புதியதோர் உலகம் 05: சமைக்கும் ஆண்கள், போரிடும் பெண்கள்!

வணக்கம், என் சுட்டி நட்புகளே. மார்ச் 8-ம் தேதியோட சிறப்பு என்ன தெரியுமா? உலக உழைக்கும் மகளிர் நாளை அன்னைக்குக் கொண்டாடுறாங்க. அதையொட்டி சுல்தானாங்கிற ஒரு பெண்ணை உங்களுக்கு அறிமுகப்படுத்தப் போறேன்.

சுல்தானா என்றால், அரபி மொழியில் அரசின்னு அர்த்தம். நான் சொல்லப் போற கதைல வரும் பெண்ணோட பேரும் சுல்தானாதான். கதைல வரும் உலகம் இப்போ நெஜத்துல இல்லைன்னாலும், எதிர்காலத்துல நிச்சயம் பார்க்கலாம்னு நம்புறேன்.

சுல்தானா ஒரு பெண்ணைச் சந்திக்கிறார். சுல்தானாவுக்கு ஏற்கெனவே தெரிந்த சிஸ்டர் சாராவைப் போல் அவர் இருக்கார். இருவரும் ஒரு புது உலகத்துக்குள் நடந்துசெல்கிறார்கள். அவர்கள் செல்லும் பாதை வெல்வெட்போல் மெத்துமெத்தென்று இருக்கிறது. அந்த ஊரில் பரபரப்பாக வேலை நடந்துகொண்டிருக்கிறது. வேலை பார்த்துக்கொண்டிருந்தவர்கள் அனைவரும் பெண்கள்! சுல்தானா, ஆண்களைப் போல் வெட்கி நாணத்துடன் இருப்பதாகக் கூறி அந்தப் பெண்கள் கிண்டல் செய்கிறார்கள்.

சமையல் செய்யும் ஆண்கள்

அது பெண்ணுலகம். அப்படியானால், ஆண்களெல்லாம் எங்கே என்று சுல்தானா கேட்கிறார். அவர்கள் அவர்களுக்குரிய இடத்தில், அதாவது வீட்டுக்குள் இருக்கிறார்கள்.

அந்த உலகத்தில் ஆண்கள் எல்லாம் வீட்டில் சமைத்துக் கொண்டிருக்கிறார்கள். அவர்களுக்குச் சமையல் பிடித்திருக்கிறது. ஏனென்றால், உழைப்பைப் பிழிந்தெடுக்கும் நெருக்கடியான ஒன்றாக, சமையல் வேலை அந்த உலகத்தில் இல்லை. அதனால் அவர்கள் மகிழ்ச்சியாக அந்த வேலையைச் செய்துகொண்டிருக் கிறார்கள். சமையல் வேலை எப்படி எளிதானதாக மாறியது?

பெண்களின் கண்டுபிடிப்புகள்தாம். அடுப்பெரிப்பதற்குச் சூரிய ஆற்றலைச் சேகரித்துத் தரும் அதிநவீனக் கருவியைப் பெண்கள் கண்டுபிடித்துத் தந்திருக்கிறார்கள். அது மட்டுமல்ல மேகங்களில் இருந்து தண்ணீரை நேரடியாக எடுத்துவருவதற்கான தொழில்நுணுக்கத்தையும் அவர்கள் கண்டறிந்துவிட்டதால், தண்ணீர் பிரச்சினையும் தீர்க்கப்பட்டுவிடுகிறது.

இதையெல்லாம் கேட்டு ஆச்சரியப்படும் சுல்தானாவுக்கு, ஒரு கேள்விக்கு மட்டும் விடை தெரிந்தாக வேண்டும் என்ற ஆவல் மேலெழுகிறது. ஆண்களை எப்படி உங்களால் வீட்டுக்குள் அடைக்க முடிந்தது?

கதையா, நிஜமா?

அந்தக் கேள்விக்கும் அந்தப் பெண் பதில் சொல்கிறார். ஒரு முறை பக்கத்து நாடு பெண்ணுலகம் மீது போர் தொடுத்துவந்தது. ஆண்கள் எல்லாம் போரிட்டு மொத்தமாகத் தோற்றுப்போய் விட்டார்கள். கடைசியாக ஒரு வழி இருக்கிறது என்று ஒரு பெண் அறிஞர் தெரிவித்தார். அதை ஏற்றுக்கொண்ட பெண்ணுலகின் ராணி நாட்டின் தன்மானம், விடுதலையை நிலைநாட்ட ஆண்கள் எல்லாம் வீட்டுக்குள் போய்விட வேண்டுமென உத்தரவிட்டார்.

போரில் சண்டையிட்டு வலியுடனும் புண்களுடனும் இருந்த ஆண்கள், அதுதான் நல்லது என்று பேசாமல் வீட்டுக்குள் போய்விட்டார்கள். தங்கள் நாட்டை எப்பாடு பட்டாவது காப்பாற்றிவிட முடியும் என்ற நம்பிக்கை ஆண்களுக்கு இல்லை. ஆனால், பெண்கள் சமயோசிதமாகச் செயல்பட்டு அந்தப் போரில் வென்றுவிட்டார்கள். இதுதான் ஆண்கள் வீட்டுக்குள் அடைபட்ட கதை.

இது எல்லாம் நெசமா கதையா என்கிற கேள்வி வருகிறது, இல்லையா? பெண்களைக் காலம்காலமாக வீட்டில் முடக்கிவைத்து அவர்களுடைய சிந்தனையும் வேலைத்திறனும் முடக்கப்பட்டுள்ளன. பெண்கள் வெளியுலகுக்கு வந்தால், அறிவியல் துறையில் மட்டுமல்லாமல் எல்லாத் துறைகளிலும் பெரும் சாதனைகளை நிகழ்த்துவார்கள் என்று ‘சுல்தானாவின் கனவு‘ என்கிற நூல் சொல்கிறது. அதுதானே நிஜம்.

இந்தக் கதை இன்றைக்கு முழுமையாக நிஜமாகவில்லை என்றாலும், சுல்தானாவின் கனவு பலிக்கத் தொடங்கிவிட்டது. பெண்கள் அந்தப் பாதையில்தான் நடைபயின்று வருகிறார்கள். சுல்தானாவின் கனவு நிச்சயம் ஒரு நாள் நனவாகும். இந்தக் குட்டிப் புழு சொல்றத குறிச்சு வெச்சுக்கோங்க!

கட்டுரையாளர் தொடர்புக்கு: valliappan.k@hindutamil.co.in