பரிசோதனை ரகசியங்கள் 42: பொதுச் சந்தேகங்களுக்கு என்ன பதில்?

‘பரிசோதனை ரகசியங்கள்’ தொடர் தொடங்கியதிலிருந்தே பலதரப்பட்ட சந்தேகங்களை வாசகர்கள் கடிதம் மூலமும் மின்னஞ்சலிலும் அனுப்பிக்கொண்டிருந்தனர். அவற்றில் பல சந்தேகங்களுக்குத் தொடரில் வந்த கட்டுரைகளிலேயே அவ்வப்போது விளக்கம் சொல்லியிருக்கிறேன். இருந்தாலும், பல பேர் அடிக்கடி கேட்ட சில பொதுவான சந்தேகங்களுக்கு இந்த முறை பதில் சொல்லியிருக்கிறேன்.

மருத்துவரிடம் செல்லாமல் சுயமாகவே தனியார் லேப்களில் ‘மாஸ்டர் ஹெல்த் செக்-அப்’ செய்துகொள்ளலாமா?

மருத்துவமனைக்குச் சென்று ‘மாஸ்டர் ஹெல்த் செக்-அப்’ செய்துகொள்ள அப்பாய்ன்மென்ட் வாங்க வேண்டும், வரிசையில் காத்திருக்க வேண்டும், ரிசல்ட் கிடைக்க ஒரு நாள் தேவைப்படும். `அதற்கெல்லாம் நேரம் இல்லை’ என்று காரணம் சொல்லி, பரபரப்பான வாழ்க்கை சூழலில், சுயமாகவே பலரும் தனியார் லேப்களில் ‘மாஸ்டர் ஹெல்த் செக்-அப்’ செய்துகொள்கின்றனர். இது ஆரோக்கியமானது அல்ல!

டாக்டர் சொல்லாமல் எந்தவொரு பரிசோதனையையும் செய்துகொள்ளக் கூடாது. அதிலும், நோயாளியைப் பரிசோதிக்காமல், லேப் ரிசல்ட்களை மட்டும் வைத்துக்கொண்டு ஒருவருக்கு நோய் இருக்கிறது, இல்லை என்று கணிப்பது தவறு. பல நேரங்களில் இந்த ரிசல்ட்கள் டாக்டர்களையும் நோயாளிகளையும் ஏமாற்றிவிடும்.

‘மாஸ்டர் ஹெல்த் செக்-அப்’பில் முதல் கட்டம், நோயாளியின் நோய் வரலாற்றை மருத்துவர் கேட்டுப் பதிவு செய்வது. இரண்டாம் கட்டம், நோயாளியை நேரில் பரிசோதிப்பது. மூன்றாவது கட்டம், இந்த இரண்டிலிருந்து அவருக்கு எந்த நோய் இருக்கலாம் எனச் சந்தேகம் வருகிறதோ அதற்கேற்பவும், அவருடைய பாலினம், வயது, தொழில் போன்றவற்றை அடிப்படையாக வைத்தும் முழு உடல் பரிசோதனைகளைத் தேர்வு செய்து, பரிந்துரைப்பது. இப்படி முறையாகச் செய்யப்படும்போது, இருக்கும் நோயைத் தெரிந்துகொள்ள முடியும். இனிமேல் வரக்கூடிய நோயையும் புரிந்துகொள்ள முடியும்.

ஒரே நேரத்தில் பரிசோதித்தாலும், லேபுக்கு லேப் பரிசோதனை முடிவுகள் மாறுவது ஏன்?

மருத்துவப் பரிசோதனை முடிவுகளைப் பொறுத்த அளவில், பரிசோதிக்கும் ‘லேப்’களைப் பொறுத்து இயல்பான முடிவுகளிலும் அசாதாரணமான முடிவுகளிலும் சிறிதளவு மாற்றம் இருக்கும். காரணம், பரிசோதிக்கப் பயன்படும் கருவிகள், பரிசோதிக்கப் பயன்படுத்தப்படும் செயல்முறை, தரக்கட்டுப்பாடு, நோயாளியிடமிருந்து ரத்தம், மலம் அல்லது சிறுநீரைப் பெற்று எவ்வளவு நேரம் கழித்துப் பரிசோதிக்கிறார்கள் என்ற விவரம் போன்ற பல அடிப்படைக் கூறுகளை வைத்தே முடிவுகள் அமையும். இதனால்தான் ஒவ்வொரு லேபிலும் பரிசோதனை முடிவுகளைத் தரும்போது, கூடவே அங்குச் செய்யப்பட்ட பரிசோதனைகளின் இயல்பான அளவுகளையும் கொடுக்கிறார்கள்.

அடுத்தாக மருத்துவப் பரிசோதனைக் கூடங்களில் இப்போது தானியங்கிக் கருவிகள் வந்துவிட்டன. ஒவ்வொரு மையத்திலும், அவர்கள் பயன்படுத்தும் கருவியைப் பொறுத்து, குறிப்பிட்ட அளவீட்டுக்குத் தினமும் காலையில் செம்மைப்படுத்துவார்கள் (Calibration). இது, எல்லோருக்கும் பொதுவான இயல்பு அளவாக இருக்க வேண்டும். பரிசோதனை முடிவுகள் இந்த அளவீட்டையும் கருவியையும் பொறுத்தே அமையும். இந்த அளவு மாறும்போது, பரிசோதனை முடிவுகளும் மாறுபட வாய்ப்பு உண்டு. சில நேரம், பரிசோதனைகளை முறையாகச் செய்யாவிட்டாலும், பரிசோதனைகளைத் தாமதமாகச் செய்தாலும் முடிவுகள் வித்தியாசப்படும். உதாரணத்துக்கு, ரத்தப் பரிசோதனையின்போது, ரத்த மாதிரியைச் சேகரித்து வெகுநேரம் ஆகிவிட்டால், பரிசோதனை முடிவு துல்லியமாக இருக்காது.

நோயாளிகள் பலரும், குறிப்பாக நீரிழிவு நோயாளிகள் - தாங்களாகவே பரிசோதனைக் கூடங்களில் ரத்தச்சர்க்கரையைப் பரிசோதித்துவிட்டுப் பழைய மாத்திரைகளையே சாப்பிட்டு வருகிறார்கள். இப்படிச் செய்வது சரியா?

இது சரியல்ல. அவசரத்துக்கு வேண்டுமானால் ஒரு முறை தாங்களாக ரத்தச் சர்க்கரையைப் பரிசோதித்துக்கொள்ளலாம். இதையே வழக்கப்படுத்தக் கூடாது. இதில் பல ஆபத்துகள் உள்ளன. குறிப்பாக, சர்க்கரை நோயால் வரக்கூடிய வேறு நோய்களை ஆரம்ப நிலையில் கண்டுபிடிப்பது இதனால் தடைபடும்.

சிலருக்குச் சில பரிசோதனைகள் மீண்டும் மீண்டும் செய்யப்படுவது ஏன்?

இந்தத் தொடரில் ஒவ்வொரு பரிசோதனையைப் பற்றி சொல்லும்போதும் இது குறித்துச் சொல்லியிருக்கிறோம். என்றாலும், பொதுவான காரணம் இது: குறிப்பிட்ட நோய் கட்டுப்படுகிறதா, இல்லையா என்பதையும், ஏற்கெனவே இருக்கிற நோயால் உடலில் வேறு உறுப்புகள் பாதிக்கப்பட்டிருக்கிறதா என்பதையும் தெரிந்துகொள்ளவே இந்த நடைமுறை.

ஒரு மருத்துவரிடம் செய்துகொண்ட பரிசோதனைகளை வைத்து அடுத்த மருத்துவர் சிகிச்சை செய்யாமல், மீண்டும் அதே பரிசோதனைகளை மேற்கொள்ளச்சொல்வது ஏன்?

எப்போதும் ஒரே மருத்துவரிடம் சிகிச்சை பெறுவது நல்லது. அப்போது இந்தப் பிரச்சினை அதிகம் நேராது. நாளும் ஒரு மருத்துவரைப் பார்த்தால், இந்த நிலைமையைத் தவிர்க்க முடியாது. காரணம், முதலில் பார்த்த மருத்துவருக்கும் அடுத்துப் பார்க்கும் மருத்துவருக்கும் இடைப்பட்ட காலம் அதிகமாக இருந்தால், நோயாளியிடம் நோயின் நிலைமை மாறியிருக்கும். இன்னொன்று, இரண்டாவதாகப் பார்க்கும் மருத்துவரின் நோய்க்கணிப்பு முறை வேறுபடலாம். இந்தச் சூழலில் ஏற்கெனவே பார்த்த பரிசோதனை முடிவுகளை வைத்துச் சிகிச்சை செய்ய முடியாது. புதிதாகத்தான் மீண்டும் பரிசோதிக்க வேண்டும்.

சாதாரணத் தலைவலிக்குக்கூட இப்போது மூளையை ஸ்கேன் எடுத்துப் பார்க்கிறார்கள். இது தேவையா?

ஸ்கேன் செய்து பார்ப்பதன் மூலம் நோயின் தன்மையைத் துல்லியமாகத் தெரிந்துகொள்ள முடியும் என்பது பொதுவான நன்மை. அதேநேரம் ‘நோயாளிக்குத் தேவை’ என்ற நிலையில் மட்டுமே ஸ்கேன் உள்ளிட்ட பரிசோதனைகளைச் செய்துகொள்ள வேண்டும். அல்லது விபத்து போன்ற ‘கட்டாயம்’ என்ற நிலையில் மட்டுமே எடுக்கப்பட வேண்டும். பொதுவாக, டாக்டர் பரிந்துரைத்தால் மட்டுமே இதைச் செய்துகொள்ள வேண்டும்.

பல நேரம் நோயாளிகளே ஒரு பயத்தில் ‘எதற்கும் ஒரு ஸ்கேன் எடுத்துப் பார்த்து விடுங்கள்’ என்று டாக்டரிடம் கூறுகிறார்கள். இதைத் தவிர்க்க வேண்டும். நம்பிக்கையான, அனுபவமான, தொடர்ச்சியாகப் பார்க்கும் குடும்ப டாக்டரிடம் சிகிச்சைக்குச் சென்றால், சாதாரணத் தலைவலிக்கு ஸ்கேன் எடுக்கச் சொல்ல மாட்டார். எடுத்தவுடனே சிறப்பு டாக்டரிடம் சென்றால், ஸ்கேன் எடுக்கச் சொல்ல வாய்ப்பிருக்கிறது. தலைவலிக்குப் பல காரணங்கள் உண்டு. எதையும் கவனிக்காமல் விடுபட்டுவிடக் கூடாது என்ற நோக்கத்தில் எல்லாப் பரிசோதனைகளையும் செய்யச் சொல்வதுண்டு.

பிறக்கப்போகும் குழந்தைக்குப் பிறவிக் கோளாறுகள் இருக்குமா என்பதை அறிய டி.என்.ஏ. பரிசோதனை இருக்கிறதா?

இப்போது புதிதாக ‘ஃபீட்டல் டி.என்.ஏ. பரிசோதனை’ (Foetal DNA test) வந்திருக்கிறது. கர்ப்பிணியின் ரத்தத்தில் காணப்படும் சிசுவின் டி.என்.ஏக்களைப் பரிசோதித்து டவுன் சிண்ட்ரோம், டிரைசோமி போன்ற குரோமோசோம் கோளாறுகள் குழந்தைக்கு ஏற்படுமா எனத் தெரிந்துகொள்ள முடியும். இதற்கு ரூ. 30,000 வரை செலவாகும். என்றாலும் இது நோயை உறுதிப்படுத்தும் பரிசோதனை அல்ல! இது, நோய்க்கான வாய்ப்பு உள்ளது என்று மட்டுமே தெரிவிக்கும். இதை உறுதிசெய்ய ஆம்னியோசென்டிசிஸ் மற்றும் கோரியானிக் வில்லஸ் சாம்ப்ளிங் பரிசோதனைகளையும் செய்ய வேண்டும்.

‘மரபணு ரத்தப் பரிசோதனை’ (DNA blood test) புற்றுநோயியல் துறையில் புரட்சியை ஏற்படுத்தியிருப்பதாகக் கருதப்படுகிறது. இது குறித்துத் தொடரில் பேசப்படவில்லையே!

இது மருத்துவத் துறையில் புதிதாக வந்துகொண்டிருக்கும் பரிசோதனை. இதை ‘திரவத் திசு ஆய்வு’ (Liquid biopsy) என்றும் அழைக்கிறார்கள். இதுநாள்வரை ஒருவருக்குப் புற்றுநோய் இருக்கிறதா என்று சோதனை செய்யப் புற்றுநோய் கட்டி என்று சந்தேகப்படும் திசுவை அறுத்து ஆய்வு (Tissue biopsy) செய்வார்கள். ஆனால், திரவத் திசு ஆய்வில், திசுவை அறுக்கத் தேவையில்லை. வெறும் 10 - 15 மில்லி ரத்தப் பரிசோதனையிலேயே புற்றுநோய் இருக்கிறதா, இல்லையா, இனிமேல் வருமா என்று தெரிந்துகொள்ளலாம். எனவே, இதுநாள்வரை புற்றுநோயாளிகள் அனுபவித்த கடும் வலி இனி இல்லை. எளிதான பரிசோதனையும்கூட.

புற்றுநோயின் ஆபத்தான அம்சமே, பதுங்கியிருந்து தாக்குவதுதான். ஒருவருக்குப் புற்றுநோய் வந்தால், அது பல ஆண்டுகளானாலும் வெளியே தெரியாமல் போகலாம். ஆனால், மேற்கண்ட பரிசோதனையின் மூலம் புற்றுநோயை ஆரம்பக் கட்டத்திலேயே அறிந்துகொள்ளலாம். இதன்மூலம் குடல், கர்ப்பப் பை, சிறுநீர்ப் பை, நுரையீரல், இரைப்பை ஆகிய புற்றுநோய்களை முழுமையாகக் குணப்படுத்தி வாய்ப்பு இருக்கிறது.

ரத்தச் செல்லின் உட்கருவைப் பிரித்தெடுத்துச் செய்யப்படும் மரபணு ஆய்வு மூலம் ஒருவருக்கு எதிர்காலத்தில் புற்றுநோய் வருமா? தவிர அவரது எதிர்காலச் சந்ததியினருக்குப் புற்றுநோய் வருமா என்றெல்லாம்கூட அறிய முடியும். குறிப்பாக மரபணு ரீதியாகப் பரம்பரையாகத் தாக்கும் சாத்தியக்கூறுகள் கொண்ட குடல் புற்றுநோய், எலும்புப் புற்றுநோய், மூளைப் புற்றுநோய், கர்ப்பப்பை புற்றுநோய் ஆகியவற்றை முன்கூட்டியே அறிந்து தடுக்கலாம்.

சில வகை புற்றுநோய்கள் குறிப்பிட்ட என்சைம்களைத் தூண்டும் தன்மை கொண்டவை. மேற்கண்ட பரிசோதனையின் ஓர் அம்சமான ‘Cell free exosomes' சோதனை மூலம், ஒருவரின் உடலில் திடீரென்று அதிகரித்திருக்கும் என்சைம்களின் அளவைக்கொண்டு ஆரம்ப நிலையிலேயே புற்றுநோயைக் கண்டுபிடிக்கிறார்கள். என்றாலும், இந்தப் பரிசோதனை முடிவுகள் ஒருவருக்கு இப்படிப்பட்ட நோய்கள் வருவதற்கு வாய்ப்புள்ளது என்று மட்டுமே தெரிவிக்கும். கட்டாயம் வரும் என்பதில்லை. இவற்றுக்கான கட்டணங்களும் இப்போது மிக அதிகம். மருத்துவத் தொழில்நுட்ப வளர்ச்சியில் புதிதாக நுழைந்துள்ள இந்தப் பரிசோதனையின் உண்மையான சாதகப் பாதகங்கள் போகப்போகத்தான் தெரியும்.

(நிறைவடைந்தது)