எங்களுக்கு எக்ஸ்ட்ராவா இன்னொரு தொகுதி வேணும்! - பாஜக கோரிக்கையால் கதிகலங்கும் கோவை அதிமுக

அதிமுக கூட்டணியில் இம்முறை தங்களுக்கு 40 தொகுதிகளை கேட்க வேண்டும் என மனக்கணக்குப் போட்டுக் கொண்டிருக்கும் பாஜக, குறைந்தபட்சம் ஒரு மாவட்டத்துக்கு ஒரு தொகுதியையாவது கேட்டுப்பெற வேண்டும் என்ற திட்டத்திலும் இருப்பதாகச் சொல்கிறார்கள். இதில் தங்களுக்கு கூடுதல் செல்வாக்குள்ள கோவை மாவட்டத்தில் இம்முறை கூடுதலாக ஒரு தொகுதியை கேட்கவிருப்பதாக பாஜக-வினர் பேச ஆரம்பித்திருப்பது கோவை அதிமுக-வினர் வயிற்றில் புளியைக் கரைத்துக் கொண்டிருக்கிறது.

கோவை மாவட்​டத்​தில் உள்ள 10 தொகு​தி​களில் கோவை தெற்கை பாஜக-​வும் மற்ற 9 தொகு​தி​களை அதி​முக-​வும் கடந்​த​முறை கைப்​பற்​றின. அதே​போல் மக்​கள​வைத் தேர்​தலில் அதி​முக துணை​யின்றி போட்​டி​யிட்ட பாஜக-​வின் அண்​ணா​மலை, சுமார் நாலரை லட்​சம் வாக்​கு​களைப் பெற்று அதிமுக-வை மூன்​றாமிடத்​துக்கு தள்​ளி​னார்.

அதி​லும் குறிப்​பாக, கோவை வடக்​கு, கவுண்​டம்​பாளை​யம் சட்​டப் பேர​வைத் தொகு​தி​களில் அதி​முக-வை விட பாஜக-வுக்கு கூடு​தல் வாக்​கு​கள் விழுந்​தன. இதையெல்​லாம் கணக்​குப் போட்​டுத்​தான் இம்​முறை தங்​களுக்கு கோவை​யில் கூடு​தலாக இன்​னொரு தொகு​தியை ஒதுக்க வேண்​டும் என பாஜக-​வினர் கேட்க ஆரம்​பித்​திருக்​கி​றார்​கள்.

இது குறித்து நம்​மிடம் பேசிய கோவை மாவட்ட பாஜக மூத்த நிர்​வாகி​கள், “வாக்கு சதவீதம் அதி​கரிப்​புக்கு ஏற்ப கூடு​தல் தொகு​தி​களை கேட்​பது எல்லா கட்​சிகளி​லும் உள்​ளது​தான். கோவை தெற்கு பாஜக-வுக்கு சிட்​டிங் தொகுதி என்​ப​தால் இம்​முறை​யும் அதை எங்​களுக்கு ஒதுக்​கு​வ​தில் சிக்​கல் இருக்​காது. இதைத் தவிர இன்​னொரு தொகு​தியை நமக்கு கேட்​டுப்​பெற வேண்​டும் என பாஜக தலை​மையை வலி​யுறுத்தி வரு​கி​றோம்.

இன்​றைய நில​வரப்​படி கோவை தெற்​கு, வடக்​கு, கவுண்​டம்​பாளை​யம், சிங்​காநல்​லூர், மேட்​டுப்​பாளை​யம் தொகு​தி​களில் பாஜக வலு​வாக இருக்​கிறது. இதில் குறைந்​த​பட்​சம் 2 தொகு​தி​களை ஒதுக்க வேண்​டும் என்​பதே எங்​களின் எதிர்​பார்ப்​பு. கோவை வடக்கை கொடுத்​தால், வடக்​கு, தெற்கு இரண்​டிலுமே இம்​முறை நாங்​கள் நிச்​ச​யம் ஜெயிப்​போம்.

மக்​கள​வைத் தேர்​தலில் கோவை வடக்​கில் பாஜக 71,174 வாக்​கு​களும், திமுக 80,963 வாக்​கு​களும் பெற்​றன. அதி​முக 28,998 வாக்​கு​களை மட்​டுமே பெற்​றது. கவுண்​டம்​பாளை​யத்​தில் பாஜக-வுக்கு 1,04,549 வாக்​கு​களும், திமுக-வுக்கு 1,29,009 வாக்​கு​களும் கிடைத்​தன. அதி​முக 52,110 வாக்​கு​களை மட்​டுமே பெற்​றது. இந்த இரண்டு தொகு​தி​களி​லும் பாஜக இரண்​டா​மிடத்​தைப் பிடித்​துள்​ளது. மேலும், இந்​தத் தொகு​தி​களில் பாஜக-வுக்​கும் அதி​முக-வுக்​கும் விழுந்த வாக்​கு​களை கூட்​டி​னால் திமுக-வை விட அதி​கம். நாங்​கள் இந்​தத் தொகு​தி​களை குறிப்​பிட்​டுக் கேட்​ப​தற்கு இது​வும் ஒரு காரணம்” என்​ற​னர்.

கோவை மாநகர் மாவட்ட பாஜக தலை​வர் ரமேஷ்கு​மார் இதுகுறித்து நம்​மிடம், ‘‘க​வுண்​டம்​பாளை​யம், கோவை வடக்​கு, கோவை தெற்​கு, சிங்காநல்லூர் ஆகிய 4 தொகு​தி​களில் ஏதாவது இரண்டை இம்​முறை நமக்கு ஒதுக்க வேண்​டும் என தலை​மைக்கு வலி​யுறுத்​தி​யுள்​ளோம். கோவை தெற்கு சிட்​டிங் தொகுதி என்​ப​தால் அது கிடைத்​து​விடும். கூடு​தலாக கோவை வடக்கு அல்​லது கவுண்​டம்​பாளை​யம் தொகு​தியை எதிர்​பார்க்​கி​றோம்” என்​றார்.

அதி​முக கோட்​டை​யான கோவை​யில் பாஜக கூடு​தல் தொகு​தி​களை எதிர்​பார்ப்​பது அதி​முக-​வினர் மத்​தி​யில் கலக்​கத்தை உண்​டாக்கி இருக்​கிறது. காரணம், பாஜக எதிர்​பார்க்​கும் கோவை வடக்கு தொகுதி எம்​எல்​ஏ-​வாக மாநகர் மாவட்ட அதி​முக செய​லா​ளர் அம்​மன் கே.அர்ச்​சுணன் இருக்​கி​றார். இதே​போல் கவுண்​டம் பாளை​யம் தொகுதி எம்​எல்​ஏ-​வாக கோவை புறநகர் வடக்கு மாவட்ட அதி​முக செய​லா​ளர் பி.ஆர்​.ஜி.அருண்​கு​மார் இருக்​கி​றார். இவர்​கள் இரு​வ​ருமே இரண்​டாவது முறை​யாக எம்​எல்​ஏ-​வாக இருப்​பவர்​கள்.

அது​வும் 2016-ல் கோவை தெற்கு எம்​எல்​ஏ-​வாக இருந்த அம்​மன் அர்ச்​சுணன் வானதி சீனி​வாசனுக்​காக கடந்​த​முறை தனது தொகு​தியை விட்​டுக்​கொடுத்​து​விட்டு வடக்கு தொகு​திக்கு மாறி​னார். இப்​போது பாஜக-​வினர் அந்​தத் தொகு​தி​யை​யும் குறிவைப்​ப​தால் அம்​மன் அர்ச்​சுணன் கலக்​கத்​தில் இருப்​ப​தாகச் சொல்​கி​றார்​கள்.

கோவையை பொறுத்​தவரை யார் என்ன சொன்​னாலும் முன்​னாள் அமைச்​சர் எஸ்​.பி.வேலுமணி​யின் சம்​மதம் இல்​லாமல் எது​வும் நடக்​காது. எனினும் டெல்லியின் செல்லப்பிள்ளையாக இருக்​கும் அவர், பாஜக கேட்​கும் கூடு​தல் தொகு​திக்கு தலை​யாட்​டி​னாலும் ஆட்​டி​விடலாம் என்​பதே அதி​முக-​வினரின் கலக்​கத்​துக்கு அதிமுக்​கிய காரணம்!