வழக்கறிஞர்கள் ஒழுங்கீனமாக நடந்தால் பார் கவுன்சிலில் புகார் அளிக்க வேண்டும்: உயர் நீதிமன்றப் பதிவாளருக்கு உத்தரவு

மதுரை: வழக்கறிஞர்கள் ஒழுங்கீனமாக நடந்து கொண்டால் பார் கவுன்சிலில் புகார் அளிக்க வேண்டும் என உயர் நீதிமன்ற பதிவாளருக்கு நீதிபதிகள் உத்தரவிட்டுள்ளனர்.

திருச்செந்தூரைச் சேர்ந்த ராம்குமார் ஆதித்தன், உயர் நீதிமன்ற மதுரை அமர்வில் 2020-ல் தாக்கல் செய்த மனுவில், “நீதிமன்றங்களில் ஆஜராகும் வழக்கறிஞர்கள் பார் கவுன்சில் விதிகளில் கூறப்பட்டுள்ள ஆடை கட்டுப்பாட்டை பின்பற்றவும், நீதிமன்ற புறக்கணிப்பு, ஆர்ப்பாட்டம் மற்றும் வேலைநிறுத்தங்களில் ஈடுபடும்போது வழக்கறிஞர்கள் கழுத்துப்பட்டை, அங்கி அணிய தடை விதித்தும் உத்தரவிட வேண்டும்” என்று வலியுறுத்திருந்தார்.

இந்த வழக்கு நீதிபதிகள் ஜி.ஆர்.சுவாமிநாதன், ஏ.டி.மரியகிளாட் முன்னிலையில் நேற்று விசாரணைக்கு வந்தது. அப்போது நீதிபதிகள் “வழக்கறிஞர்களுக்கான ஆடை கட்டுப்பாடு குறித்து பார் கவுன்சில் ஏற்கெனவே வழிகாட்டுதல்களை வகுத்துள்ளது.

அதில், நீதிமன்றங்களில் ஆஜராகும்போது வழக்கறிஞர்கள் நீதிமன்ற மாண்பைக் காப்பாற்ற வேண்டும் எனக் கூறப்பட்டுள்ளது. வழக்கறிஞர் ஒழுங்கீனமாக நடந்து கொண்டால், உயர் நீதிமன்ற பதிவாளர் பார் கவுன்சிலில் புகார் தெரிவிக்க வேண்டும். மனு முடிக்கப்படுகிறது" என உத்தரவிட்டனர்.

கருத்தைப் பதிவு செய்ய

லேட்டஸ்ட் அப்டேட்களுக்கு இந்து தமிழ்திசை வாட்ஸ்அப் சேனலை Follow செய்யுங்கள்...
Follow