திருவள்ளூர் சரக்கு ரயில் விபத்து: பெட்ரோல், டீசல் நிரப்பிய 18 டேங்கர்கள் தீக்கிரை - நடந்தது என்ன?

திருவள்ளூர்/ சென்னை: சென்​னை​யில் இருந்து பெட்​ரோல், டீசல் ஏற்​றிச் சென்ற சரக்கு ரயில் நேற்று அதி​காலை திரு​வள்​ளூரில் தடம் புரண்டு பயங்கர தீ விபத்து ஏற்​பட்​டது. இதில், 18 டேங்​கர்​கள் எரிந்து நாச​மாகின. இந்த விபத்தால், விரைவு ரயில், புறநகர் மின்​சார ரயில் சேவை கடுமை​யாக பாதிக்​கப்​பட்​டது.

சென்னை துறை​முகத்​தில் இருந்து 2 இன்​ஜின்​கள் கொண்ட சரக்கு ரயில், நேற்று அதி​காலை 3 மணி அளவில் வாலாஜா சைடிங் நிலை​யத்​துக்கு புறப்​பட்​டது. தலா 70 ஆயிரம் லிட்​டர் கொள்​ளளவு கொண்ட 45 டேங்கர்​களில் டீசலும், 5 டேங்கர்​களில் பெட்​ரோலும் நிரப்​பப்​பட்​டிருந்​தது. நேற்று அதி​காலை 4.55 மணி அளவில் திரு​வள்​ளூர் ரயில் நிலை​யத்தை கடந்து சென்​ற​போது, 2 இன்​ஜின்​கள், ஒரு டேங்கர் ஆகியவை திடீரென தனி​யாக பிரிந்​த​தாக கூறப்​படு​கிறது. இதனால், ரயில் நிலை தடு​மாறி, 18 டேங்கர்​கள் அடுத்​தடுத்து தடம்​புரண்​டன. பெட்​ரோல், டீசல் நிரப்​பிய டேங்கர்​கள் ஒன்​றோடு ஒன்று மோதி​ய​தில் திடீரென தீப்​பற்​றிக்​கொண்​டது. மளமளவென மற்ற டேங்கர்​களுக்​கும் தீ பரவிய​தில், டேங்கர்​கள் வெடித்து சிதறின. இதனால், பல அடி உயரத்​துக்கு நெருப்பு கொழுந்​து​விட்டு எரிந்​தது.

திரு​வள்​ளூர் ரயில் நிலைய மேலா​ளர் உடனடி​யாக ரயில் பாதை​யில் செல்​லும் உயர்​நிலை மின் இணைப்பை துண்​டித்​தார். ரயில்வே அதி​காரி​கள் கொடுத்த தகவலின்​பேரில், திரு​வள்​ளூர், திரு​வூர், தேர்​வாய் கண்​டிகை சிப்​காட், ஸ்ரீபெரும்​புதூர், அம்​பத்​தூர் உள்​ளிட்ட பகு​தி​களில் இருந்து 15-க்​கும் மேற்​பட்ட தீயணைப்பு வாக​னங்​கள் விரைந்து வந்​தன. ரசாயன நுரை மற்​றும் தண்ணீரை பீய்ச்சியடித்து, தீயை அணைக்​கும் பணி​யில் வீரர்​கள் ஈடு​பட்​டனர். பெட்​ரோல், டீசல் அதிக அளவில் சிதறிய​தால் ஆங்​காங்கே தீ எரிந்​த​படி இருந்​தது.

மக்கள் பாதுகாப்பாக வெளியேறினர்: அருகே குடி​யிருப்பு பகு​தி​கள் இருந்​த​தால், பதற்​றம் ஏற்​பட்​டது. திரு​வள்​ளூர் மாவட்ட ஆட்​சி​யர் பிர​தாப், எஸ்​.பி. சீனி​வாசபெரு​மாள் தலை​மை​யில் வரு​வாய் துறை​யினர், போலீ​ஸார், மின்​வாரிய அதி​காரி​கள் விரைந்து வந்​து, விபத்து பகுதி அருகே மின் இணைப்பை துண்​டித்​தனர். அப்​பகு​தி​யில் வசிக்​கும் 50 இருளர் குடும்​பங்​களை சேர்ந்​தவர்​கள் உடனடி​யாக அங்​கிருந்து அப்​புறப்​படுத்​தப்​பட்​டு, திரு​வள்​ளூர் பெரியகுப்​பம் பகு​தி​யில் முகாம்​களில் தங்க வைக்​கப்​பட்​டனர்.

தெற்கு ரயில்வே சென்னை கோட்ட மேலா​ளர் விஸ்​வ​நாத் ஈர்யா தலை​மையி​லான ரயில்வே அதி​காரி​கள், ரயில்வே ஊழியர்​கள், அரக்​கோணத்​தில் இருந்து வந்த 60 பேர் கொண்ட 2 தேசிய பேரிடர் மீட்பு குழு​வினர் விரைந்து வந்​து, தீயில் சிக்​காத 32 டேங்கர்​கள், ரயில் இன்​ஜின்​களை அகற்​றி, பாது​காப்​பாக வேறு இடத்​துக்கு கொண்டு சென்​றனர். தீயணைப்பு வீரர்​கள் 11 மணி நேரம் கடுமை​யாக போராடிய நிலை​யில், மாலை 4 மணி அளவில் தீயை அணைத்​தனர். தொடர்ந்​து, சேதமடைந்த ரயில் பாதைகள், உயர்​நிலை மின்​கம்​பிகளை சீரமைக்​கும் பணி​யில் ரயில்வே அதி​காரி​கள், ஊழியர்​கள் ஈடு​பட்​டனர். இப்பணிமாலை 6 மணிக்கு பிறகும் நீடித்தது.

இந்த விபத்​தில், டீசல் நிரப்பிய 14 டேங்கர்கள், பெட்ரோல் நிரப்பிய 4 டேங்கர்கள் முற்​றி​லும் நாச​மாகின. அந்த டேங்கர்​களில் இருந்த சுமார் ரூ.12 கோடி மதிப்​பிலான பெட்​ரோல், டீசல் எரிந்து நாச​மான​தாக தீயணைப்பு துறை​யினர் தரப்​பில் தெரிவிக்​கப்​பட்​டுள்​ளது. அமைச்​சர் சா.​மு.​நாசர், தெற்கு ரயில்வே பொது மேலா​ளர் ஆர்​.எம்​.சிங் ஆகியோர் வந்​து, சீரமைப்பு பணி​களை பார்​வை​யிட்​டனர். தமிழக ரயில்வே காவல் துறை ஐ.ஜி. பாபு, காவல் கண்​காணிப்​பாளர் ஈஸ்​வரன் ஆகியோர் ஆய்வு செய்​தனர். தமிழக ரயில்வே காவல் துறை ஏடிஜிபி தலை​மையி​லான 3 தனிப்​படை​யினர் விபத்து குறித்து விசா​ரணை நடத்​துகின்​றனர். விபத்து குறித்து விசா​ரிக்க விசா​ரணை குழுவை அமைத்து தெற்கு ரயில்வே பொது மேலா​ளர் ஆர்​.என்.சிங் உத்​தர​விட்​டுள்​ளார்.

79 ரயில் சேவைகள் பாதிப்பு: சரக்கு ரயில் தீ விபத்​தால், சென்னை - அரக்​கோணம் மார்க்​கத்​தில் விரைவு ரயில், புறநகர் மின்​சார ரயில் சேவை நேற்று கடுமை​யாக பாதிக்​கப்​பட்​டது. சென்னை சென்ட்​ரல் - மைசூரு வந்தே பாரத் விரைவு ரயில், சதாப்தி விரைவு ரயில், கோவை விரைவு ரயில், சதாப்தி விரைவு ரயில், திருப்​ப​தி சப்​தகிரி விரைவு ரயில் உட்பட 8 ரயில்​கள் ரத்து செய்​யப்​பட்​டன. காச்​சிகுடா - செங்​கல்​பட்டு விரைவு ரயில் உட்பட 8 ரயில்​கள் மாற்​றுப் பாதை​யில் திருப்​பி​விடப்​பட்​டன.

நேற்று மாலை 6 மணி நில​வரப்​படி, 79 விரைவு ரயில்​களின் சேவை பாதிக்​கப்​பட்​டது. புறநகர் மின்​சார ரயில் சேவை​யும் கடுமை​யாக பாதிக்​கப்​பட்​டதால், பயணி​கள் கடும் அவதிக்கு ஆளாகினர். ரயில் சேவை பா​திக்​கப்​பட்​டதால், அரசு போக்​கு​வரத்து கழகம்
(விழுப்​புரம் கோட்​டம்) சார்​பில் காட்பாடி, குடி​யாத்​தம்​, அரக்​கோணம்​,திரு​வள்​ளூர்​, திருத்​தணி ரயில்​ நிலையங்​களில்​ இருந்​து 270-க்​கும் மேற்​பட்​ட சிறப்​பு பேருந்​துகள்​ இயக்கப்​பட்​டன.