தவெக பிரச்சார ஸ்டிக்கர்களில் ஆனந்த் படத்தை நீக்கிவிட்டு விஜய் படம் மட்டும் இடம்பெற உத்தரவு

தாராசுரத்தில் நேற்று முன்தினம் வீடுகளில் தவெகவினர் ஒட்டிய ஸ்டிக்கரில் விஜய் படத்துடன், ஆனந்த் படமும் இடம் பெற்றிருந்தது. (அடுத்த படம்) ஆனந்த் படம் இல்லாத ஸ்டிக்கர்.

கும்பகோணம்: தவெக பிரச்சார ஸ்டிக்கர்களில் புஸ்ஸி ஆனந்த் படத்தை நீக்கிவிட்டு, விஜய் படம் மட்டும் இடம் பெற வேண்டுமென தலைமை உத்தரவிட்டுள்ளதாக கட்சியினர் தெரிவித்தனர். கும்பகோணம் வட்டம் தாராசுரத்தில் தமிழக வெற்றிக் கழகத்தினர் வீடுதோறும் ‘மக்கள் விரும்பும் உங்கள் வேட்பாளர் விஜய்’ என அச்சிட்ட ஸ்டிக்கர்களை 300-க் கும் மேற்பட்ட வீடுகளில் நேற்று முன்தினம் ஒட்டினர்.

இந்த ஸ்டிக்கரில் விஜய் படத்துடன், கட்சியின் பொதுச் செயலாளர் புஸ்ஸி ஆனந்த் படமும் இடம் பெற்று இருந்தது. இந்நிலையில், ஸ்டிக்கரில் ஆனந்த் படத்தை நீக்கி விட்டு, விஜய் படம் மட்டும் உள்ள புதிய ஸ்டிக்கரை அக்கட்சியினர் அச்சிட்டு, வீடுகளில் ஏற்கெனவே ஸ்டிக்கர் ஒட்டப்பட்டிருந்த ஸ்டிக்கருக்கு மேல் ஒட்டி வருகின்றனர்.

இது தொடர்பாக தவெக தஞ்சாவூர் கிழக்கு மாவட்ட இணைச் செயலாளர் பிரபாகர் கூறியதாவது: கும்பகோணத்தில் ஒட்டப்பட்ட ஸ்டிக்கரில் ஆனந்த் படத்தை அகற்றிவிட்டு, விஜய் படத்தை மட்டும் ஸ்டிக்கரில் அச்சிட்டு, புதிய ஸ்டிக்கரை ஒட்ட வேண்டும் என கட்சித் தலைமை, உத்தரவிட்டது. அதன்படி, புதிதாக விஜய் படத்தை மட்டும் ஸ்டிக்கரில் அச்சிட்டு, ஏற்கெனவே ஒட்டிய வீடுகளுக்குச் சென்று, புதிய ஸ்டிக்கரை ஒட்டி வருகிறோம். இவ்வாறு அவர்கள் கூறினர்.