கண்ணீரும் புன்னகையும்: மாத்ருபூமியில் முதல் நாள் விடுமுறை

மும்பையைச் சேர்ந்த யூடியூப் நிறுவனமான கல்ச்சர் மெஷின், பெண் ஊழியர்களுக்கு மாதவிடாயின் முதல் நாளை சமீபத்தில் விடுமுறையாக அறிவித்திருந்தது. அதைத் தொடர்ந்து கேரள ஊடக நிறுவனம் மாத்ருபூமி தன் பெண் ஊழியர்களுக்கு இதேபோல் முதல்நாள் விடுமுறையை அறிவித்துள்ளது. இந்த அறிவிப்பு குறித்து மாத்ருபூமியின் கூடுதல் நிர்வாக இயக்குநர் எம்.வி. ஷ்ரேயம்ஸ் குமார், “கல்ச்சர் மெஷின் நிறுவனத்தின் அறிவிப்பைப் பற்றிக் கேள்விப்பட்டபோது, அது சிறந்த முடிவு என்று தோன்றியது. பெண் ஊழியர்களைப் பொறுத்தவரை அவர்களுக்கு அது கூடுதல் விடுமுறை நாளாகத் தரப்படும். நோய் விடுப்பாகவோ தற்செயல் விடுப்பாகவோ கணக்கில் கொள்ளப்படாது” என்று கூறியுள்ளார். இந்தோனேசியா, ஜப்பான், தென்கொரியா ஆகிய நாடுகளில் பெண் ஊழியர்களுக்கு மாதவிடாயின் முதல்நாள் விடுமுறை அளிக்கும் நடைமுறை உள்ளது.

மும்பையில் பருவமழைக்குப் பிறகு தண்ணீர் தேங்கியதால் ஏற்பட்ட கொசுத்தொல்லை குறித்தும் மும்பை மாநகராட்சி நிர்வாகத்தின் பாராமுகம் குறித்தும் பாடகி மாலிஷ்கா, ரெட் எஃப்.எம்-ல் பாடிய பாடல் மும்பைவாசிகள் மத்தியில் பிரபலமானது. இதையடுத்து சிவசேனா கட்சியைச் சேர்ந்த இருவர் மாலிஷ்கா மீது மும்பை மாநகராட்சி நிர்வாகம் ரூ. 500 கோடி அபராதம் விதித்து அவமதிப்பு வழக்கு தொடுக்க வேண்டும் என்று வலியுறுத்தினர். அவரது செயல் மும்பையின் நற்பெயரைக் கெடுக்கும் முயற்சி என்றும் விமர்சித்தனர். சிவசேனா கட்சி சார்பாக ‘மும்பையைப் பற்றி ஏதாவது நல்லதாகப் பேசு’ என்று கூறும் எதிர்ப்பாடலும் உருவாக்கப்பட்டது. பிரச்சினை இத்துடன் நிற்கவில்லை. மும்பை மாநகராட்சி நிர்வாகம் மாலிஷ்காவின் வீட்டிலுள்ள தொட்டிச் செடிகள் அப்பகுதியில் கொசுக்களை உற்பத்தி செய்வதாகக் கூறி, அவர் வீட்டுக்கு நோட்டீஸ் அனுப்பியுள்ளது.