பொங்கலுக்காக அறிவிக்கப்பட்ட சிறப்பு விரைவு ரயில்களில் 75% டிக்கெட் விற்று தீர்ந்தன

சென்னை: பொங்கல் பண்டிகைக்காக தென் மாவட்டங்களுக்கு தாம்பரம் - திருநெல்வேலி, சென்னை எழும்பூர் - நாகர்கோவில், நாகர்கோவில் - தாம்பரம், திருநெல்வேலி - தாம்பரம் இடையே சிறப்பு விரைவு ரயில்கள் அறிவிக்கப்பட்டுள்ளன.

இந்த சிறப்பு ரயில்களுக்கான முன்பதிவு நேற்று காலை 8 மணிக்குதொடங்கியது. ஐஆர்சிடிசி இணையதளம் மூலமாகவும், முன்பதிவு மையங்களிலும் மக்கள் ஆர்வத்துடன் முன்பதிவு செய்து வருகின்றனர்.

இதுபற்றி ரயில்வே அதிகாரிகளிடம் கேட்டபோது, ‘‘வழக்கமான விரைவு ரயில்களில் டிக்கெட் முன்பதிவு முடிந்துவிட்டது. பொங்கலுக்கு அறிவிக்கப்பட்ட சிறப்பு ரயில்களில் 25-ம் தேதி (நேற்று) காலை முதல் டிக்கெட் முன்பதிவு நடந்தது.

பொங்கல் சிறப்பு ரயில் களில் 75 சதவீத டிக்கெட்கள் விற்றுவிட்டன. தேவைப்படும் போது வழக்கமான விரைவு ரயில்களில் ஓரிரு பெட்டிகள் இணைத்து இயக்க நடவடிக்கை எடுக்கப்படும்’’ என்றனர்.