பராமரிப்பு பணி: காலை நேரத்தில் மின்சார ரயில்கள் ரத்து

சென்னை

சென்னையில் பராமரிப்பு பணி காரணமாகா சில மின்சார ரயில் போக்குவரத்து ரத்து செய்யப்படுவதாக தென்னக ரயில்வே அறிவித்துள்ளது. 
இதுகுறித்து தென்னக ரயில் வெளியிட்டுள்ள செய்திக்குறிப்பில் தெரிவித்துள்ளதாவது:

பராமரிப்பு பணிகள் நடைபெற உள்ளதால், இன்று குறிப்பிட்ட நேரத்தில் சில மின்சார ரயில் சேவைகள் ரத்து செய்யப்படுகின்றன. சென்னை கடற்கரை- வேளச்சேரி வழித்தடத்தில் 36 ரயில் சேவை ரத்து செய்யப்படுகிறது. இதனால், காலை 7.50 மணி முதல் மதியம் 1.50 மணி வரை மின்சார ரயில் சேவை ரத்து செய்யப்படுகிறது. மதியம் 2 மணி முதல் இந்த வழித்தடத்தில் ரயில் சேவை தொடங்கும்.

இதேபோல், சென்னை கடற்கரை - தாம்பரம் வழித்தடத்திலும் காலை 10.30 முதல் மதியம் 3.10 மணி வரை ரயில் சேவை ரத்து செய்யப்பட்டு உள்ளது. சென்னை கடற்கரை-செங்கல்பட்டு வழித்தடத்திலும் காலை 11 மணி முதல் மதியம் 1.50 மணி வரை ரயில் சேவை ரத்து செய்யப்பட்டு உள்ளது. 

இவ்வாறு தென்னக ரயில்வே கூறியுள்ளது.