வாரிசு அரசியலுக்காக துரோகி பட்டம் கட்டுகிறார் வைகோ: மல்லை சத்யா வேதனை

சென்னை: வாரிசு அரசியலுக்காக துரோகி பட்டம் கட்டுகிறார் என மதிமுக பொதுச்செயலாளர் வைகோ குற்றச்சாட்டு குறித்து துணை பொதுச்செயலாளர் மல்லை சத்யா வேதனை தெரிவித்துள்ளார். மதிமுக துணை பொதுச்செயலாளர் மல்லை சத்யா மற்றும் முதன்மைச் செயலாளர் துரை வைகோ இடையேயான பனிப்போர் அண்மையில் மூத்த நிர்வாகிகள் மத்தியில் முடித்து வைக்கப்பட்டது.

இருப்பினும் அது தொடர்ந் ததாகவே தெரிகிறது. இது பொதுச்செயலாளர் வரை மீண்டும் சென்ற நிலையில், கடந்த ஜூன் 29-ம் தேதி நடைபெற்ற மதிமுக நிர்வாகக் குழு கூட்டத்தில், மல்லை சத்யாவை வைகோ கடுமையாக விமர்சித்ததாகவும், அவரை விடுதலைப் புலிகள் இயக்கத்தில் பிரபாகரனுக்கு துரோகம் செய்த மாத்தையாவுடன் ஒப்பிட்டுப் பேசியதாகவும் கூறப்படுகிறது. இதன் தொடர்ச்சியாக பூந்தமல்லியில் நேற்று நடைபெற்ற செயல்வீரர்கள் கூட்டத்தில் மல்லை சத்யாவின் புகைப்படம் முற்றிலும் தவிர்க்கப்பட்டிருந்தது.

குழப்பம் ஏற்படுத்த முயற்சி இந்நிலையில், மல்லை சத்யா குறித்து சென்னை விமான நிலையத்தில் செய்தியாளர்களிடம் மதிமுக பொதுச்செயலாளர் வைகோ கூறியதாவது: மல்லை சத்யாவை என் உடன்பிறவாத தம்பியைப் போல நடத்தி வந்தேன். மதிமுகவுக்கு ஏற்கெனவே துரோகம் இழைத்து, கட்சியை பாழ்படுத்தலாம் என்று நினைத்து வெளியேறிய சிலரோடு நெருக்கமாக அவர் தொடர்பு வைத்துள்ளார். என்னைப் பற்றி சமூக வலைதளங்களில் மோசமான வகைகள் பதிவிடும் நபர்களுடனும் நெருக்கமாகப் பழகி வருகிறார். இவர் கொடுக்கும் தகவல்களை தான் அவர்கள் பதிவிடுகின்றனர்.

இதை ஆதாரத்துடன் என்னிடம் நிர்வாகிகள் கூறினர். 7 முறை வெளி நாடுகளுக்கு சென்றபோது கூட அவர் மதிமுக துணை பொதுச்செயலாளர் என்று குறிப்பிட வில்லை. என் பெயரையும் எங்கேயும் உச்சரிக்கவில்லை. மதிமுகவுக்குள்ளேயே குழப்பத்தை ஏற்படுத்த முயற்சித்தார். அது நடக்கவில்லை. இந்த விவகாரம் மதிமுகவுக்கு பெரிய சோதனையாக வரக்கூடாது என்பதை தெளிவுபடுத்துவதற்காக நிர்வாகக் குழுவில் எடுத்துரைத்தேன். இதற்கு, மேல் மல்லை சத்யா, அவர் விருப்பப்படி நடந்து கொள்ளலாம் என்றும் தெரிவித்தேன்.

பின்னணியில் திமுக இல்லை அவர் மீது நடவடிக்கை எடுக்க வேண்டும் என கட்சியினர் வலியுறுத்தினாலும், நான் எடுக்கவில்லை. என் உயிரைக் காப்பாற்றிய, கட்சிக்கு விசுவாசமாக இருந்த மல்லை சத்யா, கடந்த 2 ஆண்டுகளாக அப்படியே தலைகீழாக ஏன் மாறினார்? அவர் பட்டியலினத்தவர் என்பதால் ஒதுக்கப்படுவதாகவும் செய்தி பரப்பினார். இந்த விவகாரத்தில் திமுக பின்னணியில் இருப்பதாகக் கூற முடியாது. மதிமுகவின் முத்துரத்தினம், முன்னாள் அமைச்சர் செந்தில் பாலாஜி வற்புறுத்தியதன் பேரில் திமுகவில் சேர்க்கப்பட்டார். மதிமுகவில் எந்த நெருக்கடியும் ஏற்படவில்லை. இவ்வாறு அவர் தெரிவித்தார்.

இதுகுறித்து மல்லை சத்யா, ‘‘குடும்ப அரசியலை எதிர்த்து கட்சி தொடங்கிய வைகோ, துரை வைகோவுக்காக எனக்கு துரோகி பட்டம் கொடுத்து வெளியேற்றப் பார்க்கிறார். வைகோவின் உயிரை 3 முறை காப்பாற்றிய என்னை வாரிசு அரசியலுக்காக துரோகி என சொல்லும் அளவுக்கு துணிந்துள்ளார்’’ என வருத்தம் தெரிவித்ததாக அவரது ஆதரவாளர்கள் தெரிவித்தனர். இதற்கிடையே, மல்லை சத்யா தலைமையில் மதிமுகவுக்குள் ளேயே மற்றொரு அணி வளர்ந்து வருவதாகவும், திமுக, தவெக, பாஜக போன்ற மாற்றுக் கட்சியில் இணைவது தொடர்பாக அவர் ஆலோசித்து வருவதாகவும் அரசியல் வட்டாரத்தில் பேசப்படுகிறது.