பாரதிய ஜனதாவுக்கு எதிராக அனைத்து மதச்சார்பற்ற சக்திகளையும் அணிதிரட்ட வேண்டும்: பிரகாஷ்காரத் வலியுறுத்தல்

மதுரை: பாஜவுக்கு எதிராக நாட்டில் உள்ள அனைத்து மதச்சார்பற்ற சக்திகளையும் அணிதிரட்ட வேண்டும் என்று மதுரையில் நேற்று தொடங்கிய மார்க்சிஸ்ட் கம்யூனிஸ்ட் கட்சியின் தேசிய மாநாட்டில், அக்கட்சியின் அரசியல் பணிக்குழு ஒருங்கிணைப்பாளர் பிரகாஷ்காரத் கூறினார்.

மார்க்சிஸ்ட் கம்யூனிஸ்ட் கட்சியின் 5 நாள் அகில இந்திய 24-வது மாநாடு தமுக்கம் மைதானத்தில் நேற்று காலை தொடங்கியது. திரிபுரா மாநில முன்னாள் முதல்வர் மாணிக்க சர்க்கார் தலைமை வகித்தார். கட்சியின் மூத்த தலைவர் பிமான் பாசு கொடியேற்றினார். முன்னாள் மாநிலச் செயலாளர் கே.பாலகிருஷ்ணன் வரவேற்றார். அரசியல் தலைமைக் குழு உறுப்பினர் பிருந்தா காரத் மாநாட்டைத் தொடங்கிவைத்துப் பேசினார்.

தேசிய அரசியல் பணிக்குழு ஒருங்கிணைப்பாளர் பிரகாஷ்காரத் பேசியதாவது: பழந்தமிழ் இலக்கியம், கலாச்சாரம், பண்பாட்டின் செழுமையும், தொழிலாளி வர்க்கம், கம்யூனிஸ்ட் இயக்க வரலாற்றையும் ஒருங்கிணைக்கும் நகரமான மதுரையில் இம்மாநாடு நடத்துவது பொருத்தமானது. இந்த மாநாடு கட்சியின் பொதுச் செயலாளராக இருந்த சீத்தாராம் யெச்சூரி இல்லாத கடினமான தருணத்தில் நடக்கிறது.

இங்கு 3 கேள்விகளைக் கேட்கிறேன். டொனால்டு ட்ரம்பின் நண்பர் என்று கூறுவது யாரை? கவுதம் அதானி, முகேஷ் அம்பானியின் நெருங்கிய நண்பர் யார்? ஆர்எஸ்எஸ்-கு யார் முழு விசுவாசமாக இருக்கிறார்? இந்த மூன்று கேள்விகளுக்கும் ஒரே பதில் மோடிதான்.

பாஜக-ஆர்எஸ்எஸ் மற்றும் இந்துத்துவா நிறுவனங்களின் கூட்டணியைப் போராடித் தோற்கடிக்க வேண்டும். பாஜக-ஆர்எஸ்எஸ் கூட்டணியை எவ்வாறு திறம்பட எதிர்த்துப் போராடுவது என்ற கேள்வி சிக்கலானது. கருத்தியல், கலாச்சார மற்றும் சமூகத் துறைகளில் இந்துத்துவா சக்திகள் ஆதிக்கம் செலுத்துகின்றன. எனவே, பாஜகவுக்கு எதிராக அனைத்து மதச்சார்பற்ற சக்திகளையும் அணிதிரட்ட வேண்டும்.

பாஜக ஆளும் மாநிலங்களில் சிறுபான்மையினர் துன்புறுத்தப்படுகிறார்கள். நாட்டில் வேலையின்மை அதிகரித்து வருகிறது. குறிப்பாக, ஒப்பந்தம் மூலம் தொழிலாளர் சுரண்டல் அதிகரித்துள்ளது. தொழிலாளர்களின் உரிமைகளைக் குறைக்கும் 4 தொழிலாளர் சட்டங்களைத் திரும்பப் பெற வலியுறுத்தி மே 20-ம் தேதி வேலைநிறுத்தப் போராட்டத்துக்கு மத்திய தொழிற்சங்கங்கள் அழைப்பு விடுத்துள்ளன. இடதுசாரிக் கட்சிகளும், அனைத்து வெகுஜன அமைப்புகளும் இதை வெற்றிபெறச் செய்யும்.

மக்களவையில் பெரும்பான்மை இல்லாவிட்டாலும், எதேச்சதிகார முயற்சிகளை பாஜக நிறுத்தவில்லை. ஒரே நாடு ஒரே தேர்தல், அரசியலமைப்புத் திருத்த மசோதா ஆகியவை கூட்டாட்சி மற்றும் மாநிலங்களின் உரிமைகள் மீதான நேரடித் தாக்குதலாகும். தேர்தல் ஆணையச் சுதந்திரத்தைச் சிதைப்பது தொடர்கிறது. பாஜக ஆட்சி அல்லாத மாநிலங்களுக்கு நிதி ஒதுக்கீடு செய்வதில் அப்பட்டமான பாரபட்சம் உள்ளது. பல நாடுகளுக்கு எதிராக டிரம்ப் ஆக்ரோஷமான நடவடிக்கை எடுக்கிறார். இவருக்கு பிரதமர் மோடி விசுவாசமாக இருக்கிறார். இதன் விளைவு நமது நாட்டுக்கு மிக மோசமாக இருக்கும். காசாவில் இனப்படுகொலையை எதிர்நோக்கும் பாலஸ்தீன மக்களுக்கு முழு ஆதரவைத் தெரிவிக்கிறோம். பொருளாதாரத் தடையை எதிர்க்கும் க்யூபாவை வாழ்த்துகிறோம். இவ்வாறு அவர் பேசினார்.

மாநாட்டில், கேரள முதல்வர் பினராயி விஜயன் மற்றும் முக்கியத் தலைவர்கள் பங்கேற்றனர். மார்க்சிஸ்ட் லெனினிஸ்ட் கட்சியின் விடுதலைப் பொதுச் செயலாளர் திபாங்கர் பட்டாச்சார்யா, ஆர்எஸ்பி பொதுச் செயலாளர் மனோஜ் பட்டாச்சார்யா, இந்து என்.ராம், அகில இந்திய பார்வர்டு பிளாக் பொதுச் செயலாளர் ஜி.தேவராஜன் உள்ளிட்டோர் பேசினர். தமிழகம் உட்பட பல்வேறு மாநிலங்களைச் சேர்ந்த மார்க்சிஸ்ட் கட்சி நிர்வாகிகள், தொண்டர்கள் மாநாட்டில் பங்கேற்றனர். முக்கியத் தீர்மானங்கள் நிறைவேற்றப்பட்டன. இன்று நடைபெறும் நிகழ்ச்சியில் தமிழக முதல்வர் மு.க.ஸ்டாலின் பங்கேற்றுப் பேசுகிறார்.