செங்குத்து தூக்குப் பாலத்துடன் தயார் நிலையில் பாம்பன் பாலம்: அடுத்த மாதம் பிரதமர் மோடி திறந்து வைக்கிறார்?

இந்தியா​வில் கடலுக்கு நடுவில் கட்டப்​பட்ட முதல் பாலம் என்ற பெரு​மையை பெற்றது பாம்பன் பாலம். கடந்த 1914-ம் ஆண்டு அப்போதைய பிரிட்​டிஷ்​காரர்கள் இலங்​கை​யுடன் வியாபாரத்தை பெருக்க விரும்பி பாம்பன் பாலத்​தைக் கட்டினர்.

இந்த பாலம் ராமநாத​புரம் மாவட்​டத்​தில் உள்ள ராமேஸ்​வரத்​துக்கு செல்​லும் முக்கிய ரயில் பாலமாக​வும் அமைந்​தது. கடந்த 110 ஆண்டு​களாக பாலம் சிறப்​பாகவே செயல்​பட்டு சாதனை படைத்​தது. அதிநவீன தொழில்​நுட்​பங்கள் இல்லாமல் கட்டப்​பட்ட அந்தப் பாலம் கடல் அரிப்பு உட்பட பல்வேறு சிக்​கல்​களுக்கு உள்ளானது. அதனால், அந்தப் பாலத்​தின் போக்கு​வரத்து நிறுத்​தப்​பட்​டது.

அதற்​குப் பதில் புதிய பாலம் கட்டும் பணியை ரயில்வே நிர்​வாகம் கடந்த 2019-ம் ஆண்டு தொடங்​கியது. இடையில் கரோனா தொற்று காரணமாக கட்டுமான பணிகள் தாமத​மா​யின. பின்னர் ரயில்வே அமைச்​சகத்​தின் கீழ் செயல்​படும் ஆராய்ச்சி வடிவ​மைப்பு மற்றும் தர நிறு​வனத்​தின் (ஆர்​டிஎஸ்ஓ) பங்களிப்புடன் பாலத்​திற்​குரிய அனைத்து தளவாடங்​களும் உருவாக்​கப்​பட்டன. சுமார் ரூ.545 கோடி செலவில் தற்போது பாம்பன் பாலம் கட்டப்​பட்​டுள்​ளது. இந்த பாலத்​தில் 101 துாண்கள் உள்ளன.

குறிப்பாக கடலுக்​குள் அமைக்​கப்​பட்ட இந்தியா​வின் முதல் செங்​குத்து துாக்​குப் பாலம் என்ற பெரு​மையோடு பாம்பன் ரயில் பாலம் முழு​மையடைந்து திறப்பு விழாவுக்காக தயார் நிலை​யில் உள்ளது. ரயில்வே பாது​காப்பு ஆணையர் ஏ.எம்​.சவுத்ரி, கடந்த நவம்பர் மாதம் 13 மற்றும் 14-ம் தேதி​களில் பாம்பன் பாலம், தூக்கு பாலம் ஆகிய​வற்றை முழு​மையாக ஆய்வு செய்து அறிக்கை அளித்​துள்ளார். அதில், பாலத்​தின் உறுதித் தன்மை, கடல் அரிப்பு, வெல்​டிங் பணிகள் குறித்து சில ஆட்சேபணைகளை அந்த அறிக்கை​யில் சவுத்ரி சுட்​டிக் காட்​டி​யிருந்​தார். இதனால் பாம்பன் பாலம் குறித்து சர்ச்​சைகள் எழுந்தன.

அவற்றுக்கு முற்றுப்புள்ளி வைக்​கும் வகையில், ஊடகவிய​லா​ளர்களை கடந்த வெள்​ளிக்​கிழமை அழைத்து சென்று பாம்பன் பாலத்​தின் கட்டு​மானம், தூக்​குப் பாலத்​தின் செயல்பாடுகள் குறித்த முழு விவரங்களை தெற்கு ரயில்வே துறை​யினர் விளக்​கினர். மேலும், ஊடகவிய​லா​ளர்​களின் சரமாரியான கேள்வி​களுக்கு இந்தியா​வில் ரயில் கட்டமைப்பு மேம்​பாட்டுக்கான ரயில் விகாஸ் நிகாம் லிமிடெட் (ஆர்​விஎன்​எல்) நிறு​வனத் துணைப் பொது மேலாளர் னிவாசன் பதில் அளித்​தார். அத்துடன், பாம்பன் பாலத்​தின் கட்டு​மானத்​தில் ரயில்​வே​யில் ஓய்வு பெற்ற பிறகு ரெசிடென்ஸ் இன்ஜினீயராக பணியாற்றிய அன்பழகன் முக்கிய பங்காற்றி உள்ளார். இவர்கள் இருவரும் கூறிய​தாவது: பாம்பன் பாலம் 2.05 கி.மீ. நீளமுடையது. நாட்​டிலேயே 72 மீட்டர் செங்​குத்து லிப்ட் ஸ்பான் கொண்​டது.

சர்வதேச நிபுணர் மூலம் இந்த பாலத்​தின் வடிவ​மைப்பு முடிவு செய்​யப்​பட்​டது. அதை சென்னை ஐஐடி.​யிடம் வழங்கி ஆய்வு செய்​யப்​பட்​டது. மும்பை ஐஐடி.​யின் ஆலோசனை​களும் ஏற்கப்​பட்டன. இப்படி நிபுணர்​களின் ஒப்பு​தலுக்​குப் பிறகே பாம்பன் பாலத்​தின் வடிவ​மைப்​புக்கு தெற்கு ரயில்வே அங்கீ​காரம் வழங்​கியது. பாலத்​தில் பயன்​படுத்​தப்​பட்ட இரும்​பு​களில் வெல்​டிங் சரியாக இருக்​கிறதா என்று திருச்சி வெல்​டிங் ஆராய்ச்சி நிறு​வனத்​தின் மூலம் உறுதி செய்​யப்​பட்​டது.

அத்துடன், ரயில்வே பாது​காப்பு ஆணையர் ஏ.எம்​.சவுத்ரி சுட்​டிக் காட்டிய விஷயங்​களை​யும் கவனத்​தில் எடுத்​துக் கொண்​டோம். அவர் கூறிய சில விஷயங்களை ஆர்விஎன்எல் மூலம் மீண்​டும் செய்து முடித்​துள்ளோம். இப்போது பாம்பன் பாலம், தூக்கு பாலம் ஆகிய விஷயங்​களில் எந்த சந்தேக​மும் இல்லை. 100 ஆண்டுகள் இந்தப் பாலம் உறுதியாக உழைக்​கும். தொடர்ந்து பராமரிப்​பதன் மூலம் 100 ஆண்டு​களுக்கு மேலும் இந்தப் பாலம் உழைக்​கும்.

இந்த தூக்கு பாலத்​தின் வழியாக 22 மீட்டர் உயரம் கொண்டபெரிய கப்பல்கள் செல்ல முடி​யும். பாம்பன் சாலை பாலத்​தின் உயரத்​துக்கு இந்த தூக்கு பாலத்தை இயக்க முடி​யும். தற்போது பாலம் தயாராக உள்ளது. ரயில்வே நிர்​வாகம் முடி​வெடுத்த பின், பாலம் திறப்பு விழா காணும். அதன்​பின் ராமேஸ்​வரம் வரை பயணிகள் எளிதாக சென்று வரமுடி​யும். பழைய பாம்பன் பாலத்தை அங்கிருந்து அகற்ற ரயில்வே நிர்​வாகம் முடிவு செய்​துள்ளது. இவ்வாறு அவர்கள் கூறினர். பாம்பன் பாலம் கட்டுமான பணிகள் முடிந்து தயார் நிலை​யில் இருப்​ப​தால், அடுத்த மாதம் அதை பிரதமர் மோடி திறந்து வைப்​பார் என்று எதிர்​பார்க்​கப்​படு​கிறது.

3 நிமிடத்​தில்... பழைய பாம்பன் பாலத்​தின் தூக்கு பாலம் கத்தரி கோல் வடிவத்​தில் மேலே தூக்​கும். அதுவும் மனிதர்கள் 20-க்​கும் மேற்​பட்​டோர் இயக்கு​வதன் மூலம் தூக்​குப் பாலம் மேலெழும்பும். இதற்கு சுமார் 30 நிமிடங்கள் முதல் 40 நிமிடங்​களாகும். ஆனால், புதிதாக கட்டப்​பட்​டுள்ள 660 டன் எடையுள்ள தூக்கு பாலத்தை இயக்க ஒருவர் போதும். தானி​யங்கி தொழில்​நுட்பம் மூலம் புதிய பாலத்தை 3 நிமிடத்​தில் தூக்​கிவிட ​முடி​யும். பாலத்​தில் அதிகபட்​சமாக 80 கி.மீ. வேகத்​தில் ர​யில் செல்ல ​முடி​யும். எனினும், பாது​காப்​புக் ​காரணங்​களுக்காக அதற்கு குறைவான வேகத்தில் ர​யில் இயக்​கப்​படும். மேலும், தூக்​குப் பாலம் உள்ள இடத்​தில் மட்டும் 50 கி.மீ., வேகத்​தில்​ ர​யில்​கள்​ இயக்​க ​முடி​யும்​.