ஒரே ஓவரில் 6 சிக்சர்கள்; ரஞ்சி வரலாறு படைத்த மேகாலயா வீரர் ஆகாஷ் சவுத்ரி: 11 பந்துகளில் அரைசதம்!

ரஞ்சி டிராபி பிளேட் குரூப் ஆட்டத்தில் மேகாலயா வீரர் ஆகாஷ் சவுத்ரி அருணாசலப் பிரதேச அணிக்கு எதிராக ஒரே ஓவரில் 6 சிக்சர்களை விளாசி கேரி சோபர்ஸ், ரவி சாஸ்திரி ஆகியோருடன் மேல்மட்ட சாதனைப் பட்டியலில் இணைந்தார்.

ஆகாஷ் சவுத்ரி 8 பவுண்டரிகளுடன் 14 பந்துகளில் அரைசதம் கண்டு இன்னொரு சாதனையையும் நிகழ்த்தினார். மேகாலயா அணி 628/6 என்று டிக்ளேர் செய்தது.

அருணாச்சலப்பிரதேச இடது கை சுழற்பந்து வீச்சாளர் லிமார் காளி தாபி என்ற பவுலரின் ஓவரில்தான் ஆகாஷ் சவுத்ரி 6 சிக்சர்களை விளாசி சாதனைப்பட்டியலில் இணைந்தார். இன்னிங்சின் 126வது ஓவரில்தான் இந்த சாத்துமுறை நடந்தது.

1984-85 ரஞ்சி டிராபியில் ரவி சாஸ்திரி 6 சிக்சர்களை திலக்ராஜ் என்ற பவுலரை விளாசிய பிறகு இப்போதுதான் மீண்டும் ரஞ்சியில் ஒரே ஓவரில் 6 சிக்சர்கள் சாதனைக்குச் சொந்தக்காரார் ஆனார் ஆகாஷ் சவுத்ரி. முதல் தரக் கிரிக்கெட்டில் இத்தகைய சாதனை மூன்றாவது முறையாக நிகழ்கிறது.

11 பந்துகளில் ஆகாஷ் சவுத்ரி 8 சிக்சர்களுடன் அரைசதம் கண்டார். இதன் மூலம் முதல் தர கிரிக்கெட்டிலேயே அதிவேக அரைசத வரலாற்றுச் சாதனையையும் நிகழ்த்தினார்.

இதற்கு முன்னர் 2012-ம் ஆண்டில் எஸ்செக்ஸ் அணிக்கு எதிராக லீஷயர் அணிக்காக வெய்ன் ஒயிட் என்ற வீரர் 12 பந்துகளில் அரைசதம் கண்டு சாதனை படைத்துள்ளார். 1965-ல் நாட்டிங்கம் ஷயர் அணிக்கு எதிராக இதே லீ ஷயர் வீரர் கிளைவ் இன்மேன் 13 பந்துகளில் அரைசதம் கண்டார்.

சர்வதேச கிரிக்கெட்டில் 2007 ஐசிசி 50 ஓவர் உலகக்கோப்பையில் தென் ஆப்பிரிக்காவின் ஹெர்ஷல் கிப்ஸ் ஒரே ஒவரில் 6 சிச்கர்களையும் அதே 2007 முதல் டி20 உலகக்கோப்பையில் யுவராஜ் சிங் ஒரே ஓவரில் 6 சிக்சர்களையும், இலங்கைக்கு எதிரான டி20 போட்டியில் வெஸ்ட் இண்டீஸின் கிரன் போலார்டு ஒரே ஓவரில் 6 சிக்சர்களையும் விளாசி உள்ளனர்.

ஆகாஷ் குமார் சவுத்ரி 25 வயதாகும் மேகாலயா அணி வீரர். இயற்பெயர் ஆகாஷ்குமார் சவுத்ரி. வலது கை பேட்டர், வலது கை வேகப்பந்து வீச்சாளர். இதுவரை 30 முதல்தரப் போட்டிகளில் ஆடி 503 ரன்களையும் லிஸ்ட் ஏ கிரிக்கெட்டில் 28 போட்டிகளில் 203 ரன்களையும் டி20களில் 30 ஆட்டங்களில் 107 ரன்களையும் எடுத்துள்ளார்.

பந்து வீச்சில் முதல் தர கிரிக்கெட்டில் 87 விக்கெட்டுகளையும் லிஸ்ட் ஏ ஒருநாள் கிரிக்கெட்டில் 37 விக்கெட்டுகளையும் டி20 போட்டிகளில் 28 விக்கெட்டுகளையும் கைப்பற்றியுள்ளார்.