அறிவோம் தெளிவோம்: அனுதினமும் தாய்ப்பால் தினமே!

ஒவ்வொரு ஆண்டும் ஆகஸ்ட் முதல் வாரம் உலக தாய்ப்பால் வாரமாக அனுசரிக்கப்படுகிறது. பச்சிளங் குழந்தைகளுக்குத் தாய்ப்பால் கொடுக்கவேண்டியதன் அவசியத்தை உணர்த்தும் பொருட்டே தாய்ப்பால் வாரம் அனுசரிக்கப்படுகிறது. தாய்ப்பால் ஊட்டும் அம்மாக்களுக்கு ஆகஸ்ட் முதல் வாரம் மட்டுமல்ல, ஒவ்வொரு நாளுமே தாய்ப்பால் தினம்தான். நம்மிடையே தாய்ப்பால் குறித்த கற்பிதங்களும் கட்டுக்கதைகளும் ஏராளம். ஏன் ஒரு குழந்தைக்குத் தாய்ப்பால் அவசியம் என்பதை நம்முடன் பகிர்ந்துகொள்கிறார் பெங்களூருவைச் சேர்ந்த இந்தியா ஹோம் ஹெல்த்கேர் நிறுவனத்தின் தலைவர் டாக்டர் அனிதா ஆரோக்கியசாமி.

உயிர் வளர்க்கும் அமுதம்

தாய்ப்பாலில் குழந்தைக்குத் தேவையான அனைத்து ஊட்டசத்துக்களும் நிறைந்திருக்கின்றன. தாய்ப்பால் குடிக்கும் குழந்தைகள் ஆரோக்கியமாக இருப்பார்கள். தாய்ப்பால் குடித்தால்தான் குழந்தைகளுக்கு நோய் எதிர்ப்பு சக்தி அதிகரிக்கும். இதனால் ஆஸ்துமா, உடல் பருமன் போன்ற வியாதிகள் வராமல் குழந்தைகளைப் பாதுக்காக்கலாம். ஆறு மாதம்வரை தாய்ப்பால்தான் குழந்தைகளுக்கு ஏற்ற உணவு.

பிறந்த குழந்தைக்கு முதல் ஆறு மாதமாவது தாய்ப்பால் கொடுப்பது அவசியம். பிறந்து அரைமணி நேரத்திற்குள் பால் கொடுக்க வேண்டும். இல்லையென்றால் அந்தக் குழந்தைக்குப் பால் குடிக்கும் ஆசை குறைந்துவிடும்.

வலுப்படும் தாய்-சேய் உறவு

குழந்தைகளுக்குத் தாய்ப்பால் வாசனையை உணர முடியும். அதனால்தான் பசிக்கும்போது குழந்தை தன் அம்மாவைப் பார்த்து அழுகிறது.

தாய்ப்பால் கொடுப்பதால் தாய்க்கும் குழந்தைக்கும் இடையே பந்தம் வலுப்பெறுவதுடன் இருவருடைய ஆரோக்கியமும் மேம்படுகிறது.

தாய்ப்பால் கொடுக்கும்போது பெண்களின் உடலில்ஆக்ஸிடாக்ஸின் என்ற ஹார்மோன் வெளியாகுவதால், கருப்பை பழைய அளவைப் பெற உதவுகிறது. தாய்ப்பால் கொடுப்பதால் உடல் பெருத்துவிடும் என்பது கட்டுக்கதை. உண்மையில் தாய்ப்பால் கொடுப்பதால் தாயின் எடை குறையும். சரியாக தினமும் குழந்தைக்கு தாய்ப்பால் கொடுக்கும் தாய் ஒரு நாளில் 600 கலோரிகளைக் குறைக்க முடியும். அதனால் பிரசவத்துக்கு முன்பு இருந்த எடைக்குத் திரும்ப முடியும்.

தாய்ப்பால் கொடுப்பதால் மார்பகம் மற்றும் கர்பப்பை சம்பத்தப்பட்ட புற்றுநோய் வராமல் தடுக்கலாம்.

உணவு முக்கியம்

தாய்ப்பால் கொடுக்கும் காலங்களில் தாய் எடுத்துக்கொள்ளும் உணவு மிகவும் முக்கியமானது. கீரை, பச்சை மற்றும் மஞ்சள் நிற காய்கறிகள், பழங்கள், இரும்புச் சத்துள்ள அனைத்து உணவுகளையும் உட்கொள்ளலாம். காரமான உணவு வகைகள், டீ, காபி, சோடா போன்றவற்றையும், ஆரோக்கியமில்லாத உணவு வகைகளையும் தவிர்க்க வேண்டும்.

வேலைக்குப் போனாலும் பாலூட்டலாம்

வேலைக்குச் செல்லும் பெண்கள், தாய்ப்பாலைச் சேகரித்து வைத்துக்கொள்ள ‘BREASTFEED PUMPS’ உதவுகின்றன. இவற்றில் தாய்ப்பாலைச் சேகரித்துவைத்துவிட்டு அலுவலகத்துக்குப் போகலாம். வீட்டில் இருக்கும் பெரியவர்கள், சிறிய தேக்கரண்டி மூலம் அந்தப் பாலைக் குழந்தைக்குப் புகட்டலாம்.

தாய்ப்பால் கொடுக்கும் தாய்மார்கள் உடல் நிலை சரியில்லை என்றால் கவலைப்படத் தேவையில்லை. அந்த நேரத்தில் தாய்ப்பால் கொடுத்தால் அது குழந்தையைப் பாதிக்காது.

ஊட்டச்சத்து குறைவாக இருப்பவர்கள் வருத்தப்படத் தேவையில்லை. இதற்கென தனியாக பணம் செலவு செய்து ஊட்டச்சத்து பானங்களை அருந்த வேண்டிய அவசியமில்லை. மூன்று வேளையும் வீட்டில் சமைத்த ஆரோக்கியமான உணவைச் சாப்பிட்டாலே போதும். தினமும் எட்டு லிட்டர் தண்ணீர் குடிக்க வேண்டும்.

முதன்முறையாகத் தாய்ப்பால் கொடுக்கும் தாய்மார்களுக்குச் சிறிது சங்கடமாக இருக்கும். ஆனால் சில நாட்களில் அது பழகிவிடும். தாய்ப்பால் கொடுக்கும்போது உட்கார்ந்த நிலையில் கொடுப்பது நல்லது. அப்போதுதான் குழந்தைக்குப் பால் குடிக்க எளிதாக இருக்கும்.

தாய்ப்பால் சுரக்க

தாய்ப்பால் சுரக்க, தண்ணீர்விட்டான் கிழங்கை உலரவைத்து மாவாக்கிக்கொள்ளுங்கள். அதில், உளுந்து, பச்சரிசி, மிளகு, பச்சைப் பயறு, சீரகம் ஆகியவற்றைப் பொடித்துச் சேர்த்துச் சாப்பிட்டுவர தாய்ப்பால் நன்றாகச் சுரக்கும். தாய்ப்பால் சுரப்பதில் பிரச்சினை இருக்கிறவர்கள் தாய்ப்பால் வங்கிகளின் உதவியைப் பெறலாம்.

தயக்கம் தேவையில்லை

வெளியில் செல்லும்போது பலரும் குழந்தைக்குத் தாய்ப்பால் கொடுக்கத் தயங்குவார்கள். அந்தத் தயக்கம் தேவையற்றது. நம் குழந்தையின் பசிதான் நமக்கு முக்கியம். பொது இடங்களில் இப்போது இதற்காக இருக்கும் வசதிகளை பயன்படுத்திக்கொள்ள வேண்டும். இதற்கு கணவர்மார்களும் தங்கள் மனைவிக்கு உதவ வேண்டும். தாய்ப்பால் கொடுக்கும் தாயை அன்பாகவும், பொறுமையாகவும், கவனமாகவும் பார்த்துக்கொள்ள வேண்டும். அப்போதுதான் மனைவி, கணவன் மற்றும் குழந்தை ஆகிய மூவரின் பந்தம் வலுப்பெறும்.

தொகுப்பு: ப.ஸ்வாதி