புதுச்சேரியில் மீண்டும் மழை: ஏரி, குளங்கள் நிரம்பியதால் கண்காணிப்பு, முன்னெச்சரிக்கை தீவிரம்

புதுச்சேரி: புதுச்சேரியில் மீண்டும் தொடர் மழை பெய்து வருகிறது. ஏற்கெனவே அங்குள்ள ஏரி, குளங்கள் நிரம்பிய நிலையில் உள்ளதால் தொடர் கண்காணிப்பு மற்றும் முன்னெச்சரிக்கை பணிகள் தீவிரப்படுத்தப்பட்டுள்ளன.

புதுச்சேரியில் கடந்த நவம்பர் 30-ம் தேதி தாக்கிய ஃபெஞ்சல் புயல் கடும் சேதத்தை ஏற்படுத்தியது. வரலாறு காணாத வகையில் ஒரே நாளில் 48.4 செமீ மழை கொட்டியது. தமிழகத்தில் அணைகள் திறப்பால் புதுவை கிராமப்புறங்களில் 50 ஆயிரத்துக்கும் மேற்பட்ட வீடுகளில் வெள்ளம் புகுந்தது. 500-க்கும் மேற்பட்ட மரங்கள், மின்கம்பங்கள், மின் மாற்றிகள் சாய்ந்தன. துணை மின்நிலையங்களில் வெள்ளம் புகுந்தது.

ஆயிரக்கணக்கான ஹெக்டேர் விவசாய நிலங்கள் வெள்ளத்தில் மூழ்கின. அனைத்து கால்வாய்கள், சாலைகளில் வெள்ளம் பெருக்கெடுத்து ஓடியது. 50 கிமீக்கும் அதிகமான சாலைகள் சேதமடைந்தன. வெள்ள சேதத்தை மத்திய குழுவினர் வந்து பார்வையிட்டு சென்றனர். நகர பகுதி ஓரிருநாளில் இயல்பு நிலைக்கு திரும்பியது. ஆனால் கிராமப் புறங்களில் சாத்தனுார், வீடூர் அணை திறப்பால் ஏற்பட்ட வெள்ளப்பெருக்கால் பாதிக்கப்பட்ட மக்கள் இன்னும் மீளவில்லை.

இந்த நிலையில் மீண்டும் வங்கக் கடலில் ஏற்பட்டுள்ள ஆழ்ந்த காற்றழுத்த தாழ்வு பகுதியால் 5 நாட்களுக்கு புதுவையில் கனமழை பெய்யும் என எச்சரிக்கை விடுக்கப்பட்டது. நேற்றைய தினமே வானம் கருமேகங்களுடன் காணப்பட்டது. ஆனால் மழை பெய்யவில்லை. இந்த நிலையில் இன்று (டிச.11) அதிகாலை வானம் இருண்டு காணப்பட்டது. காலை 7.30 மணிக்கு மழை பெய்ய தொடங்கியது. சுமார் அரைமணி நேரத்துக்கும் மேல் கனமழை பெய்தது. தொடர்ந்து மழை பெய்தவண்ணம் உள்ளது.

தொடரும் மழையால் நிரம்பிய ஏரி, குளங்கள் கண்காணிப்பு: புதுவையின் ஆண்டு சராசரி மழையளவு ஆயிரத்து 319 மிமீ. கடந்த சில ஆண்டுகளாக பருவமழை கணிக்க முடியாமல் உள்ளது. 2021-ம் ஆண்டு மொத்தமாக 94 நாட்கள் மழை நாட்களாக இருந்து, புதுவை பிராந்தியத்தில் 2 ஆயிரத்து 561.6 மி.மீ.,மழை பெய்தது. 2022-ம் ஆண்டு ஆயிரத்து 267 மி.மீ., கடந்த ஆண்டு ஆயிரத்து 489.6 மி.மீ மழை பெய்துள்ளது.நடப்பு ஆண்டில் இதுவரை ஆயிரத்து 686.8 மி.மீட்டர் மழை பெய்துள்ளது.

இது ஆண்டின் மொத்த சராசரியை விட 367.8 மி.மீட்டர் அதிகமாகும். ஃபெஞ்சல் புயல் காரணமாக கடந்த 30-ம் தேதி காலை 8.30 மணி முதல் மறுநாள் டிச.1-ம் தேதி காலை 8.30 மணிவரை அதாவது 24 மணி நேரத்தில் 48.4 செ.மீ., மழை கொட்டியது.புதுவையில் கடந்த 30 ஆண்டுகளில் இதுவே ஒரு நாளில் பெய்த அதிகப்பட்ச மழையாகும். இதனால் பிராந்தியத்தில் உள்ள அனைத்து ஏரி, குளம் மற்றும் படுகை அணைகள் நிரம்பி வழிகிறது.

புதுவையின் பெரிய ஏரிகளான ஊசுட்டேரியில் 3.50 மீட்டர் உயரத்திலும், பாகூர் ஏரியில் 3.60 மீட்டர் உயரத்துக்கும் தண்ணீர் தேங்கி கடல் போல் காட்சியளிக்கிறது. உபரி நீர் மதகுகள் வாயிலாக வெளியேற்றப்பட்டு வருகிறது. மொத்தமுள்ள 84 ஏரி, குளங்கள் நிரம்பி வழிகின்றன. இவற்றில் முக்கிய ஏரிகளான காட்டேரிக்குப்பம் ஏரி, சுத்துக்கேணி பெரிய ஏரி, தொண்டமாநத்தம் வெள்ளேரி மற்றும் கடப்பேரி, முருங்கப்பாக்கம் ஏரி, உழந்தை ஏரி, அபிஷேகப்பாக்கம் ஏரி, மணமேடு ஏரி, கிருமாம்பாக்கம் ஏரி, உச்சிமேடு ஏரி, மேல்பரிக்கல்பட்டு ஏரி, அரங்கனுார் ஏரி, கனகன் ஏரி, வேல்ராம்பட்டு ஏரிகள் முழு கொள்ளவை எட்டி நிரம்பி வழிகின்றன.

வாதானுார் ஏரி, பண்டசோழநல்லுார் ஏரி, திருபுவனைபாளையம், கரையாம்புத்துார் உள்ளிட்ட 6 ஏரிகள் உடைந்து தண்ணீர் வெளியேறியது. மீதியுள்ள 78 ஏரிகள் முழு அளவில் தண்ணீர் நிரம்பியுள்ளது. மழைக்காலங்களில் தென்பெண்ணை மற்றும் சங்கராபரணி ஆறுகளில் வீணாக கடலில் கலக்கும் தண்ணீரை சேமிப்பதற்காக 27 இடங்களில் படுகையணைகள் அமைக்கப்பட்டுள்ளன. இதில் 26 படுகையணைகளில் தண்ணீர் நிரம்பி பரந்து விரிந்து ரம்மியமாக காட்சியளிக்கின்றன. பிள்ளையார்குப்பம் படுகையணை உடைந்ததால் அங்கும் மட்டும் தண்ணீர் நிற்கவில்லை.

ஃபெஞ்சல் புயலுக்கு முன்பாக ஏரி, குளங்களில் 30 முதல் 60 சதவீதம் வரை மட்டுமே தண்ணீர் இருப்பு இருந்தது. ஆனால் ஃபெஞ்சல் புயலில் ஒரே நாளில் 48.4 செ.மீ., அளவுக்கு கொட்டி தீர்த்த கன மழையால் அனைத்து நீர் நிலைகளும் வேகமாக நிரம்பி நிலத்தடி நீர் மட்டம் உயர்ந்து வருகிறது. பல ஆண்டுகளுக்கு பிறகு புதுவையில் உள்ள ஏரி குளங்களில் தற்போது ஆயிரத்து 599.88 மில்லியன் கன அடி கொள்ளவுக்கு தண்ணீர் ததும்பி நிற்கிறது. இதனிடையே மீண்டும் மழை பெய்ய தொடங்கியதால் ஏரி, குளங்களை பொதுப்பணித் துறை அதிகாரிகள் கண்காணித்து வருகின்றனர். பலவீனமான பகுதி கரைகளை கண்டறிந்து மணல் மூட்டைகளை அடுக்கும் பணியும் நடக்கிறது.