Published : 19 Jun 2025 09:56 AM
Last Updated : 19 Jun 2025 09:56 AM
2026-ல் அதிமுகவுக்கு நிலைக்குமா நிலக்கோட்டை? - வரிந்து கட்டி வேலை செய்யும் திமுக!
திண்டுக்கல் மாவட்டத்தில் உள்ள 7 சட்டமன்றத் தொகுதிகளில் திண்டுக்கல், நத்தம், நிலக்கோட்டை (தனி) தொகுதிகளை இப்போது அதிமுக தன்வசமாக்கி வைத்திருக்கிறது. இதில், சுமார் அரை நூற்றாண்டு காலமாக வென்றெடுக்க முடியாமல் இருக்கும் நிலக்கோட்டையை வென்றெடுக்க இம்முறை திட்டம் வகுத்து செயலாற்றி வருகிறது திமுக.
நிலக்கோட்டை தொகுதியானது காங்கிரஸ் பாரம்பரியமிக்க தொகுதி. 1952, 1957, 1962-ம் ஆண்டு தேர்தல்களில் இங்கு காங்கிரஸே கொடி நாட்டி இருக்கிறது. 1967-ல் தான் திமுக இங்கு முதல்முறையாக வாகை சூடியது. அதற்கு அடுத்து வந்த தேர்தலிலும் திமுக-வுக்கு நிலக்கோட்டை நிலைத்தது. அதுதான் இந்தத் தொகுதியில் திமுக கடைசியாக வென்ற தேர்தல். அதன் பிறகு இங்கு சூரியனுக்கு வேலையே இல்லாமல் போய்விட்டது.
1977-ல் முதல் முறையாக நிலக்கோட்டையை அதிமுக கைப்பற்றியது. 1980-ல் காங்கிரஸ் கட்சியைச் சேர்ந்த ஏ.எஸ்.பொன்னம்மாள் இங்கே சுயேச்சையாக போட்டியிட்டு வெற்றி பெற்றார். 1984-ல் மீண்டும் இங்கு அதிமுக வென்றது. அதன் பிறகு வந்த தேர்தல்களில் எல்லாம் திமுக-வும் அதிமுக-வும் இந்தத் தொகுதியை தங்களின் கூட்டணி தோழனான காங்கிரஸுக்கும் தமாகா-வுக்கும் ஒதுக்கிவிட்டன. 1989-ல் தனித்துப் போட்டியிட்டு வென்ற காங்கிரஸ் வேட்பாளரான எஸ்.ஏ.பொன்னம்மாள், 1991, 1996 தேர்தல்களில் அதிமுக, திமுக கூட்டணிகளில் காங்கிரஸ் மற்றும் தமாகா வேட்பாளராக நின்று வென்றார்.
2001 மற்றும் 2006 தேர்தல்களில் அதிமுக-வே நிலக்கோட்டையில் நேரடியாக களமிறங்கி வென்றது. 2011-ல் தமது கூட்டணிக் கட்சியான புதியதமிழகம் கட்சிக்கு இந்தத் தொகுதியை விட்டுக் கொடுத்தது அதிமுக. அதிமுக செல்வாக்கில் அப்போது புதிய தமிழகமும் இங்கு வென்றது. அதனைத் தொடர்ந்து 2016 மற்றும் 2019 இடைத்தேர்தல், 2021 ஆகிய தேர்தல்களிலும் நிலக்கோட்டையை கெட்டியாக தக்கவைத்துக் கொண்டது அதிமுக.
திமுக கூட்டணியில் நிலக்கோட்டையை காங்கிரஸுக்கு ஒதுக்கிய போதெல்லாம் இங்கு திமுக கூட்டணிக்கு வெற்றி கிடைத்திருக்கிறது. அதுவே, திமுக களமிறங்கினால் தோல்வியே மிஞ்சி இருக்கிறது. அந்தளவுக்கு கெட்டிக்காரத்தனமாக வாக்களித்து வந்திருக்கிறார்கள் நிலக்கோட்டை தொகுதி மக்கள். இதனால் 1971-க்குப் பிறகு சுமார் 50 ஆண்டுகளுக்கும் மேலாக நிலக்கோட்டையை வென்றெடுக்க முடியாமல் போராடுகிறது திமுக. காங்கிரஸ் எம்எல்ஏ-வான பொன்னம்மாளின் காலத்தில் நிலக்கோட்டைத் தொகுதிக்கு மகளிர் கலைக்கல்லூரியை தந்தார் கருணாநிதி. ஆனால், அப்படிச் சொல்லிக் கொள்ளும்படியான எந்தவொரு திட்டத்தையும் நிலக்கோட்டைக்கு அதிமுக தராத போதும் இரட்டை இலை மீது அசைக்கமுடியாத பற்று வைத்திருக்கிறார்கள் இத்தொகுதி மக்கள்.
கடந்த முறை நிலக்கோட்டை ஊராட்சி ஒன்றிய தலைவராக அதிமுக வேட்பாளரே வெற்றிபெற்றார். நம்பிக்கையில்லா தீர்மானம் கொண்டு வந்து அவரை பதவி நீக்கம் செய்ய திமுக-வினர் எவ்வளவோ முயற்சி செய்தும் அது முடியாமல் போனது. இத்தனைக்கும் ஊரக வளர்ச்சித் துறை அமைச்சர் ஐ.பெரியசாமியின் சொந்த ஊரான வத்தலகுண்டு இந்த நிலக்கோட்டை தொகுதிக்குள் தான் வருகிறது. இருப்பினும் இங்கே சூரியனை உதிக்கவைக்க முடியவில்லை. இந்த நிலையில், வழக்கம் போல கூட்டணிக்கு தள்ளிவிடாமல் இம்முறை இங்கு தங்கள் வேட்பாளரையே களமிறக்க திமுக தலைமை திட்டமிட்டிருப்பதாகச் சொல்கிறார்கள்.
இது குறித்து நம்மிடம் பேசிய நிலக்கோட்டை மேற்கு ஒன்றிய திமுக செயலாளர் கரிகால் பாண்டியன், “தலைமையின் உத்தரவுப்படி நிலக்கோட்டை தொகுதியை வென்றெடுப்பதற்கான பணிகளை முன்கூட்டியே தொடங்கிவிட்டோம். அதற்காக, ஏற்கெனவே இந்தத் தொகுதிக்குள் இருந்த திமுக-வின் இரண்டு ஒன்றியங்கள் இப்போது ஐந்தாக பிரிக்கப்பட்டுவிட்டன. இதன் மூலம் பொறுப்புகளை பகிர்ந்தளித்து புதிய பொறுப்பாளர்கள் மூலமாக தேர்தல் பணிகள் முழுவீச்சில் நடந்து வருகின்றன. இது அதிமுக-வுக்கு சாதகமான தொகுதி என சொல்லப்பட்ட நிலையில், 2024 மக்களவை தேர்தலில் இந்தத் தொகுதியில் திமுக கூட்டணிக்கு 54 ஆயிரம் வாக்குகள் கூடுதலாக கிடைத்தன. இதுவே மாற்றத்துக்கான அறிகுறிதான். எனவே, 2026-ல் நிலக்கோட்டையை எளிதில் கைப்பற்றுவோம்” என்றார்.
நிலக்கோட்டை ஒன்றிய அதிமுக செயலாளர் யாகப்பனோ, “நிலக்கோட்டை தொகுதி மக்களின் நல்லது, கெட்டது அனைத்திலும் குடும்பத்தில் ஒருவராக நாங்கள் பங்கெடுத்து வரு கிறோம். அதனால் தான் தேர்தலுக்குத் தேர்தல் எங்களை கூடுதல் வாக்குகள் வித்தியாசத்தில் மக்கள் ஜெயிக்க வைத்து வருகிறார்கள். கடந்த தேர்தலில் திமுக கூட்டணி பெருவாரியாக வெற்றிபெற்ற நிலையிலும் இந்தத் தொகுதியில் அதிமுக சுமார் 27 ஆயிரம் வாக்குகள் வித்தியாசத்தில் ஜெயித்தது. அதன் பிறகும் திமுக அமைச்சர்கள் யாரும் இந்தப் பக்கம் எட்டிப்பார்கவில்லை. அதனால் இந்தத் தேர்தலிலும் நிலக்கோட்டையில் இரட்டை இலைக்கே மக்கள் ஜெயம் கொடுப்பார்கள். அதை யாராலும் மாற்ற முடியாது” என்றார்.
லேட்டஸ்ட் அப்டேட்களுக்கு இந்து தமிழ்திசை வாட்ஸ்அப் சேனலை Follow செய்யுங்கள்...
Follow
FOLLOW US
தவறவிடாதீர்!
Sign up to receive our newsletter in your inbox every day!
WRITE A COMMENT