காவிரியில் அடித்துச் செல்லப்பட்ட 4 மாணவர்கள்: தேடும் பணி தீவிரம்

தஞ்சை மாவட்டம் கும்பகோணத்தில் நேற்று காவிரி ஆற்றில் 2 இடங்களில் குளிக்கச் சென்ற பள்ளி மாணவர்கள் 4 பேர் நீரில் அடித்துச் செல்லப்பட்டனர்.

தஞ்சை மாவட்டம் கும்ப கோணம் கொரநாட்டு கருப்பூரைச் சேர்ந்தவர் சித்திக். நாகை மாவட்டத்தில் அரசுப் பள்ளி ஆசிரி யராகப் பணியாற்றி வருகிறார். இவரது மகன் சல்மான்(15). கும்பகோணம் தனியார் பள்ளியில் 10-ம் வகுப்பு படித்து வந்தார். இவரது உறவினர்கள் யாசர்(14), அனிபா(14) ஆகியோர் 9-ம் வகுப்பு படித்து வந்தனர்.

இந்நிலையில், நேற்று மாலை 3 பேரும் கும்பகோணம் அருகேயுள்ள மணஞ்சேரி பகுதியில் காவிரி ஆற்றில் குளிக்கச் சென்றனர். அப்போது, 3 பேரும் தண்ணீரில் அடித்து செல்லப்பட்டனர்.

இதேபோல, நேற்று மதியம் கும்பகோணம் பழைய பாலக்கரை பகுதியில் காவிரி ஆற்றில் குளித்துக் கொண்டிருந்த சஞ்சய்(15) என்ற 10-ம் வகுப்பு மாணவரும் தண்ணீரில் அடித்து செல்லப்பட்டார். இவர்கள் நால்வரையும் தேடும் பணியில் கும்பகோணம் தீயணைப்பு வீரர்கள் தீவிரமாக ஈடுபட்டுள்ளனர்.

காவிரியில் பாசனத்துக்காக அதிக அளவு தண்ணீர் திறந்து விடப்பட்டுள்ள நிலையில், நீச்சல் தெரியாததால் நால்வரும் நீரில் அடித்துச் செல்லப்பட்டதாகக் கூறப்படுகிறது.