நலமும் நமதே: கர்ப்பிணிகள் கவனத்துக்கு

மார்கழிக் குளிர் ஒவ்வொரு நாளையும் புத்துணர்வாக மாற்றிக்கொண்டிருக்கிறது. இதம் தேவைப்படும் இந்தக் குளிர்காலம் பிரசவத்துக்குக் காத்திருக்கும் தாய்மார்களுக்குத் தொந்தரவாகவும் அமைந்துவிடக்கூடும். குளிர்காலத்தில் கர்ப்பவதிகள் கவனிக்க வேண்டிய விஷயங்கள் சிலவற்றைப் பார்க்கலாம்.

நிறைவான நீர்ச்சத்து

கோடைக்காலத்தில் இயற்கையாகவே அதிகமாகத் தண்ணீர் அருந்துவோம். ஆனால், குளிர்காலத்தில் தண்ணீரைக் குறைவாகவே குடிப்போம். பிரசவத்துக்குக் காத்திருக்கும் பெண்கள் குளிர்காலத்தில் ஆரோக்கியமாக இருக்க அதிகமாகத் தண்ணீரைக் குடிக்க வேண்டும். தலைவலி, தோல் வறட்சி போன்ற பிரச்சினைகளையும் தண்ணீர் குடிப்பதன் மூலம் தவிர்க்கலாம். குறைப்பிரசவத்தையும் இது தவிர்க்கும்.

கூட்டம் வேண்டாமே

குளிர்காலத்தில் நோய்க் கிருமிகள் எளிதில் தொற்றிக்கொள்ளும். சில நேரம் இதுபோன்ற தொற்றுகள் கருவின் வளர்ச்சியைப் பாதிக்கக்கூடும். அதனால் ஷாப்பிங் மால்கள், திரையரங்குகள், பூங்காக்கள் என மக்கள் அதிகம் கூடும் இடங்களைத் தவிர்க்க வேண்டும்.

தொற்றுகளை விரட்டுங்கள்

குழந்தை கருவில் இருக்கும்போது ஏற்படும் ஹார்மோன் மாறுதல்களாலும் சளிக்கோழை உற்பத்தி அதிகரிப்பாலும் நிறையத் தோல் தொற்றுகள் ஏற்படலாம். இதைத் தவிர்க்க, வீட்டைச் சுத்தமாகப் பராமரிப்பது அவசியம். செல்லப் பிராணிகளைத் தொட்டு விளையாடுவதாலும் தொற்று ஏற்படலாம். சீரான இடைவெளிகளில் கைகளைக் கழுவுவதும் தொற்று நோய்களிடம் இருந்து பாதுகாக்கும்.

இதமே நலம்

கர்ப்பிணிகளுக்கு அடிக்கடி சளி பாதிப்போ, ப்ளூ காய்ச்சலோ ஏற்பட்டால் மூளைக்குச் சரியான அளவு ரத்தம் செல்லாது. சில நேரம் இது கருவில் இருக்கும் குழந்தையையும் பாதிக்கக் கூடும் என்பதால் ஆரோக்கியமான உணவைச் சாப்பிட்டு உடல் நலத்தைப் பேணுவது அவசியம்.

முறையான உணவூட்டம்

ஆரோக்கியம் கூடி, சரிவிகித உணவை நேரம்தவறாமல் எடுத்துக்கொள்வதன் மூலம் நோய்களை விலக்கிவைக்க முடியும். குளிர்காலத்தில் பழங்களும் காய்கறிகளும் அபரிமிதமாகக் கிடைக்கும். கீரையை அடிக்கடி சாப்பிட வேண்டும். கரு பலப்படுவதற்கான ஃபோலிக் அமிலத்தைத் தாய்மார்கள் சாப்பிடும் காய்கறிகளும் பழங்களும் வழங்கும். காய்கறிகளையும் பழங்களையும் நன்கு கழுவிய பிறகே சாப்பிட வேண்டும்.

உடற்பயிற்சி அவசியம்

சின்ன சின்ன நடை அவசியம். ஒரே இடத்தில் அதிக நேரம் உட்கார்ந்திருப்பதைத் தவிர்க்க வேண்டும். உடற்பயிற்சி தாயின் உடலுக்கு மட்டுமின்றி, லகுவான பிரசவத்துக்கும் உதவும். கடின வேலைகளைத் தவிர்க்க வேண்டும். கடின உடற்பயிற்சிகளும் வேண்டாம்.

​- சங்கரி, சென்னை.