மேஜிக்... மேஜிக்... - தீப்பெட்டி வித்தை!

எளிமையான ஒரு குட்டி மேஜிக்கை உங்கள் நண்பர்களுக்குச் செய்து காட்டுகிறீர்களா?

தேவையான பொருட்கள்:

ஆறு அல்லது ஏழு குச்சிகளுடன் கூடிய தீப்பெட்டி, பழைய ஒரு ரூபாய் நாணயம்.

எப்படிச் செய்வது?

# மேஜிக்கைச் செய்துகாட்டுவதற்கு முன்பு, நீங்கள் முன்தயாரிப்பு ஒன்றைச் செய்துகொள்ள வேண்டும்.

# தீக்குச்சிகளுடன் கூடிய தீப்பெட்டியை எடுத்துக்கொள்ளுங்கள். அடிப்பாகப் படத்தில் காட்டியது போல, தீப்பெட்டியில் பழைய ஒரு ரூபாய் நாணயத்தை வெளியில் தெரியாதபடி செருகுங்கள்.

# இப்போது உங்கள் நண்பர்களிடம், “இது ஒரு மந்திரத் தீப்பெட்டி. இதை மேல் நோக்கிச் சுண்டிவிட்டால் கீழே வந்து விழும்போது எப்போதும் மேல் பக்க லேபிள் தெரியும்படிதான் தரையில் விழும்’ என்று சொல்லுங்கள்.

# அதெப்படி என்று உங்கள் நண்பர்கள் கேள்வி கேட்பார்கள். அது ரகசியம் என்று சொல்லிவிட்டு, சுண்டி விடுங்கள். தீப்பெட்டி மேல் பக்க லேபிள் தெரியும்படி விழும்.

# அதைப் போலவே மீண்டும் மீண்டும் சுண்டிவிடுங்கள். எத்தனை முறை சுண்டிவிட்டாலும் தரையில் விழும்போது மேல் பக்க லேபிள் தெரியும்படிதான் விழும். இதைக் கண்டு உங்கள் நண்பர்கள் ஆச்சரியத்தில் மூழ்கிப்போவார்கள்.

மேஜிக் ரகசியம்:

தீப்பெட்டிக்குள் செருகி வைத்த நாணயத்தின் பளு காரணமாக, நீங்கள் சுண்டிவிடும்போது எப்போதும் மேல் பக்க லேபிள் தெரியும்படி கீழே வந்துவிழுகிறது.

உங்கள் நண்பர்களிடம் இந்த மேஜிக்கைச் செய்துகாட்டு முன் தனியாக ஓரிரு முறை செய்துபாருங்கள்.