சிவகாசி, திருத்தங்கல், சாத்தூரில் ரயில்வே மேம்பாலங்கள் அமைக்க ரூ.67.54 கோடி ஒதுக்கீடு

சிவகாசி, திருத்தங்கல், சாத்தூர் ஆகிய மூன்று இடங்களில் புதிதாக ரயில்வே மேம்பாலம் அமைக்க முதல் கட்டமாக ரூ.67.54 கோடி நிதி ஒதுக்கி அரசு ஆணை பிறப்பித்தது.

விருதுநகர் மாவட்டத்தில் போக்குவரத்து நெரிசலைக் குறைக்கும் வகையில் சிவகாசி- சாட்சியாபுரம் ரயில்வே மேம்பாலம், சிவகாசி - திருத்தங்கல் ரயில்வே மேம்பாலம், சாத்தூர் - இருக்கன்குடி - நென்மேனி சாலை ரயில்வே மேம்பாலம் அமைக்க வேண்டும் என பொதுமக்கள் தொடர்ந்து வலியுறுத்தி வந்தனர்.

இக்கோரிக்கைகள் குறித்து முதல்வர், துணை முதல்வர் ஆகியோரின் கவனத்துக்கு அமைச்சர் கே.டி.ராஜேந்திரபாலாஜி கொண்டு சென்றார்.

இந்நிலையில், சிவகாசி - சாட்சியாபுரம் பகுதியில் புதிய ரயில்வே மேம்பாலம் அமைக்க அரசாணை வெளியிடப்பட்டுள்ளது. நில எடுப்பு மற்றும் பாலப்பணிகளுக்கு முதல் கட்டமாக ரூ.44.55 கோடி நிதி ஒதுக்கீடு செய்தும், சிவகாசி - திருத்தங்கல் பகுதியில் புதிய ரயில்வே மேம்பாலம் அமைக்க முதல் கட்டமாக ரூ.11.79 கோடி நிதி ஒதுக்கீடு செய்தும், சாத்தூர் - இருக்கன்குடி - நென்மேனி சாலை பகுதியில் புதிய ரயில்வே மேம்பாலம் அமைக்க முதல்கட்டமாக ரூ.11.20 கோடி நிதி ஒதுக்கீடு செய்தும் அரசாணை வெளியிடப்பட்டது.