புதுமை உலகம்: ஹைப்பர்லூப் ஹோட்டல் தெரியுமா?

ஒரு சுற்றுலா போகிறோம். பேருந்து, ரயில், விமானம் எனத் தனித்தனியாகப் பயணிக்க வேண்டும். அதற்காக டிக்கெட் புக்கிங் செய்ய வேண்டும். அதேபோல ஹோட்டல்களுக்கெனத் தனியாகச் செல்ல வேண்டும். அதற்காகவும் புக்கிங் செய்ய வேண்டும். இப்படி ஒவ்வொன்றுக்கும் தனித்தனியாகச் செல்வதைவிட இருக்கும் இடத்தில் இருந்தபடியே இவை எல்லாம் கிடைத்தால் எப்படியிருக்கும்? கற்பனை செய்து பார்க்கவே முடியாதல்லவா?

அமெரிக்காவின் லாஸ் வேகாஸின் நெவாடா பல்கலைக்கழக ஆர்கிடெட் மாணவர் பிராண்டன் சைப்ரச்ட்டுக்கு இந்தக் கற்பனைக்குச் செயல்வடிவம் கொடுப்பதுதான் ஒரே கனவு, லட்சியம் எல்லாம். ஹோட்டலிருந்தே பஸ், ரயில், விமானம் என மூன்றையும் ஒரே நேரத்தில் பயன்படுத்துவதற்கான செயல்வடிவத்தைக் கொடுத்து வருகிறார் இந்த இளைஞர்.

கடந்த ஜூன் மாதம் ‘எதிர்கால ஹோட்டல்களுக்கான டிசைன்’ என்ற தலைப்பில் ஒரு போட்டி அமெரிக்காவில் நடத்தப்பட்டது. இந்தப் போட்டியில் 24 நாடுகளைச் சேர்ந்த 65 வடிவமைப்புகள் வந்தன. அதில் சிறந்த கற்பனைக்கான ‘ரேடிகல் இன்னோவேஷன்’ என்ற பெயரில் பிராண்டன் சமர்ப்பித்திருந்த யோசனை விருதை வென்றது.

இவரின் யோசனைப்படி, எதிர்காலத்தில் அமெரிக்காவில் பல்வேறு இடங்களிலுள்ள ஹோட்டல்களை அனைத்தையும் ‘அதிவேக வளையப் போக்குவரத்து’ என்றழைக்கப்படும் ‘ஹைப்பர்லூப்’ முறையில் இணைத்துவிட்டால் பேருந்து, ரயில், விமானம் எனத் தனி டிக்கெட் எடுக்கத் தேவையில்லையாம்.

அமெரிக்காவின் அடுத்த மிகப்பெரிய கண்டுபிடிப்பு ஹைப்பர்லூப் போக்குவரத்துதான். தங்கிப் பயணிக்கும் அனுபவத்தை இனிதாக்கும் வகையில் கண்டுபிடிக்கப்பட்டிருக்கும் ஹைப்பர்லூப்பை அடுத்த கட்டத்துக்குக் கொண்டு செல்ல முயல்கிறார் இந்த இளைஞர்!