப்பத்தூர் அருகே ஆயிரம் ஆண்டுகள் பழமையான இரணியூர் கோயிலில் 8 சிலைகள் மாயமானது குறித்து சென்னை சிலை கடத்தல் தடுப்புப் பிரிவு போலீஸார் வழக்குப் பதிவு செய்து விசாரித்து வருகின்றனர்.

நகரத்தாரின் 9 கோயில்களில் ஒன்றாக இரணியூர் ஆட்கொண்டநாதர் கோயில் உள்ளது. இக்கோயில் சிற்பக் கோயில் என்று அழைக்கப்படுகிறது. ஆயிரம் ஆண்டுகளுக்கு மேல் பழமையான இக்கோயில் 80 ஆண்டுகளுக்கு முன்பு சிதிலமடைந்த நிலையில் இருந்தது. 1941 - 1944 காலக்கட்டத்தில் இக்கோயிலை நகரத்தார் புதுப்பித்துக் கட்டினர்.

தற்போது இக்கோயில் அறநிலையத் துறை கட்டுப்பாட்டில் உள்ளது. இக்கோயில் செயல் அலுவலராக காரைக்குடி முத்துமாரியம்மன் கோயில் செயல் அலுவலர் சுமதி உள்ளார். அவர், 1948-ம் ஆண்டு இரணியூர் கோயில் பதிவேடுகளை ஆய்வு செய்தபோது, சோமாஸ்கந்தர், ஸ்கந்தர், பிரியாவிடை அம்மன், தனி அம்பாள், ஞானசம்பந்தர், சுந்தர மூர்த்தி, நித்திய உற்சவ சுவாமி, நித்திய உற்சவ அம்பாள் ஆகிய 8 சிலைகள் காணாமல்போனது தெரியவந்தது.

இதையடுத்து அவர் சென்னை சிலை கடத்தல் தடுப்புப் பிரிவு போலீஸில் புகார் தெரிவித்தார். அதன் பேரில் சிலை கடத்தல் தடுப்புப் பிரிவு போலீஸார் வழக்குப் பதிவு செய்து விசாரித்து வருகின்றனர்.