தனி ரூட் எடுக்கிறாரா... தலைமை சொன்னதைச் செய்கிறாரா..? - சந்தேகம் எழுப்பும் அண்ணாமலையின் சாணக்கிய நகர்வுகள்!

மாநிலத் தலைவர் பதவியில் இருந்து நீக்கப்பட்ட பிறகு தீவிர கட்சி நடவடிக்கைகளில் இருந்து சற்று ஒதுங்கியே இருந்த அண்ணாமலை இப்போது திடீரென, கூட்டணியை விட்டு விலகிச் சென்ற தினகரன், ஓபிஎஸ் ஆகியோரை மீண்டும் என்டிஏ கூட்டணியில் இணைக்கிறேன் என்ற பேரில் திடீர் சந்திப்புகளை நிகழ்த்தி பரபரப்பான கருத்துகளை பேச ஆரம்பித்திருப்பது அண்ணாமலை தனி ரூட் எடுக்கிறாரோ என்ற சந்தேகத்தை எழுப்பி இருக்கிறது.

தனிக்கட்சி தொடங்கப் போகிறார், ஓபிஎஸ், டிடிவி தினகரன், சசிகலா உள்ளிட்டவர்களைச் சேர்த்துக்கொண்டு தவெக உடன் கூட்டணி வைக்க பிளான் போடுகிறார் என்றெல்லாம் அண்ணாமலை குறித்து செய்திகள் பரப்பப்படும் நிலையில், அவரது நகர்வுகளை உற்று நோக்கி வரும் அரசியல் நோக்கர்களோ, “தனிக் கட்சி ஐடியாவெல்லாம் அண்ணாமலைக்கு இல்லை. டெல்லி தலைமை என்ன சொல்லி இருக்கிறதோ அதைத்தான் அவர் இப்போது வேறு ரூட்டில் செய்து கொண்டிருக்கிறார்” என்கிறார்கள்.

இதுகுறித்து இன்​னும் விரி​வாகப் பேசிய அவர்​கள், “தமி​ழ​கத்​தில் இம்​முறை 50 தொகு​தி​களுக்கு குறை​யாமல் பாஜக போட்​டி​யிட வேண்​டும் என நினைக்​கும் அமித் ஷா, அதற்​காகத்​தான் தங்​களுக்கு 18 சதவீத வாக்கு வங்கி இருப்​ப​தாக முன்​கூட்​டியே பதிவு செய்து வைத்​திருக்​கி​றார். தங்​களுக்கு ஒதுக்​கப்​படு​வ​தில் 10 தொகு​தி​களை டிடி​வி-க்​கும் ஓபிஎஸ்​ஸுக்​கும் தரு​வது பாஜக-​வின் பிளான்.

அந்த 50 இடங்​களை பெறு​வதற்​காகவே ஒரு பக்​கம், நயி​னார் நாகேந்​திரனையும் இன்​னொரு பக்​கம், அண்​ணா​மலை​யை​யும் களத்​தில் இறக்கி இருக்கி​றார்​கள் டெல்லிவாலாக்கள். பழனி​சாமியை தங்​கள் பிடிக்​குள் வைத்​திருக்க தினகரனும் ஓபிஎஸ்​ஸும் பாஜக-வுக்கு தேவை. அதனால், அவர்​களை இழுத்து நிறுத்​தும் வேலையை அண்​ணா​மலைக்கு கொடுத்​திருக்​கிறது டெல்லி தலை​மை.

அதேசம​யம், பழனி​சாமி தரப்பை தாஜா செய்​யும் வேலையை நயி​னாருக்​குக் கொடுத்​திருக்​கிறது. ஆக, ரெண்டு பக்​க​மும் அணை​போட்டு தங்​களுக்​கான டிமாண்டை பூர்த்தி செய்து கொள்​வது​தான் பாஜக-​வின் திட்​டமே” என்​றார்​கள்.

அதி​முக - பாஜக கூட்​ட​ணிக்கு பங்​கம் விளை​விப்​ப​தாக அண்​ணா​மலை மீது அதி​முக-​வினர் இன்​ன​மும் ஆத்​திரப்​பட்​டுக் கொண்​டிருக்க, சேலத்​தில் பழனி​சாமி​யின் சொந்​தத் தொகு​தி​யிலேயே அண்​ணா​மலைக்கு ரசிகர் மன்​றம் தொடங்கி இருக்​கி​றார்​கள். தனிமனித துதியை அறவே அனு​ம​திக்​காத பாஜக தலை​மை, இதை ரசித்து அனு​ம​திக்​கவே செய்​கிறது. அதனால் தான் சேலம் மாவட்ட பாஜக தலை​வரை ரசிகர் மன்ற தொடக்க விழாவுக்கு அனுப்பி வைத்​திருக்​கி​றார்​கள்.

இதைச் சுட்​டிக்​காட்​டு​பவர்கள், “அண்​ணா​மலை​யின் அசைவு​களுக்கு பாஜக தலை​மை​யின் அனுக்​கிரஹம் இருக்​கிறது என்​ப​தற்கு இதை​விட வேறென்ன சாட்சி வேண்​டும்?” என கேள்வி எழுப்​பு​கி​றார்​கள்.

பாஜக தலை​மை​யின் விருப்​பத்​துக்கு மாறாக தனி ரூட் எடுத்​தால் அமலாக்​கத் துறை​யும் வரு​மான வரித்​துறை​யும் என்​ன​வெல்​லாம் செய்​யும் என்பது அண்​ணா​மலை அறி​யாததல்ல. அதனால் அவர் தனிக்​கட்சி தொடங்​கு​வதெல்​லாம் சாத்​தி​யமில்​லை. அதேசம​யம், “கடைசி நேரத்​தில் கூட கட்​சிகள் இடம் மாறலாம்” என அண்​மைக் கால​மாக அதி​முக தலை​வர்​கள் பொடி​வைத்​துப் பேசி வரு​கி​றார்​கள்.

அப்​படி ஏதாவது காரணத்​தைச் சொல்லி கடைசி நேரத்​தில் பாஜக-வுக்கு பைபை சொல்​லி​விட்டு அதி​முக, விஜய் பக்​கம் சாய்​வதற்​கும் சான்ஸ் இருக்கிறது. அப்​படியொரு நிலை வந்​தால் அதை சமாளிக்க பாஜக எந்த எல்​லைக்​கும் போகும். அந்த சமயத்​தில் அண்​ணா​மலை இப்​போது எடுக்​கும் சில மூவ்​களும், செங்​கோட்​டையன் - தினகரன் சந்​திப்​பு​களும் பாஜக-வு​க்கு கை கொடுக்​கலாம்​!