திமுக கூட்டணியில் விசிக வீழ்ச்சி அடையவில்லை: பழனிசாமிக்கு திருமாவளவன் பதில்

சென்னை: திமுக கூட்டணியில் இருந்து விசிக வளர்ச்சியடைந்து இருக்கிறதே தவிர, வீழ்ச்சி அடையவில்லை என அக்கட்சித் தலைவர் திருமாவளவன் தெரிவித்தார்.

சென்னையில் செய்தியாளர்களிடம் அவர் கூறிய: “அதிமுகவை பாஜக விழுங்குவிடும் என மீண்டும் மீண்டும் பொறுப்புணர்வுடனும், கவலையோடும், அதிமுக பாதுகாப்போடு இருக்க வேண்டும் என்ற நல்லெண்ணத்திலும் சுட்டிக் காட்டினோம். ஆனால், அதை அப்படியே திருப்பி விசிகவை திமுக விழுங்கிவிடும் என அதிமுக பொதுச் செயலாளர் பழனிசாமி பேசியிருக்கிறார். அவருக்கு இப்படித்தான் பேச வேண்டும் என யாரோ சொல்லி தருகிறார்கள். அவராகவே இப்படி சொல்கிறார் என்பதை ஏற்க முடியவில்லை.

அதிமுகவுக்கு எதிராக நான் பேசுகிறேன் என்று அவர் நினைப்பதாக கருதுகிறேன். நான் எதற்காக சொல்கிறேன் என்பதை கட்டாயம் நன்கு உணர்வார்கள். சேராத இடத்தில் சேர்ந்திருக்கும் சூழலில், இப்படியெல்லாம் பேசுகிறார். இதுகுறித்து வருத்தப்பட ஏதுமில்லை. 2001-ம் ஆண்டில் இருந்து ஓரிரு பொதுத் தேர்தல்களை தவிர திமுகவுடன் தான் விசிக பயணிக்கிறது.

மெல்ல மெல்ல வளர்ச்சியடைந்து மாநில கட்சியாக அங்கீகாரம் பெற்றிருக்கிறது. வளர்ச்சியடைந்து இருக்கிறதே தவிர வீழ்ச்சியடையவில்லை. இதை பழனிசாமி திரித்து பேசுவதற்கு என்ன காரணம் என தெரியவில்லை” என்று கூறினார்.