இந்தியா உடனான ஒருநாள் கிரிக்கெட் தொடருக்கான அணியை அறிவித்தது ஆஸி!

சிட்னி: இந்திய அணி உடனான ஒருநாள் மற்றும் டி20 கிரிக்கெட் தொடருக்கான அணியை அறிவித்துள்ளது கிரிக்கெட் ஆஸ்திரேலியா நிர்வாகம். காயம் காரணமாக கம்மின்ஸ் இதில் விளையாடாத நிலையில் ஒருநாள் கிரிக்கெட் தொடரிலும் அணியை மிட்செல் மார்ஷ் கேப்டனாக வழிநடத்துவார் என தெரிவிக்கப்பட்டுள்ளது.

இந்​திய கிரிக்கெட் அணி விரைவில் ஆஸ்​திரேலியாவுக்கு சென்​று, அந்த அணிக்கு எதி​ராக 3 போட்​டிகள் கொண்ட ஒரு​நாள் தொடர், 5 போட்​டிகள் கொண்ட சர்​வ​தேச டி20 தொடரில் விளை​யாட உள்​ளது. இந்​தத் தொடர் வரும் 19-ம் தேதி தொடங்​கு​கிறது. இந்​தத் தொடருக்​கான இந்​திய அணியை இந்​திய கிரிக்​கெட் கட்​டுப்​பாட்டு வாரி​யம் ​(பிசிசிஐ) அண்மையில் அறிவித்திருந்தது. இந்தச் சூழலில் கிரிக்கெட் ஆஸ்திரேலியாவும் இந்த தொடருக்கான அணியை அறிவித்துள்ளது.

ஆகஸ்ட் மாதம் தென் ஆப்பிரிக்கா உடனான ஒருநாள் கிரிக்கெட் தொடரை 2-1 என்ற கணக்கில் இழந்தது நடப்பு உலக சாம்பியனான ஆஸ்திரேலியா. அதிலிருந்து மீண்டு வந்து இந்த தொடரில் வெற்றி பெற அந்த அணி முனைப்பு காட்டும். காயம் காரணமாக ஓய்வில் உள்ள கம்மின்ஸுக்கு பதிலாக ஆஸ்திரேலிய ஒருநாள் கிரிக்கெட் அணியை மார்ஷ் வழிநடத்துகிறார். இதில் ஒருநாள் கிரிக்கெட் தொடரில் ஆஸ்திரேலிய அணியின் அனுபவ வீரர் மிட்செல் ஸ்டார்க் விளையாடுகிறார்.

ஒருநாள் தொடருக்கான ஆஸ்திரேலிய அணி: மிட்செல் மார்ஷ் (கேப்டன்), சேவியர் பார்ட்லெட், அலெக்ஸ் கேரி, கூப்பர் கோனொலி, பென் டுவார்ஷுயிஸ், நாதன் எல்லீஸ், கேமரூன் கிரீன், ஜோஷ் ஹேசில்வுட், டிராவிஸ் ஹெட், ஜோஷ் இங்கிலிஸ், மிட்செல் ஓவன், மேத்யூ ரென்ஷா, மேத்யூ ஷாட், மிட்செல் ஸ்டார்க், ஆடம் ஜாம்பா ஆகியோர் இடம்பெற்றுள்ளனர். இதோடு முதல் 2 டி20 போட்டிகளுக்கான அணியையும் ஆஸ்திரேலியா அறிவித்துள்ளது.

ஒருநாள் தொடருக்கான இந்திய அணி: ஷுப்​மன் கில் (கேப்​டன்), ரோஹித் சர்​மா, விராட் கோலி, ஸ்ரேயஸ் ஐயர், அக்​சர் படேல், கே.எல்.ராகுல் (விக்​கெட் கீப்​பர்), துருவ் ஜூரல், யஷஸ்வி ஜெய்​ஸ்​வால், நித்திஷ் ரெட்​டி, வாஷிங்​டன் சுந்​தர், குல்​தீப் யாதவ், ஹர்​ஷித் ராணா, முகமது சிராஜ், அர்​ஷ்தீப் சிங், பிரசித் கிருஷ்ணா.

இந்தத் தொடரில் இந்திய ஒருநாள் கிரிக்கெட் அணியின் கேப்டனாக இளம் வீரரான ஷுப்மன் கில் நியமிக்கப்பட்டுள்ளார். கேப்டன் பொறுப்பில் இருந்து விடுவிக்கப்பட்டுள்ள ரோஹித் சர்மா இந்த தொடரில் பேட்ஸ்மேனாக விளையாடுகிறார்.