ஆசிய கோப்பை ஹாக்கி இறுதிப் போட்டி: இந்தியா - சீன மகளிர் அணிகள் இன்று மோதல்

ஹாங்சோ: ஆசிய கோப்பை மகளிர் ஹாக்கி போட்டியின் இறுதிச் சுற்றில் இன்று இந்தியா, சீன அணிகள் மோதவுள்ளன.

சீனா​வின் ஹாங்சோ நகரில் மகளிர் ஆசிய கோப்பை ஹாக்கி தொடர் நடைபெற்று வரு​கிறது. இதன் லீக் சுற்று முடிவில் சீனா, தென் கொரியா, இந்தியா, ஜப்பான் அணிகள் சூப்பர் 4 சுற்றுக்கு தகுதி பெற்றன. சூப்பர் 4 சுற்றில் இந்த 4 அணிகளும் தங்களுக்குள் தலா ஒரு முறை மோதுகின்றன. இதன் முடிவில் முதல் 2 இடங்களை பிடிக்கும் அணிகள் இறுதிப்போட்டிக்கு முன்னேறும்.

முதல் ஆட்டத்தில் தென் கொரியாவை வீழ்த்திய இந்திய அணி, 2-வது ஆட்டத்தில் சீனாவிடம் தோல்வி கண்டது. நேற்று நடைபெற்ற 3-வது ஆட்டத்தில் இந்தியா, ஜப்பான் அணிகள் மோதின. இந்த ஆட்டம் 1-1 என்ற கணக்கில் டிராவில் முடிவடைந்தது. இந்திய அணி தரப்பில் பியூட்டி டங்டங்கும், ஜப்பான் தரப்பில் ஷிஹோ கோபயாகவாவும் கோல் அடித்தனர்.

சூப்பர் 4 சுற்றின் மற்றொரு ஆட்டத்தில் சீனா, தென் கொரிய அணிகள் மோதின. இதில் சீனா 1-0 என்ற கணக்கில் வெற்றி பெற்றது.
இதையடுத்து சூப்பர் 4 சுற்றில் முதல் 2 இடங்களை சீனா, இந்திய அணிகள் பிடித்து இறுதிச் சுற்றுக்கு முன்னேறின. இதைத் தொடர்ந்து இன்று (செப்டம்பர் 14) நடைபெறும் இறுதிப் போட்டியில் இந்தியா, சீன அணிகள் மோதுகின்றன.