புதுச்சேரி கடலில் ராட்சத அலையில் சிக்கிய கல்லூரி மாணவர்கள் இருவர் மீட்பு

புதுச்சேரி: புதுச்சேரி கடலில் ராட்சத அலையில் சிக்கிய கல்லூரி மாணவர்கள் இருவரை இன்று மீட்கப்பட்டனர். இதனிடையே, கடற்கரை கற்களில் சிக்கிய ஒடிசா நபரை போலீஸார் மீட்டனர்.

புதுவை கடல் ஆபத்தான பகுதியாக அறிவிக்கப்பட்டுள்ளது. புதுவை கடலில் தோன்றக்கூடிய பெரிய அலைகள் குளிப்பவர்களை கடலுக்குள் இழுத்து சென்று விடுகிறது. இதனால் கடல் அழகை ரசித்து குளிக்கும் சுற்றுலா பயணிகள் பலர் மரணமடைந்துள்ளனர். இதையடுத்து புதுவை கடற்கரைகளில் ஆபத்தான கடல் பகுதி, குளிக்க வேண்டாம் என எச்சரிக்கை பலகைகள் வைக்கப்பட்டுள்ளது. இந்த எச்சரிக்கையை அலட்சியப்படுத்தி, சுற்றுலா வரும் இளைஞர்கள் தொடர்ந்து குளித்து வருகின்றனர். அப்போது கடல் அலைகளில் சிக்குபவர்களை காப்பாற்ற சுற்றுலா கடலோர பாதுகாவலர்கள் (லைப் கார்டு) நியமிக்கப்பட்டுள்ளனர். இவர்கள் கடல் அலையில் சிக்கியவர்களை காப்பாற்றி வருகின்றனர்.

இந்த நிலையில், கிருஷ்ணகிரி மாவட்டத்தை சேர்ந்தவர் லோகேஷ் (வயது 21) என்ற கல்லூரி மாணவர் தனது நண்பர் ஹேமநாதனுடன் (21) நேற்று இரவு புதுவைக்கு சுற்றுலா வந்தார். புதுவையில் இன்று பாண்டி மெரீனா கடற்கரைக்கு சென்றார். அங்கு கடல் அலையில் கால்களை நனைத்து விளையாடி கொண்டிருந்தனர்.

அப்போது கடலுக்குள் சிறிது தூரம் சென்றனர். அப்போது ராட்சத அலை அவர்களை சுருட்டி கடலுக்குள் இழுத்து சென்றது. இதைக் கண்ட சுற்றுலா கடலோர பாதுகாவலர்கள் உடனடியாக ஓடிச்சென்று கடலில் குதித்து அவர்களை காப்பாற்றினர். தொடர்ந்து அவர்களை ஒதியஞ்சாலை போலீசில் ஒப்படைத்தனர். போலீஸார் அவர்களை எச்சரித்து அனுப்பி வைத்தனர்.

கடற்கரை கற்களில் கால் சிக்கி பரிதவித்த ஒடிசா தொழிலாளி: புதுவை நகராட்சி அலுவலகம் எதிரே ஒடிசாவை சேர்ந்த தொழிலாளி அமர்ந்திருந்தார். மது போதையில் இருந்த அவர் கற்கள் கொட்டிய பகுதியில் அமர்ந்திருந்தபோது, திடீரென அவரின் கால் கற்களின் இடுக்கில் சிக்கியது. இதனால் அவர் காலை எடுக்க முடியாமல் அலறினார். இதைக்கண்ட சுற்றுலா பயணிகள் உடனடியாக காவல்துறைக்கு தகவல் கொடுத்தனர்.

போலீஸார் அங்கு வந்து சுற்றுலா பயணிகளுடன் இணைந்து தொழிலாளியின் காலை கற்களில் இருந்து மீட்டனர். தொடர்ந்து அவரை அங்கிருந்து தூக்கி மணல் இருக்கும் பகுதியில் அமர்த்தினர். அங்கு அவருக்கு தண்ணீர் கொடுத்து ஆசுவாசப்படுத்தினர். பின்னர் அவரை போலீஸார் எச்சரித்து அனுப்பி வைத்தனர்.