மயில்களின் வண்ணமயமான மொழி | உயிரினங்களின் மொழி - 14

இந்தியாவின் தேசியப் பறவையான மயில் தோகை விரித்தாடும் அழகில் மயங்காதவர் யாரும் இல்லை. தோகை விரிப்பு என்பது மயில்களின் தகவல் தொடர்பு. காட்டில் நடக்கும்போது திடீரென்று ’மே-ஆவ்’ என்று உரத்த அலறல் கேட்டால், அது பூனையல்ல மயில். கார்னெல் பறவையியல் ஆராய்ச்சியாளர்கள், அது ஒரு மயிலின் எச்சரிக்கை அழைப்பு என்கிறார்கள். ஆபத்து வரும்போது மயில்கள் ’கா-ஆன்’ போன்ற ஒலிகளை எழுப்புகின்றன.

மயில்களின் குரல் தொடர்பு பல்வேறு சூழல்களுக்கேற்ப மாறுபடுகிறது. தாய் மயில் தன் குஞ்சுகளுடன் உரையாட ’உக்’ அல்லது ’அன்’ என்கிற மென்மையான ஒலிகளைப் பயன்படுத்துகிறது. இது குஞ்சுகளைத் தன்னருகே அழைக்கவும், உணவு கிடைத்திருப்பதை அறிவிக்கவும் உதவுகிறது.

இனச்சேர்க்கை காலத்தில் ஆண் மயில்கள் ’கே-யாவ்’ என்கிற தனித்துவமான ஒலியை எழுப்புகின்றன. இது பெண் மயில்களைக் கவர்வதற்காகவும், அருகிலுள்ள மற்ற ஆண் மயில்களுக்குத் தாங்கள் இருப்பதைத் தெரிவிப்பதற்காகவும் பயன்படுத்தப்படுகிறது.

இரவில் மரங்களில் தூங்கும் மயில்கள் ’கோ-கோய்’ என்கிற தொடர் ஒலிகளை எழுப்புகின்றன. ஒரு மயில் இப்படிக் கத்தினால், அதைக் கேட்ட மற்ற மயில்களும் அதே ஒலியைத் திரும்ப எழுப்புகின்றன. இது ஒரு சங்கிலித் தொடர் போல நீண்டு, குழுவின் ஒருமைப்பாட்டைக் காக்க உதவுகிறது.

ஆய்வாளர்களின் ஆய்வுகளில், கூட்டமாக மரங்களில் தங்கும் மயில்களில் எப்போதும் சில மயில்கள் மற்றவற்றைவிட விழிப்புடன் இருப்பதைக் காணலாம். இவை ஆபத்து வரும்போது எச்சரிக்கை ஒலிகளை எழுப்புகின்றன. இது குழுவின் பாதுகாப்புக்கு உதவுகிறது. இந்த விழிப்புத்தன்மை இயற்கையான உடலியல் வேறுபாடுகள், தூக்கச் சுழற்சி காரணமாக இருக்கலாம்.

மயில்களின் காட்சித் தொடர்பு அவற்றின் ஒலி தொடர்பைவிடச் சிறந்தது. ஆய்வுகளின்படி, ஒவ்வோர் ஆண் மயிலும் நூற்று ஐம்பதுக்கும் மேற்பட்ட நீண்ட, வண்ணமயமான இறகுகளைக் கொண்ட தோகையைக் கொண்டுள்ளது. இனச்சேர்க்கை காலத்தில் இந்த இறகுகளை விசிறி போல விரித்துக் காட்டுகிறது. இது பெண் மயில்களைக் கவர்வதற்காகச் செய்யப்படுகிறது.

தோகையில் உள்ள ஒவ்வோர் இறகிலும் ’கண்’ போன்ற வடிவம் உள்ளது. இந்தக் கண்கள் வெவ்வேறு கோணங்களில் வெவ்வேறு நிறங்களில் ஜொலிக்கின்றன. இந்த அமைப்பு ஆண் மயிலின் ஆரோக்கியத்தைப் பிரதிபலிக்கிறது. மேலும் அதிக எண்ணிக்கையிலான, பிரகாசமான கண் அமைப்புகள் கொண்ட ஆண் மயில்களைப் பெண் மயில்கள் அதிகம் விரும்புகின்றன.

ஆண் மயில் தோகையை விரிக்கும்போது ஓர் ஓசை உருவாகுகிறது. இறகுகளின் அளவு, அமைப்பு, ஒவ்வொரு மயிலின் தோகை அசைவின் தன்மை ஆகியவற்றைப் பொறுத்து இவற்றில் சிறிய வேறுபாடுகள் இருக்கும்.

பறவையியல் ஆராய்ச்சியாளர்கள், மயில்களின் இனச்சேர்க்கை நடனத்தில் இருபதுக்கும் மேற்பட்ட வெவ்வேறு அசைவுகளை அடையாளம் கண்டுள்ளனர். இது குதித்தல், சுற்றிச் சுழலுதல், தோகை அதிர்வு போன்ற அசைவுகளைக் கொண்டுள்ளது. சில மயில்கள் வட்ட வடிவத்தில் நடனமாடுகின்றன. மற்றவை நேர்கோட்டில் நகர்கின்றன. ஒவ்வொரு மயிலும் தனக்கே உரித்தான நடன அசைவுகளைக் கொண்டுள்ளது. இதன் மூலம் அது தனது ஆளுமையை வெளிப்படுத்துவதாக நம்பப்படுகிறது.

மயில்களின் கழுத்துப் பகுதி நீல-பச்சை நிறத்தில் இருக்கும். இந்த இறகுகளின் சிறப்பு அமைப்பு காரணமாக, ஒளியின் கோணத்தைப் பொறுத்து நிறம் மாறும் தன்மைகொண்டது. இது வெவ்வேறு கோணங்களில் பார்க்கும்போது நீலம், பச்சை, ஊதா போன்ற வண்ணங்களில் தெரியக்கூடும். மயில்கள் தங்கள் கழுத்து மற்றும் உடல் அசைவுகளைத் தகவல் தொடர்புக்குப் பயன்படுத்துகின்றன.

பெண் மயில்கள் தங்கள் குஞ்சுகளுடன் ’அமன் அமன்’ போன்ற மென்மையான ஒலிகளைப் பயன்படுத்துகின்றன. இது குஞ்சுகளுக்குத் தன்னை பின்தொடரவும், கவனமாக இருக்கவும் வழிகாட்டுகிறது.

மயில்களின் இறகுகள் அழகுக்காக மட்டுமல்ல, அவை ஆழமான பரிணாம முக்கியத்துவம் வாய்ந்தவை.

இந்தியாவில் மயில்களின் எண்ணிக்கை கடந்த சில பத்தாண்டுகளில் குறைந்துள்ளது. இந்த அழகிய பறவைகளின் தொடர்பு மொழியைப் புரிந்துகொள்வது அவற்றைப் பாதுகாக்கவும், நம் சுற்றுச்சூழலின் பல்லுயிர்த் தன்மையைப் பாதுகாக்கவும் நமக்கு உதவும்.

இயற்கையின் குரலைக் கேட்பது என்பது வெறும் ஒலிகளைக் கேட்பது மட்டுமல்ல, அந்த ஒலிகளின் அர்த்தத்தைப் புரிந்துகொள்வதும்கூட.

கட்டுரையாளர், எழுத்தாளர். | தொடர்புக்கு: writernaseema@gmail.com

முந்தைய அத்தியாயம் > பாம்பு எப்படித் தகவல் பரிமாறும்? | உயிரினங்களின் மொழி - 13