தமிழகத்தை சேர்ந்தவர்கள் இஸ்ரேல், ஈரான் நாடுகளில் இருந்து பாதுகாப்பாக நாடு திரும்ப அரசு ஏற்பாடு

இஸ்ரேல்- ஈரான் இடையே போர் நடைபெற்று வரும் சூழலில் அந்நாடுகளில் வசிக்கும் தமிழகத்தைச் சேர்ந்தர்கள் பாதுகாப்பாக மாநிலம் திரும்ப முதல்வர் மு.க.ஸ்டாலின் நடவடிக்கை எடுத்துள்ளார். இதற்காக 24 மணி நேரம் இயங்கக்கூடிய பிரத்யேக கட்டுப்பாட்டு அறை டெல்லியில் அமைக்கப்பட்டுள்ளது.

இதுதொடர்பாக தமிழக அரசு நேற்று வெளியிட்ட செய்திக்குறிப்பில் கூறியிருப்பதாவது: இஸ்ரேல்- ஈரான் இடையே தற்போது ஏற்பட்டுள்ள போர் காரணமாக அந்நாடுகளில் வசிக்கும் தமிழர்கள் பாதுகாப்பாக இருக்க வேண்டும் என்ற நோக்கத்தோடு அயலகத் தமிழர் நலன் மற்றும் மறுவாழ்வுத் துறையை அங்குள்ள தமிழர்களின் விவரங்களைப் பெற்று உடனடியாக அவர்களுக்கு உடனடியாக தேவைப்படும் அனைத்து உதவிகளையும் வழங்க தமிழக முதல்வர் மு.க.ஸ்டாலின் ஆணையிட்டுள்ளார்.

இந்தச் சூழலில் ஈரான் நாட்டிலிருந்து இந்திய வெளியுறவுத் துறை மூலமாக இந்தியர்கள் தாயகம் திரும்பத் தொடங்கியுள்ளனர். அவர்களில் தமிழகத்தை சேர்ந்தவர்களை கண்டறிந்து தமிழகத்துக்கு பாதுகாப்பாக அழைத்து வரும் பணி முடுக்கி விடப்பட்டுள்ளது. மேலும், அங்குள்ள நிலைமை தொடர்ந்து கண்காணிக்கப்பட்டு, தமிழர்களுக்கு தேவைப்படும் உதவிகளை செய்ய தமிழக அரசு தயார் நிலையில் உள்ளது.

இதற்கென டெல்லி தமிழ்நாடு இல்லத்தில் 24 மணி நேரமும் இயங்கும் கட்டுப்பாட்டு அறை அமைக்கப்பட்டுள்ளது. அந்த அறையின் உதவி எண்கள் அறிவிக்கப்பட்டுள்ளது. தொலைபேசி எண்: 011 24193300 (Land line), செல்போன் எண்: 9289516712 (Mobile Number with Whatsapp) மின்னஞ்சல்: tnhouse@tn.gov.in, procofficetnh@gmail.com ஆகியவைகளாகும். அதுமட்டுமின்றி சென்னையில் உள்ள அயலகத் தமிழர் நலன் மற்றும் மறுவாழ்வுத் துறை ஆணையரகத்தில், செயல்பட்டுவரும் 24 மணி நேர, கட்டணமில்லா உதவி எண்களை தொடர்பு கொள்ளவும். தங்கள் பகுதியில் உள்ள இந்திய தூதரகம் வெளியிடும் அறிவுறுத்தல்களை பின்பற்றி பாதுகாப்பாக இருக்கவும் கேட்டுக்கொள்ளப்படுகிறார்கள். உதவி எண்கள் விவரம்: இந்தியாவுக்குள் 1800 309 3793 என்ற எண்ணையும் வெளிநாடு என்றால் +91 8069009901 / 08069009901 / +91 8069009900 / 08069009900 (Missed Call) ஆகிய எண்களையும் nrtchennai@tn.gov.in / nrtchennai@gmail.com என்ற மின்னஞ்சல் முகவரியிலும் தொடர்பு கொள்ளலாம். இவ்வாறு அதில் கூறப்பட்டுள்ளது.